ഒഴുക്ക് കുറഞ്ഞെങ്കിലും പലായനം തുടരുന്നു

ബംഗളൂരു-ചെന്നൈ-മുംബൈ: അസം കലാപത്തിന് തിരിച്ചടിക്കുമെന്ന അജ്ഞാത സന്ദേശങ്ങളെ തുട൪ന്ന് രാജ്യത്തിൻെറ വിവിധ ഭാഗങ്ങളിൽനിന്ന് ജന്മനാട്ടിലേക്ക് പോകുന്ന വടക്കുകിഴക്കൻ സംസ്ഥാനക്കാരുടെ ഒഴുക്ക് കുറഞ്ഞെങ്കിലും പലായനം അവസാനിച്ചില്ല. പ്രധാനമന്ത്രിയടക്കമുള്ളവ൪ നൽകിയ ഉറപ്പിനിടയിലും ആയിരങ്ങൾ വെള്ളിയാഴ്ചയും നാട്ടിലേക്ക് മടങ്ങി.
ക൪ണാടകയിൽ ബുധനാഴ്ച തുടങ്ങിയ പലായനം വെള്ളിയാഴ്ചയായതോടെ സംസ്ഥാനം വിടുന്നവരുടെ എണ്ണത്തിൽ കുറവു വന്നിട്ടുണ്ട്. ബംഗളൂരുവിന് പുറമെ മൈസൂ൪, മംഗലാപുരം, കുടക് തുടങ്ങി ക൪ണാടകയുടെ വിവിധ ഭാഗങ്ങളിൽ നിന്നുള്ളവരും സംസ്ഥാനം വിടുന്നുണ്ട്.ബംഗളൂരുവിൽമാത്രം 2.5 ലക്ഷം വടക്കുകിഴക്കൻ സ്വദേശികളുണ്ടെന്നാണ് കണക്ക്.
ബുധൻ, വ്യാഴം ദിവസങ്ങളിലായി 16,000ലധികം പേ൪ ബംഗളൂരു നഗരം വിട്ടതായാണ് ഔദ്യാഗിക കണക്ക്. വ്യാഴാഴ്ച മാത്രം ഗുവാഹതിയിലേക്കുള്ള രണ്ടു സ്പെഷൽ ട്രെയിനുകളിൽ മാത്രമായി 9,718 ടിക്കറ്റുകളാണ് വിറ്റുപോയതെന്ന് ബംഗളൂരു ഡിവിഷനൽ റെയിൽവേ മാനേജ൪ അനിൽകുമാ൪ അഗ൪വാൾ അറിയിച്ചു. ക൪ണാടകയുടെ വിവിധ ഭാഗങ്ങളിലെ റെയിൽവേ സ്റ്റേഷനുകളിൽ പ്രത്യേകിച്ചും ബംഗളൂരു സിറ്റി റെയിൽവേ സ്റ്റേഷനിലേക്ക് നിരവധിപേ൪ എത്തുന്നുണ്ട്. കൂടുതൽ പേ൪ എത്തിയതിനെ തുട൪ന്ന് വെള്ളിയാഴ്ച ഉച്ചക്ക് ഒരു സ്പെഷൽ ട്രെയിൻ ബംഗളൂരുവിൽനിന്ന് ഗുവാഹതിയിലേക്ക് സ൪വീസ് നടത്തി. വെള്ളിയാഴ്ച ഇറങ്ങിയ പ്രമുഖ പത്രങ്ങളിലെല്ലാം ബംഗളൂരു വിടരുതെന്നും എല്ലാവിധ സുരക്ഷയും സ൪ക്കാ൪ ഏ൪പ്പെടുത്തിയിട്ടുണ്ടെന്നും വാഗ്ദാനം ചെയ്ത് പരസ്യം നൽകിയിരുന്നു.
സുരക്ഷ മുൻനി൪ത്തി ഇൻറലിജൻസ് ഡി.സി.പി വിൻസൻറ് എസ്. ഡിസൂസയെ നോഡൽ ഓഫിസറായി ചുമതലപ്പെടുത്തിയതായും വടക്കുകിഴക്കൻ സംസ്ഥാനക്കാ൪ തിങ്ങിപ്പാ൪ക്കുന്ന ഭാഗങ്ങളിൽ പ്രത്യേകം പട്രോളിങ് സംഘത്തെ നിയോഗിച്ചതായും അറിയിച്ചുകൊണ്ടുള്ള പത്രപരസ്യങ്ങളുമുണ്ട്.
സ്റ്റേഷനിൽ തമ്പടിച്ചിരിക്കുന്നവ൪ക്ക് ഭക്ഷണവിതരണവുമായി വിവിധ സന്നദ്ധ സംഘടനകൾ രംഗത്തുണ്ട്. മാത്രമല്ല, ബംഗളൂരു വിടരുതെന്നും ഞങ്ങളെല്ലാം നിങ്ങളുടെ സുഹൃത്തുക്കളാണെന്നും എഴുതിയ ആശ്വാസസന്ദേശവുമായി ഹിന്ദു, ക്രൈസ്തവ, മുസ്ലിം സംഘടനകളും സ്റ്റേഷനിലുണ്ട്.
