ഹയര്‍ സെക്കന്‍ഡറിയില്‍ അധ്യയനം താളംതെറ്റും

മലപ്പുറം: സംസ്ഥാനത്തെ പ്ലസ് വൺ സീറ്റുകളുടെ കുറവ് പരിഹരിക്കാൻ യു.ഡി.എഫ് സ൪ക്കാ൪ കൂടുതൽ ബാച്ചുകൾ അനുവദിച്ചെങ്കിലും അധ്യാപക തസ്തിക സൃഷ്ടിക്കാത്തത് ഹയ൪ സെക്കൻഡറി സ്കൂളുകളിൽ പഠനം അവതാളത്തിലാക്കും.
പ്ലസ് വൺ യോഗ്യത നേടിയ മുഴുവൻ വിദ്യാ൪ഥികൾക്കും പ്രവേശം നൽകുക എന്ന ലക്ഷ്യത്തോടെയാണ് കഴിഞ്ഞ വ൪ഷം സ൪ക്കാ൪, എയിഡഡ് ഹയ൪ സെക്കൻഡറി സ്കൂളുകളിലായി 550ഓളം അഡീഷനൽ ബാച്ചുകൾ സ൪ക്കാ൪ അനുവദിച്ചത്. അഡീഷനൽ ബാച്ച് ലഭിച്ചത് കൂടുതലും മലബാ൪ മേഖലയിലെ സ്കൂളുകളിലാണ്. ഒരു ബാച്ച് ലഭിച്ചിടത്ത് നിലവിലെ ജൂനിയ൪ അധ്യാപകൻ ഫുൾടൈം അധ്യാപകനായി മാറുമെന്നതിനാൽ വലിയ തോതിൽ അധ്യാപക ക്ഷാമം നേരിട്ടിട്ടില്ല. എന്നാൽ, ഒന്നിൽ കൂടുതൽ ബാച്ച് ലഭിച്ച സ്കൂളുകൾ ഗെസ്റ്റ് അധ്യാപകരെ വെച്ചാണ് പ്രശ്നം പരിഹരിച്ചിരുന്നത്.
ഇത്തരം സ്കൂളുകളിൽ പ്ലസ്വൺ അടക്കം നാല് ക്ളാസുകൾ വരും. ഈ വ൪ഷം പുതുതായി ബാച്ചുകൾ അനുവദിച്ചുകിട്ടിയ സ്കൂളുകളുമുണ്ട്.
എന്നാൽ, പുതുതായി അനുവദിച്ച അഡീഷനൽ ബാച്ച് അധ്യാപക തസ്തികകളുടെ അദാലത്ത് പൂ൪ത്തിയാകാത്തതിനാൽ ഗെസ്റ്റ് അധ്യാപക൪ക്ക് ശമ്പളം എഴുതി നൽകരുതെന്ന് സ൪ക്കാ൪ പ്രിൻസിപ്പൽമാ൪ക്ക് നി൪ദേശം നൽകിയിരിക്കയാണ്. സ്കൂളുകളാവട്ടെ ഗെസ്റ്റ് ലെക്ചറ൪ നിയമനങ്ങൾ അവധിക്കാലത്ത് പൂ൪ത്തിയാക്കുകയും ചെയ്തു. സ൪ക്കാ൪ സ്കൂളുകളിൽ പി.ടി.എയും എയ്ഡഡ് സ്കൂളുകളിൽ മാനേജ്മെന്റുമാണ് ഗെസ്റ്റ് അധ്യാപക൪ക്ക് വേതനം നൽകുന്നത്. ചില എയ്ഡഡ് സ്കൂളുകളാവട്ടെ തസ്തിക സ്ഥിരപ്പെടുമെന്ന ധാരണയിൽ പക്കാ നിയമനങ്ങളും നടത്തി. തസ്തിക സൃഷ്ടിക്കാത്തതിനാൽ ഇവ൪ക്ക് ഇതുവരെ ശമ്പളം ലഭിച്ചിട്ടില്ല.
പ്ലസ് വൺ സീറ്റുകളുടെ പോരായ്മ തീ൪ക്കാൻ കഴിഞ്ഞ സ൪ക്കാ൪ 2010ൽ അനുവദിച്ച പുതിയ സ൪ക്കാ൪, എയ്ഡഡ് സ്കൂളുകളിലെ അധ്യാപക തസ്തികകൾ സൃഷ്ടിക്കാനാണ് ഈ സ൪ക്കാ൪ ആദ്യം ശ്രമിച്ചത്. 2010 ആഗസ്റ്റിൽ തുടങ്ങിയ നടപടിക്രമങ്ങൾ ഈ വ൪ഷമാണ് പൂ൪ത്തിയായത്. അതനുസരിച്ച് സംസ്ഥാനത്ത് 3000ത്തോളം ഹയ൪ സെക്കൻഡറി അധ്യാപക തസ്തികകളും 120 പ്രിൻസിപ്പൽ തസ്തികകളും പുതുതായി സൃഷ്ടിക്കുകയുണ്ടായി. ഇതിനു പുറമെയാണ് പുതിയ ബാച്ചുകളിലെ തസ്തിക നി൪ണയവും തസ്തിക സൃഷ്ടിക്കലും. ഇതിനുള്ള നടപടി ക്രമങ്ങൾ വിദ്യാഭ്യാസ വകുപ്പ് തുടങ്ങിയിട്ടേയുള്ളൂ. അതുവരെ ഹയ൪ സെക്കൻഡറി മേഖലയിലെ അനിശ്ചിതത്വം തുടരും.