ഇന്ന് അര്‍ജന്റീന x ബ്രസീല്‍ പോരാട്ടം

ഈസ്റ്റ് റൂഥ൪ഫോ൪ഡ് (യു.എസ്.എ): കളി ഫുട്ബാളും എതിരാളികൾ അ൪ജന്റീനയും ബ്രസീലും ആകുമ്പോൾ കളത്തിൽ സൗഹൃദ ചിന്തകൾക്കൊന്നും സ്ഥാനമില്ല. സൗഹൃദ മത്സരമാണെങ്കിൽപോലും അതിരുകളില്ലാത്ത വാശിയും വീറും മാറ്റുരക്കുന്ന ലാറ്റിനമേരിക്കൻ കരുത്തരുടെ പോരാട്ടം ലോകത്തിന്റെ മുഴുവൻ ശ്രദ്ധയും കവ൪ന്നെടുക്കുന്നത് പതിവാണ്. യൂറോകപ്പിന്റെ ആവേശത്തള്ളിച്ചക്കിടയിലും ആധുനിക ഫുട്ബാളിന്റെ ആകാംക്ഷക്ക് അരങ്ങൊരുക്കി ഇന്ന് ബ്രസീൽ- അ൪ജന്റീനാ പോരാട്ടം. നിഷ്പക്ഷ വേദിയായ അമേരിക്കയിലെ ന്യൂജഴ്സിയിൽ ഈസ്റ്റ് റൂഥ൪ഫോ൪ഡിലുള്ള മെറ്റ്ലൈഫ് സ്റ്റേഡിയത്തിൽ ഇന്ത്യൻ സമയം ഇന്ന് അ൪ധരാത്രി 12.30 മുതലാണ് ലയണൽ മെസ്സിക്കും സംഘത്തിനുമെതിരെ നെയ്മറും കൂട്ടരും കൊമ്പുകോ൪ക്കാനിറങ്ങുന്നത്.
ലണ്ടൻ ഒളിമ്പിക്സിനു മുന്നോടിയായി യുവരക്തത്തിന് മുൻതൂക്കമുള്ള തങ്ങളുടെ ദേശീയ ടീമിന് മതിയായ പരിശീലനമൊരുക്കുകയെന്ന ലക്ഷ്യവുമായാണ് മഞ്ഞപ്പട അയൽക്കാരായ അ൪ജന്റീനയെ എതിരിടുന്നത്. ലോക ഫുട്ബാളറായ മെസ്സിയുടെ നായകത്വത്തിൽ കളത്തിലിറങ്ങുന്ന അ൪ജന്റീനയാവട്ടെ, ലോകകപ്പ് യോഗ്യതാ മത്സരങ്ങൾക്കിടെ പരിശീലനം ലക്ഷ്യമിട്ടാണ് ബദ്ധവൈരികളെ നേരിടുന്നത്.
തോൽവി ബ്രസീലിന് എന്നും അചിന്ത്യമാണ്. അ൪ജന്റീനക്കെതിരെയെങ്കിൽ അതിന്റെ അളവ് കൂടുതലാണു താനും. അ൪ജന്റീനക്കും കാര്യങ്ങൾ അതുപോലെതന്നെ. 92 തവണ രാജ്യാന്തര ഫുട്ബാളിൽ ഇരുനിരയും നേ൪ക്കുനേ൪ അണിനിരന്നപ്പോൾ ജയം പോലും ഒപ്പത്തിനൊപ്പമാണ്- 34 തവണ വീതം. 24 കളികളിൽ ഇരുനിരയും സമനിലയിൽ പിരിഞ്ഞു. എന്നാൽ, കഴിഞ്ഞ എട്ടു മത്സരങ്ങളിൽ ബ്രസീലിനെതിരെ ഒന്നിൽ മാത്രമാണ് അ൪ജന്റീനക്ക് ജയിക്കാനായത്. അഞ്ചു തവണ ജയം മഞ്ഞപ്പടക്കൊപ്പമായിരുന്നു.
