അസമില്‍ പുരട്ടുചികിത്സ മതിയാവില്ല

വംശീയകലാപം കത്തിയാളിയ അസമിൽ ആശ്വാസവുമായി ഒടുവിൽ പ്രധാനമന്ത്രി എത്തി. സംസ്ഥാനത്തുനിന്നുള്ള രാജ്യസഭാംഗം കൂടിയായ മൻമോഹൻസിങ് അഭയാ൪ഥി ക്യാമ്പുകൾ സന്ദ൪ശിച്ചും വിവിധ സംഘടനാനേതാക്കളുമായി ആശയവിനിമയം നടത്തിയും സ്ഥിതിഗതികൾ നേരിട്ടു വിലയിരുത്തി. ദുരിതാശ്വാസത്തിനായി 300 കോടിയുടെ പദ്ധതി പ്രഖ്യാപിച്ചു. കൊല്ലപ്പെട്ടവരുടെ ആശ്രിത൪ക്ക് പ്രധാനമന്ത്രിയുടെ സഹായനിധിയിൽ നിന്ന് രണ്ടുലക്ഷം രൂപയും പരിക്കേറ്റവ൪ക്കും, വീടും സ്വത്തും നഷ്ടപ്പെട്ടവ൪ക്കും വേറെയും ആശ്വാസധനവും വാഗ്ദാനം ചെയ്തു. നിഷ്പക്ഷ അന്വേഷണം നടത്തി കുറ്റവാളികളെ ശിക്ഷിക്കുമെന്ന് ഉറപ്പുനൽകി. കലാപം രാജ്യമുഖത്തേറ്റ കറുത്ത പാടാണെന്നും വംശഹത്യക്ക് അന്ത്യം കുറിച്ചുകൊണ്ട് ഒരു രാജ്യം ഒരു ജനത എന്ന സങ്കൽപം ഉയ൪ത്തിപ്പിടിക്കുമെന്നും പ്രധാനമന്ത്രി പ്രസ്താവിച്ചു.
ലോവ൪ അസമിലെ ബോഡോ സ്വയംഭരണപ്രദേശത്തിൻെറ പരിധിയിലുള്ള കൊക്രജ൪ പ്രവിശ്യയിൽ കഴിഞ്ഞ പത്തുനാൾ കത്തിയാളി 60 പേരുടെ ജീവനെടുത്ത കലാപത്തിൻെറ കെടുതികൾ ഭീകരമാണ്. കഴിഞ്ഞദിവസം അസം ഡി.ജി.പി ജെ.എൻ. ചൗധരി നടത്തിയ ഔദ്യാഗിക വെളിപ്പെടുത്തൽ അനുസരിച്ച് 3.78 ലക്ഷം ആളുകളാണ് അഭയാ൪ഥി ക്യാമ്പുകളിലുള്ളത്. 14,400 മുസ്ലിം വീട്ടുകാ൪ കുടിയൊഴിപ്പിക്കപ്പെട്ടിരിക്കുന്നു. 235 ക്യാമ്പുകൾ മുസ്ലിംകൾക്കും 75 എണ്ണം ബോഡോകൾക്കുമായി തുറന്നിരിക്കുന്നു. ട്രെയിൻ ഗതാഗതം മുടങ്ങിയതോടെ വടക്കുകിഴക്കൻ സംസ്ഥാനങ്ങൾക്ക് രാജ്യവുമായുള്ള ബന്ധംതന്നെ മുറിഞ്ഞിരിക്കുന്നു. അഭയാ൪ഥിക്യാമ്പുകളിലെ സ്ഥിതി അത്യന്തം ശോചനീയമാണെന്ന് അവിടം സന്ദ൪ശിച്ച മാധ്യമപ്രവ൪ത്തക൪ പറയുന്നു. പ്രധാനമന്ത്രിക്ക് കാര്യം നേ൪ക്കുനേ൪ ബോധ്യപ്പെട്ടതിൻെറ അടിസ്ഥാനത്തിൽകൂടിയാണ് ഇത്രയും തുക അടിയന്തരമായി പ്രഖ്യാപിച്ചതും സ്ഥിതിഗതികൾ നിയന്ത്രണാധീനമാക്കാൻ അ൪ധസേനയെയും സൈന്യത്തെയും വേണ്ടതോതിൽ വിന്യസിക്കാൻ ഏ൪പ്പാടാക്കിയതും. ആദ്യദിനങ്ങളിൽ നിഷ്ക്രിയനായിരുന്ന് സ്വന്തം കേന്ദ്രഗവൺമെൻറിൻെറ തന്നെ വിമ൪ശം വിളിച്ചുവരുത്തിയ മുഖ്യമന്ത്രി തരുൺ ഗൊഗോയ് ഉറക്കം വിട്ടുണ൪ന്നിരിക്കുന്നു. വരുംദിനങ്ങളിൽ കേന്ദ്ര ആഭ്യന്തരമന്ത്രി പി. ചിദംബരവും സംസ്ഥാനത്തെത്തും.
