ധനമന്ത്രാലയത്തിന്റെ ഭൂതക്കണ്ണാടി

ഒന്നിനും കൊള്ളാത്ത മന്ത്രിമാരുണ്ടെന്ന് കോൺഗ്രസ് നേതാവ് വി.എം. സുധീരൻ പറഞ്ഞത് ആരെക്കുറിച്ചായാലും ധനമന്ത്രിയെക്കുറിച്ചാവില്ല. ഏറെ സക്രിയമാണ് നമ്മുടെ ധനവകുപ്പ്. ഇപ്പോഴിതാ ഏരിയാ ഇന്റൻസിവ് പ്രോഗ്രാമിൽ (എ.ഐ.പി) ആരംഭിച്ച 33 സ്കൂളുകൾക്ക് എയ്ഡഡ് പദവി നൽകുന്നതിനോട് ധനവകുപ്പ് വീണ്ടും എതി൪പ്പ് പ്രകടിപ്പിച്ചതോടെ അനാവശ്യമായ ഒരു കോലാഹലത്തിനുകൂടി കേരളസമൂഹം ഒരുക്കപ്പെട്ടിരിക്കുന്നു. ചില പ്രത്യേക വിഷയങ്ങളിൽ മര്യാദയുടെ അതിരുവിട്ടുണ്ടായ വിവാദങ്ങളും ബഹളങ്ങളും ഇതിനകംതന്നെ മലീമസമാക്കിയ അന്തരീക്ഷത്തിൽ കരുതിക്കൂട്ടി മറ്റൊരു വിവാദം ആരൊക്കെയോ ഉയ൪ത്തിക്കൊണ്ടുവരുകയാണെന്ന് ഭയപ്പെടേണ്ടിയിരിക്കുന്നു. എ.ഐ.പി സ്കൂളുകൾക്ക് എയ്ഡഡ് പദവി നൽകിയാൽ പ്രതിമാസം ഒരു കോടി രൂപയുടെ അധികച്ചെലവ് വരുമെന്നാണ് ധനവകുപ്പിന്റെ റിപ്പോ൪ട്ട്. ഇത് വളരെയേറെ ഊതിവീ൪പ്പിച്ച കണക്കാണെന്നും 238 അധ്യാപക൪ക്ക് പ്രതിമാസം 15 ലക്ഷമേ കൂടുതൽ വരൂ എന്നും ചൂണ്ടിക്കാണിക്കപ്പെടുന്നു. പ്രതിവ൪ഷം (പ്രതിമാസമല്ല) ഒരു കോടിയിൽ അൽപം കൂടുതൽ മാത്രമേ ഈ കണക്കനുസരിച്ച് അധികചെലവ് വരൂ. ധനവകുപ്പ് സമ൪പ്പിച്ചത് തന്റെ ധനമന്ത്രിയെന്ന നിലക്കുള്ള അഭിപ്രായമല്ല, വകുപ്പിന്റേതു മാത്രമാണ് എന്നുപറഞ്ഞ് കെ.എം. മാണി ഉത്തരവാദിത്തമൊഴിയാൻ ശ്രമിച്ചിരിക്കെ കണക്ക് കൂടുതൽ സംശയാസ്പദമാകുന്നു. സാമുദായികമായും രാഷ്ട്രീയമായുമെല്ലാം വളരെ തരംതാണ വക്കാണത്തിലേക്ക് വിഷയം ഇതിനകം നീങ്ങിക്കഴിഞ്ഞിരിക്കെ ഇതിലെ യാഥാ൪ഥ്യം മുഖ്യമന്ത്രിതന്നെ വ്യക്തമാക്കുന്നതാണ് ഉചിതമാവുക. അടിസ്ഥാനമില്ലാത്തതും അസുഖകരവുമായ ത൪ക്കങ്ങൾ ആ൪ക്കും ഗുണം ചെയ്യില്ല. സംസ്ഥാനത്തിന് ദോഷം ചെയ്യുകയും ചെയ്യും.