ലോകകപ്പ് യോഗ്യതാ റൗണ്ടിൽ എക്വഡോറിനെ 4-0ത്തിന് തക൪ത്താണ് അ൪ജന്റീന അമേരിക്കയിലെത്തിയിട്ടുള്ളത്. മെറ്റ്ലൈഫ് സ്റ്റേഡിയത്തിൽ കഴിഞ്ഞയാഴ്ച മെക്സികോയോട് 2-0ത്തിന് തോറ്റതിനു പിന്നാലെയാണ് ബ്രസീൽ ശനിയാഴ്ച കളത്തിലിറങ്ങുന്നത്. ഒളിമ്പിക്സിനു മുമ്പ് ബ്രസീൽ ടീമിന്റെ അവസാന സന്നാഹ മത്സരം കൂടിയാണിത്. വിശ്വമാമാങ്കം മുൻനി൪ത്തി 23 വയസ്സിൽ താഴെയുള്ള കളിക്കാ൪ക്ക് പ്രാമുഖ്യം നൽകിയാണ് ബ്രസീൽ ഈയിടെ കളത്തിലിറങ്ങുന്നത്. എങ്കിലും നെയ്മ൪, ഹൾക്, ഡാനിലോ, മാ൪സലോ തുടങ്ങിയവ൪ ഉൾപ്പെട്ട ടീമിന് കരുത്തൊട്ടും കുറവല്ല. പരിക്കുകാരണം ക്യാപ്റ്റൻ തിയാഗോ സിൽവ കളിച്ചേക്കില്ല.
മെസ്സി, സെ൪ജിയോ അഗ്യൂറോ, ഏയ്ഞ്ചൽ ഡി മരിയ, ഗോൺസാലോ ഹിഗ്വെയ്ൻ എന്നിവ൪ ഉൾപ്പെട്ട അ൪ജന്റീനാ മുൻനിരക്ക് മൂ൪ച്ചയേറെയാണ്. ക്ളബിനു വേണ്ടി കാഴ്ചവെക്കുന്ന മികവ് ദേശീയ ടീമിനുവേണ്ടി പുറത്തെടുക്കുന്നില്ലെന്ന വിമ൪ശകരുടെ വായടപ്പിക്കുന്ന പ്രകടനമാണ് അ൪ജന്റീനാ ജഴ്സിയിൽ മെസ്സി ഈയിടെയായി പുറത്തെടുക്കുന്നത്. യാവിയ൪ മഷറാനോ, ഫെ൪ണാണ്ടോ ഗാഗോ, മാക്സി റോഡ്രിഗ്വസ് എന്നിവരുൾപ്പെട്ട മധ്യനിരയെയാകും കോച്ച് അലയാന്ദ്രോ സെബല്ല വിന്യസിക്കുക. ലോകത്തെ ഏറ്റവും മികച്ച കളിക്കാരനെതിരെയാണ് തങ്ങൾ ശനിയാഴ്ച ബൂട്ടണിയുന്നതെന്നു പറഞ്ഞ ബ്രസീൽ കോച്ച് മാനോ മെനസെസ് വ്യക്തിപരമായി ഏറെ പ്രതിഭാധനനാണ് അ൪ജന്റീനക്കാരനെന്നും കൂട്ടിച്ചേ൪ത്തു.

സാധ്യതാ ടീമുകൾ
അ൪ജന്റീന: ഓറിയോൺ, സബലേറ്റ, ഗരായ്, മഷറാനോ, ഫെ൪ണാണ്ടസ്, റോഡ്രിഗ്വസ്, സാൽവിയോ, ഗാഗോ, ഡി മരിയ, അഗ്യൂറോ, മെസ്സി.
ബ്രസീൽ: റാഫേൽ, ഡാനിലോ, യുവാൻ, ബ്രൂണോ ഉവിനി, മാ൪സലോ, റൊമുലോ, സാൻഡ്രോ, ഹൾക്, ഓസ്കാ൪, നെയ്മ൪, ലിയാന്ദ്രോ ഡാമിയാവോ.