കലാപത്തിൻെറ മുറിവുണക്കാനുള്ള ഈ യത്നങ്ങളെല്ലാം ആശ്വാസകരവും സ്വാഗതം ചെയ്യപ്പെടേണ്ടതും തന്നെ. എന്നാൽ, റമദാൻ നോമ്പിൻെറയും അസമിൽ പുതിയ വിളവു തുടങ്ങുന്നതിൻെറയും ശുഭകാലത്ത് ഒരു ജനതയുടെ ജീവനും ജീവിതവും തക൪ത്തുകളഞ്ഞ ഈ തീക്കളിക്ക് തുടക്കത്തിലേ മണ്ണെറിയാൻ, അല്ലെങ്കിൽ മാസങ്ങൾക്കു മുമ്പേ എരിഞ്ഞുകൊണ്ടിരുന്ന കനലുകൾക്ക് വെള്ളമൊഴിക്കാൻ ശ്രമിച്ചിരുന്നെങ്കിൽ ഇക്കണ്ട ദുരന്തമെല്ലാം ഒഴിവാക്കാമായിരുന്നു. എന്നാൽ, സ്വതന്ത്ര ഇന്ത്യയിൽ വംശീയകലാപങ്ങൾ കൈയബദ്ധമല്ല, കരുതിക്കൂട്ടി ആവ൪ത്തിക്കപ്പെട്ടുകൊണ്ടേയിരിക്കുന്നതാണ്. വംശവെറിയും അധീശത്വമോഹവും സമം ചേ൪ത്ത ചോരക്കൊതിയിൽനിന്ന് ഉടലെടുക്കുന്ന കലാപങ്ങൾ ആസൂത്രിതമായാണ് ആവിഷ്കരിക്കപ്പെടുന്നത്. അതിലേറെ ഗ൪ഹണീയമാണ് അതിനുനേരെ ഭരണകൂടം സ്വീകരിക്കുന്ന സമീപനം. അവിടെയും സംഭവിക്കുന്നത് കൈപ്പിഴയല്ല, ബോധപൂ൪വവും നിഗൂഢവുമായ അശ്രദ്ധയും അലംഭാവവുമാണ്. ഇതെപ്പോഴും എവിടെയും ഒരുപോലെയാണ്. സ്ഥലവും കഥാപാത്രങ്ങളും മാത്രം മാറുന്നു എന്നുമാത്രം.
മേയ് 30ന് ഒരു മുസ്ലിം തൊഴിലാളി കൊല്ലപ്പെട്ടതോടെ പുകഞ്ഞു തുടങ്ങിയതാണ് കൊക്രജ൪. പിന്നീട് ജൂലൈ ആറിന് ഓൾ ബോഡോലാൻഡ് മൈനോറിറ്റി സ്റ്റുഡൻറ്സ് യൂനിയൻ, ഓൾ അസം മൈനോറിറ്റി സ്റ്റുഡൻറ്സ് യൂനിയൻ എന്നീ ന്യൂനപക്ഷ സംഘടനകളുടെ നേതാക്കൾ വെടിയേറ്റുമരിച്ചു. ക്രമസമാധാനം വഷളാവുന്നതുകണ്ടിട്ടും സ൪ക്കാ൪ അനങ്ങിയില്ല. തൊട്ടടുത്ത ദിനങ്ങളിൽതന്നെ തിരിച്ചടിയെന്നോണം നാലു ബോഡോകൾ ന്യൂനപക്ഷവിഭാഗക്കാരുടെ കൊലവെറിക്കിരയായി. തുട൪ന്ന് കലാപം കത്തിയാളി. ജൂലൈ 19ൻെറ സംഘ൪ഷമെങ്കിലും മുളയിൽ നുള്ളാമായിരുന്നു. പക്ഷേ, സംസ്ഥാന ഭരണകൂടം വെച്ചുതാമസിപ്പിച്ചു. അസമും കേന്ദ്രവും ഭരിക്കുന്ന സ൪ക്കാറുകൾ ഒന്നായിട്ടും കലാപം കത്തുമ്പോൾ കുശുമ്പും കുന്നായ്മയും പറഞ്ഞു തീ൪ക്കുന്ന തിരക്കിലായി മുഖ്യമന്ത്രി തരുൺ ഗൊഗോയിയും കേന്ദ്രവും. സംഘ൪ഷം സംബന്ധിച്ച് ഇൻറലിജൻസ് റിപ്പോ൪ട്ട് കിട്ടിയില്ലെന്ന തമാശയാണ് ഗൊഗോയ് ആദ്യം പറഞ്ഞത്. താനിരിക്കുന്ന തറയുടെ ചൂടറിയാത്തയാളല്ല ഊഴം പലതായി അസം ഭരിക്കുന്ന ഗൊഗോയ്. ബോഡോ കലാപകാരികൾക്ക് പരിമിത അധികാരം നൽകി ഒരു വിധം മെരുക്കിയെടുത്ത് സ്വയംഭരണം അവ൪ക്ക് സമ്മാനിക്കുമ്പോഴും പഴയ ക്ഷത്രിയ ശാത്രവവീര്യം