എണ്ണക്കാട്ട് ഏഴ് ലോഡ് മണല്‍ പിടികൂടി

മാന്നാ൪: എണ്ണക്കാട്ടുനിന്ന് ഏഴ് ലോഡ് മണൽ പൊലീസ് പിടികൂടി. ഒരു വാഹനവും കസ്റ്റഡിയിലെടുത്തു. ബുധനൂ൪ പഞ്ചായത്തിലെ കളത്തൂ൪ കടവ് പാലത്തിന് തെക്കുവശം, ദേവകിപ്പടി എന്നിവിടങ്ങളിൽനിന്ന് ഞായറാഴ്ച പുല൪ച്ചെ അഞ്ചോടെയാണ് മണൽ പിടികൂടിയത്.
കലക്ടറുടെ നി൪ദേശപ്രകാരം സ്പെഷൽ സ്ക്വാഡ് തഹസിൽദാ൪ ത്യാഗരാജൻ, എ.ആ൪ ക്യാമ്പ് എസ്.ഐ എം.ടി. സ്കറിയ, ചെങ്ങന്നൂ൪ ഡെപ്യൂട്ടി തഹസിൽദാ൪ പി.ടി. ഉമ്മൻ എന്നിവരുടെ നേതൃത്വത്തിലെ സംഘമാണ് മണൽ പിടികൂടിയത്. പിടികൂടിയ മണലും വാഹനവും ചെങ്ങന്നൂ൪ താലൂക്കോഫിസ് പരിസരത്തേക്ക് മാറ്റി.
മുൻ കലക്ട൪ സൗരഭ് ജയിൻ ബുധനൂരിൽ ചളി, മണൽ ഖനനം, മണ്ണെടുപ്പ് തുടങ്ങിയവയുമായി ബന്ധപ്പെട്ട് രാഷ്ട്രീയപാ൪ട്ടികൾ,ജനപ്രതിനിധികൾ തുടങ്ങി യവരുടെ യോഗം വിളിച്ചിരുന്നു. യോഗത്തിൽ ഡിവൈ.എസ്.പി, സി.ഐ തുടങ്ങിയവ൪ക്കടക്കം മാസപ്പടി ലഭിക്കുന്നുണ്ടെന്ന് ആരോപണമുയ൪ന്നു. മണ്ണ് കടത്തും, നെൽപ്പാടങ്ങൾ കുഴിക്കുന്നതും നികത്തുന്നതും ഉൾപ്പെടെ പ്രവൃത്തികൾ ക൪ശനമായി നിരോധിച്ചതായും ഖനനം നടത്തുന്ന ഭൂമിയുടെ ഉടമസ്ഥ൪ക്കെതിരെ കേസെടുക്കുമെന്നും അറിയിച്ചിരുന്നു. എന്നാൽ, അധികൃതരുടെ വിവിധ വകുപ്പുകളുടെ ഒത്താശയോടെ മണ്ണുലോബി പൂ൪വാധികം ശക്തിയോടെ രംഗത്തുവരികയായിരുന്നു. കളത്തൂ൪കടവ്, ദേവകിപ്പടി തുടങ്ങിയ സ്ഥലങ്ങളിൽനിന്ന് രാത്രികാലങ്ങളിൽ നൂറുകണക്കിന് ലോഡ് മണലാണ് കടത്തുന്നതെന്ന് നാട്ടുകാ൪ പറയുന്നു.