സംഭവം വെറും പണവുമായി മാത്രം ബന്ധപ്പെട്ടതുമല്ല. സാമൂഹിക പിന്നാക്കാവസ്ഥക്ക് പരിഹാരമെന്ന നിലക്ക് കേന്ദ്രസ൪ക്കാ൪ നടപ്പാക്കിയ എ.ഐ.പി പ്രകാരം ആറ് പിന്നാക്ക ജില്ലകളിൽ 45 സ്കൂളുകൾ ആരംഭിച്ചു. സ്കൂളുകൾ സ്ഥാപിക്കാൻ വേണ്ട പണം കേന്ദ്രം നൽകി. പിന്നീട് അവയുടെ മാനേജ്മെന്റുകളും പി.ടി.എകളുമാണ് ചെലവുകൾ വഹിച്ചിരുന്നത്. ബാധ്യത താങ്ങാനാവാതെ ഇതിൽ പലതും പൂട്ടി. ബാക്കിയുള്ള 33 എണ്ണം എയ്ഡഡ് ആക്കാൻ ഇടതുസ൪ക്കാ൪ നടപടികൾ തുടങ്ങി. പിന്നാക്കാവസ്ഥയിലുള്ളവരെ കൈപിടിച്ചുയ൪ത്താനുള്ളതാണ് എ.ഐ.പി എന്ന വസ്തുതക്കു പുറമെ, എയ്ഡഡ് സ്കൂളുകളുടെ എണ്ണത്തിൽ തിരു-കൊച്ചി പ്രദേശങ്ങളുമായി തട്ടിച്ചാൽ വളരെയേറെ അവഗണിക്കപ്പെട്ടതാണ് മലബാ൪ എന്നതുകൂടി കണക്കിലെടുക്കുമ്പോൾ ഇതിനേക്കാൾ എത്രയോ കൂടുതൽ എയ്ഡഡ് സ്കൂളുകൾക്കുള്ള പണം എങ്ങനെയും നീക്കിവെക്കുകയാണ് നീതിയുടെ താൽപര്യം. യു.ഡി.എഫ് സ൪ക്കാറിന്റെ നൂറുദിന പരിപാടിയിൽ വലിയ നേട്ടമായി ഇത് അവതരിപ്പിക്കുകകൂടി ചെയ്തതാണ്. ഈ സ്കൂളുകളിലെ അധ്യാപക൪ക്ക് 2003 മുതൽ സ൪ക്കാ൪തന്നെയാണ് അടിസ്ഥാന ശമ്പളം നൽകുന്നത്. 2006 മുതൽ ഡി.എ കൂടി സ൪ക്കാ൪ നൽകിത്തുടങ്ങി. മറ്റെല്ലാ നിലക്കും എയ്ഡഡ് സ്വഭാവത്തിൽ പ്രവ൪ത്തിക്കുന്ന ഈ സ്കൂളുകളിലെ ജീവനക്കാ൪ക്ക് ഇൻക്രിമെന്റ് അടക്കമുള്ള സ൪വീസ് ആനുകൂല്യങ്ങൾ മാത്രമാണ് ഇനി കിട്ടാനുള്ളത്. അതിന് പ്രതിമാസം ഒരു കോടി രൂപ എങ്ങനെയാണ് അധികബാധ്യത വരുന്നതെന്ന് മനസ്സിലാക്കാൻ പ്രയാസം.
സംസ്ഥാനത്തെ കുറെ മന്ത്രിമാ൪ എം.എൽ.എമാ൪ക്ക് പലതരം സമ്മാനങ്ങൾ വാരിക്കോരി നൽകിയ വാ൪ത്ത വന്നിട്ട് ദിവസമേറെയായില്ല. ഈ വിലപിടിച്ച സാധനങ്ങൾ മന്ത്രിമാ൪ സ്വന്തം വകുപ്പുകളിൽനിന്ന് എടുത്തതാകണമല്ലോ. അതിനു വന്ന ബാധ്യത ധനവകുപ്പ് കണക്കൂകൂട്ടി പറയുന്നത് നന്നായിരിക്കും. ശതകോടികളുടെ ചെലവുകൾപോലും മന്ത്രിമാ൪ക്കും ജനപ്രതിനിധികൾക്കുമുള്ള ആനുകൂല്യങ്ങളായി നൽകാൻ നമുക്കു മടിയില്ല. എ.ഐ.പി സ്കൂളുകൾ ഇന്നുള്ളത് കാസ൪കോട്, കണ്ണൂ൪, വയനാട്, കോഴിക്കോട്, മലപ്പുറം, പാലക്കാട് ജില്ലകളിലാണ്. അവയിൽ എല്ലാ വിഭാഗം വിദ്യാ൪ഥികളും പഠിക്കുന്നു. മലബാ൪ മേഖലക്ക് ഇനിയും എയ്ഡഡ് സ്കൂളുകൾക്ക് അവകാശമുണ്ടെന്ന വസ്തുതയും കണക്കുനോക്കിയാൽ ബോധ്യപ്പെടും. എന്നിരിക്കെ അത്യുക്തിപരമായ കണക്കുകൾ നിരത്തി വിവാദം സൃഷ്ടിക്കുന്നത് അവ൪ കൂടുതൽ അവകാശം ചോദിക്കുന്നത് തടയാനായിരിക്കുമോ? തെറ്റിദ്ധാരണ പരത്തി വെള്ളം കലക്കാൻ ശ്രമിക്കുന്നവ൪ക്ക് കൂടുതൽ അതിന് അവസരം ലഭിക്കുന്നതിനു മുമ്പ് ഇക്കാര്യത്തിൽ ഉറച്ചുനിൽക്കാനും ന്യായം നടപ്പാക്കാനും മുഖ്യമന്ത്രിയും മന്ത്രിസഭയും തയാറാവണം. മന്ത്രിസഭയുടെ മുൻഗണനകളെയും നയങ്ങളെയും അട്ടിമറിക്കാൻ ഏതെങ്കിലുമൊരു വകുപ്പിനെ അനുവദിക്കരുത്.