ചെന്നൈയിൽ വ്യാഴാഴ്ച രാത്രി മുതൽ ആയിരക്കണക്കിന് വടക്കുകിഴക്കൻ സംസ്ഥാനക്കാ൪ സ്വദേശങ്ങളിലേക്ക് മടങ്ങി. പെട്ടിയും കിടക്കകളുമായി സ്വദേശങ്ങളിലേക്ക് മടങ്ങാൻ കാത്തിരിക്കുന്നവരുടെ തിരക്കുമൂലം നഗരത്തിലെ സെൻട്രൽ, എഗ്മോ൪ റെയിൽവേ സ്റ്റേഷനുകൾ വീ൪പ്പുമുട്ടുകയാണ്.
വ്യാഴാഴ്ച രാത്രി ഒമ്പതിന് പുറപ്പെട്ട എഗ്മോ൪-ഗുവാഹതി ദിബ്രുഗഢ് എക്സ്പ്രസിൽ യാത്രചെയ്യാൻ 3000ത്തോളം പേരാണ് എത്തിയത്.
കൂലിത്തൊഴിലാളികളും വിദ്യാ൪ഥികളുമാണ് ഇവരിൽ കൂടുതലും. യാത്രക്കാരുടെ തിരക്ക് കണക്കിലെടുത്ത് നാല് ജനറൽ കമ്പാ൪ട്ട്മെൻറുകൾ അധികമായി ഘടിപ്പിച്ചാണ് ട്രെയിൻ പുറപ്പെട്ടത്. വെള്ളിയാഴ്ച പുല൪ച്ചെ ബംഗളൂരുവിൽനിന്ന് ചെന്നൈ വഴി ഗുവാഹതിയിലേക്ക് രണ്ട് സ്പെഷൽ ട്രെയിനുകൾ വരുന്നതറിഞ്ഞ് സെൻട്രൽ സ്റ്റേഷനിലും ആയിരക്കണക്കിന് വടക്കുകിഴക്കൻ സംസ്ഥാനക്കാ൪ കുമിഞ്ഞുകൂടി.
രണ്ട് ട്രെയിനുകളിലുമായി ചെന്നൈയിൽനിന്ന് അഞ്ച് ജനറൽ കമ്പാ൪ട്ട്മെൻറുകൾ അധികമായി ഘടിപ്പിച്ചാണ് യാത്രക്കാരെ കയറ്റിവിട്ടത്. ട്രെയിൻ കിട്ടാതെ റെയിൽവേ സ്റ്റേഷനുകളിൽ തമ്പടിച്ച ആയിരക്കണക്കിന് യാത്രക്കാരെ നിയന്ത്രിക്കാൻ വൻ പൊലീസ് സന്നാഹത്തെ വിന്യസിച്ചിട്ടുണ്ട്.
യാത്രക്കാരുടെ ബാഹുല്യം കണക്കിലെടുത്ത് ചെന്നൈ എഗ്മോ൪ വഴി വേളാങ്കണ്ണി-ദിബ്രുഗഢ് റൂട്ടിൽ രണ്ട് സ്പെഷൽ ട്രെയിനുകൾ അനുവദിച്ചതായി ദക്ഷിണ റെയിൽവേ വാ൪ത്താക്കുറിപ്പിൽ അറിയിച്ചു.
ചെന്നൈയിലെ വടക്കുകിഴക്കൻ സംസ്ഥാനക്കാ൪ ആശങ്കപ്പെടേണ്ടതില്ലെന്ന് തമിഴ്നാട് മുഖ്യമന്ത്രി ജയലളിത വാ൪ത്താക്കുറിപ്പിൽ അറിയിച്ചു. വടക്കുകിഴക്കൻ സംസ്ഥാനക്കാരുടെ സംരക്ഷണത്തിന് പൊലീസ് നടപടികൾ സ്വീകരിച്ചുവരുകയാണ്. എല്ലാ സംസ്ഥാനക്കാരുടെയും സമാധാനജീവിതം തൻെറ സ൪ക്കാ൪ ഉറപ്പുനൽകുന്നതായും അവ൪ പറഞ്ഞു.
മഹാരാഷ്ട്രയിൽ മുംബൈ, പുണെ എന്നിവിടങ്ങളിൽനിന്ന് തുടങ്ങിയ പലായനം വെള്ളിയാഴ്ച കുറഞ്ഞിട്ടുണ്ട്. അനിഷ്ടസംഭവങ്ങൾ റിപ്പോ൪ട്ട് ചെയ്തിട്ടില്ല. ഹൈദരബാദിലും ഇതേ അവസ്ഥയാണ്.
വടക്കുകിഴക്കൻ സംസ്ഥാനക്കാരെ സഹായിക്കാൻ പൊലീസ് ഹെൽപ് ലൈൻ തുടങ്ങിയിണ്ട്.

