തലമുടി മുറിച്ച സംഭവം: എ.എസ്.ഐക്ക് സസ്പെന്‍ഷന്‍

മൂന്നാ൪: പൊലീസ് കസ്റ്റഡിയിലെടുത്ത മകനെക്കുറിച്ച് അന്വേഷിക്കാനെത്തിയ പിതാവിന്റെ തല മുണ്ഡനം ചെയ്യുകയും താടിയും മീശയും വടിപ്പിക്കുകയും ചെയ്ത മറയൂ൪ സ്റ്റേഷനിലെ എ.എസ്.ഐ സാബുവിനെ ജില്ലാ പൊലീസ് ചീഫ് ജോ൪ജ് വ൪ഗീസ് സസ്പെൻഡ് ചെയ്തു. പള്ളനാട് സ്വദേശി അ൪ജുനൻ (58) നൽകിയ പരാതിയിൽ മൂന്നാ൪ സി.ഐ വി.ഡി. മോഹനൻ സമ൪പ്പിച്ച അന്വേഷണ റിപ്പോ൪ട്ടിന്റെ അടിസ്ഥാനത്തിലാണ് നടപടി.
ഞായറാഴ്ച വൈകുന്നേരം അ൪ജുനന്റെ ഭാര്യ ജയലക്ഷ്മി (47) നൽകിയ പരാതിയിൽ മകനെ പൊലീസ് കസ്റ്റഡിയിലെടുത്തിരുന്നു. അന്വേഷിക്കാനെത്തിയ പിതാവിനെ എ.എസ്.ഐ സാബു ബലമായി ബാ൪ബ൪ ഷോപ്പിലെത്തിച്ച് മുടി മുറിപ്പിക്കുകയായിരുന്നു. തിരുപ്പതി ക്ഷേത്രത്തിലേക്ക് നേ൪ച്ചയായി വള൪ത്തിയ മുടിയാണ് മുറിപ്പിച്ചത്. അ൪ജുനൻ ജില്ലാ പൊലീസ് മേധാവി, മൂന്നാ൪ ഡിവൈ.എസ്.പി എന്നിവ൪ക്ക് പരാതി നൽകിയതിനെത്തുട൪ന്നാണ് അന്വേഷിക്കാൻ മൂന്നാ൪ സി.ഐയെ ചുമതലപ്പെടുത്തിയത്.