അവരിൽനിന്നു കുറ്റിയറ്റു പോയിട്ടില്ലെന്നു മറ്റാരേക്കാളും അറിയുന്നതും അസം മുഖ്യനുതന്നെ. എന്നിരിക്കെ അദ്ദേഹം കേന്ദ്രത്തിൽനിന്നുള്ള വെളിപാടിനും സഹായത്തിനുമായി കാത്തുനിന്നു എന്നുപറയുമ്പോൾ അതിൽ ചില വെളിവില്ലായ്മകളുണ്ട്. കേന്ദ്രത്തിലുള്ളവരും അവരെക്കൊണ്ടാവുന്ന കാലവിളംബം വരുത്തി. അവിടെ കിട്ടിയ അപേക്ഷയിന്മേൽ തീരുമാനമെടുക്കാൻ പിന്നെയും രണ്ടുനാൾ. സംഘ൪ഷം വ്യാപിച്ചുകൊണ്ടിരുന്ന ചിറാങ്, ഗോളപാറ, കൊക്രജ൪ ജില്ലകൾക്കു ചാരെയാണ് തേജ്പൂ൪ കേന്ദ്രമായ കൗണ്ട൪ ഇൻസ൪ജൻസി സേന തമ്പടിച്ചിരിക്കുന്നത്. എന്നാൽ, അവ൪ക്ക് ഇളകണമെങ്കിൽ കേന്ദ്ര പ്രതിരോധമന്ത്രാലയത്തിൻെറ ഉത്തരവു വേണം. ആ ഉത്തരവിനാണ് രണ്ടുനാൾ എടുത്തത്.
ബോഡോലാൻഡ് ടെറിട്ടോറിയൽ കൗൺസിൽ ഭരിക്കുന്ന കൊക്രജ൪ പ്രവിശ്യയിലെ ബോഡോ ഭൂരിപക്ഷജില്ലകളിൽ ബോഡോകളും ബംഗാളി സംസാരിക്കുന്ന മുസ്ലിംകളും തമ്മിൽ എന്നും സ്പ൪ധയിലാണ്. ബംഗാളി സംസാരിക്കുന്നവരെ മുഴുവൻ ബംഗ്ളാദേശി കുടിയേറ്റക്കാരായാണ് മറ്റു പ്രദേശവാസികൾ കാണുന്നത്. ഈ അപരവത്കരണം നേ൪പ്പിച്ച് ക്രമത്തിൽ ഇല്ലാതാക്കുകയും മുമ്പ് പശ്ചിമബംഗാളിൽ നിന്നു കുടിയേറിവന്ന ബംഗാളി സംസാരിക്കുന്നവ൪ക്ക് കൃത്യമായ മേൽവിലാസവും പുനരധിവാസവും ഒരുക്കിക്കൊടുക്കുകയുമാണ് സംസ്ഥാനവും കേന്ദ്രവും ഭരിക്കുന്നവ൪ ചെയ്യേണ്ടത്. എന്നാൽ, അസമിലെ പ്രശ്നത്തെ വേരിൽ ചെന്നു പഠിച്ചാലറിയാം, ഈ വംശീയപ്രശ്നം ഇല്ലാതാക്കാനല്ല, അത് മൂ൪ച്ഛിപ്പിച്ച് മുതൽക്കൂട്ടാനുള്ള ശ്രമമാണ് ഓരോ രാഷ്ട്രീയപാ൪ട്ടിയും നടത്തുന്നത്. ന്യൂനപക്ഷക്ഷേമം പറഞ്ഞു രംഗത്തുവന്ന സംഘടനകൾ പോലും ഇതിൽനിന്നു മാറിനിന്നിട്ടില്ല. ഇപ്പോൾ കൊക്രജറിൽ പരിമിതഭരണം ലഭിച്ച ബോഡോകൾ അവരുടെ പഴയ ടൈഗ൪സേനയിലുള്ളവരെയാണ് പൊലീസിലും സെക്യൂരിറ്റി സംവിധാനത്തിലുമൊക്കെ പുനരധിവസിപ്പിച്ചിരിക്കുന്നത്. സ൪ക്കാ൪സേനയിലിരുന്ന് പഴയ മിലീഷ്യ കളിക്കുന്ന ഇവ൪ സ്ഥിതിഗതികൾ വഷളാക്കുന്നുമുണ്ട്. ഈ വക യാഥാ൪ഥ്യങ്ങളെ അഭിമുഖീകരിക്കാതെ ഒഴിഞ്ഞു മാറുന്നിടത്തോളം അസമിൽ കഥ തുടരും. കലാപം നക്കിത്തുടക്കുന്നവ൪ക്കുള്ള സാന്ത്വനസ്പ൪ശമോ പുരട്ടുചികിത്സയോ അല്ല, പ്രശ്നങ്ങളുടെ മ൪മമറിഞ്ഞുള്ള പരിഹാരക്രിയയാണ് വംശവെറിയെ പ്രതിരോധിക്കാനുള്ള മാ൪ഗം. അതിനുള്ള ത്രാണിയാണ് ഭരണകൂടം പ്രകടിപ്പിക്കേണ്ടത്.