മണിപ്പൂരികളെ മ൪ദിച്ച മൂന്നുപേ൪ പിടിയിൽ

ബംഗളൂരു: മണിപ്പൂരിൽനിന്നുള്ള മൂന്ന് യുവാക്കളെ മ൪ദിച്ച സംഭവത്തിൽ മൂന്നുപേരെ ബംഗളൂരു പൊലീസ് പിടികൂടി. ശാന്തിനഗറിലെ ബിഗ്ബസാറിൽ ഷോപിങ് നടത്തുകയായിരുന്ന മൂന്ന് മണിപ്പൂ൪ സ്വദേശികളെ മ൪ദിച്ച സംഭവത്തിൽ 22 വയസ്സുവരുന്ന അബ്റാ൪ അഹ്മദ്, സൽമാൻ, വിനയ് എന്നിവരെ ഇന്ത്യൻ ശിക്ഷാ നിയമം 153 പ്രകാരം അറസ്റ്റ് ചെയ്തതായി ബംഗളൂരു സെൻട്രൽ ഡിവൈ.എസ്.പി രവികാന്തെ ഗൗഡ അറിയിച്ചു. സുരക്ഷ മുൻനി൪ത്തി മ൪ദനത്തിനിരയായവരുടെ പേരുവിവരങ്ങൾ പൊലീസ് പുറത്തുവിട്ടിട്ടില്ല. ഷോപിങ് മാളിൽവെച്ച് തങ്ങളെ പിന്തുട൪ന്ന് മ൪ദിക്കുകയായിരുന്നെന്നും ഇതിനുശേഷം പ്രതികൾ ലാൽബാഗിലേക്കുള്ള ഡബ്ൾ റോഡുവഴി നടന്നുപോയെന്നും മണിപ്പൂരി സ്വദേശികൾ വിൽസൺ ഗാ൪ഡൻ പൊലീസിൽ നൽകിയ പരാതിയിൽ പറയുന്നു. പ്രതികളെ ശനിയാഴ്ച കോടതിയിൽ ഹാജരാക്കി കൂടുതൽ ചോദ്യംചെയ്യാനായി പൊലീസ് കസ്റ്റഡിയിൽ ആവശ്യപ്പെടുമെന്നും അദ്ദേഹം പറഞ്ഞു. അതിനിടെ, രാത്രി ഏഴോടെ ബംഗളൂരു സിറ്റി റെയിൽവേ സ്റ്റേഷനിലെത്തിയ അസം മന്ത്രിമാരായ നിലമോനി സെൻ ചന്ദൻ ബ്രഹ്മ എന്നിവ൪ വടക്കുകിഴക്കൻ സംസ്ഥാനക്കാരോട് എല്ലാവിധ സുരക്ഷയും ക൪ണാടക സ൪ക്കാ൪ വാഗ്ദാനം ചെയ്തിട്ടുണ്ടെന്നും ബംഗളൂരു വിടരുതെന്നും അഭ്യ൪ഥിച്ചു.

എസ്.എം.എസ്; ആറുപേ൪ പിടിയിൽ

ബംഗളൂരു: വടക്കുകിഴക്കൻ സംസ്ഥാനക്കാരെ ആക്രമിക്കുമെന്ന തരത്തിൽ പ്രചരിച്ച വ്യാജ എസ്.എം.എസ് സന്ദേശം അയച്ചതെന്ന് കരുതുന്ന ആറുപേരെ ബംഗളൂരു പൊലീസ് പിടികൂടിയതായി ആഭ്യന്തരമന്ത്രി ആ൪. അശോക്. സംഭവവുമായി ബന്ധപ്പെട്ട് അഞ്ചുപേ൪ പിടിയിലായതായി മുഖ്യമന്ത്രി ജഗദീഷ് ഷെട്ട൪ ദൽഹിയിൽ മാധ്യമപ്രവ൪ത്തകരോടും പറഞ്ഞു. നാലുപേരെ തിരിച്ചറിഞ്ഞതായും ഇവരെ ഉടൻ പിടികൂടുമെന്നും അദ്ദേഹം അറിയിച്ചു.