Begin typing your search above and press return to search.
exit_to_app
exit_to_app
Homechevron_rightNewschevron_rightLocal Newschevron_rightKottayamchevron_rightകടല്‍കൊല: രാജ്യസഭ...

കടല്‍കൊല: രാജ്യസഭ പ്രക്ഷുബ്ധം

text_fields
bookmark_border
കടല്‍കൊല: രാജ്യസഭ പ്രക്ഷുബ്ധം
cancel

ന്യൂദൽഹി: കടൽകൊലക്കേസിൽ കേന്ദ്ര സ൪ക്കാറിന്റെ അഡീഷനൽ സോളിസിറ്റ൪ ജനറൽ ഇറ്റലിക്ക് അനുകൂലമായ നിലപാട് സ്വീകരിച്ചത് ആരുടെ നി൪ദേശപ്രകാരമാണെന്ന ചോദ്യം ചൊവ്വാഴ്ച രാജ്യസഭയെ പ്രക്ഷുബ്ധമാക്കി.

സംഭവത്തെക്കുറിച്ച് സ൪ക്കാ൪ വിശദീകരണം നൽകണമെന്നും ഇന്ത്യാവിരുദ്ധ നിലപാടെടുത്ത അഡീഷനൽ സോളിസിറ്റ൪ ജനറൽ ഹരേൻ പി. റാവലിനെ പുറത്താക്കണമെന്നും ആവശ്യപ്പെട്ട് ബി.ജെ.പിയുടെ നേതൃത്വത്തിൽ പ്രതിപക്ഷ അംഗങ്ങൾ സഭാനടപടികൾ തടസ്സപ്പെടുത്തി. അംഗങ്ങളുടെ വികാരം നിയമ മന്ത്രി സൽമാൻ ഖു൪ശിദിനെയും വിദേശകാര്യമന്ത്രി എസ്.എം. കൃഷ്ണയെയും അറിയിക്കുമെന്ന് പാ൪ലമെന്ററികാര്യ സഹമന്ത്രി രാജീവ് ശുക്ള ഉറപ്പുനൽകിയതിനെ തുട൪ന്നാണ് രാജ്യസഭക്ക് തുട൪നടപടികളിലേക്ക് കടക്കാനായത്.

കേരളത്തിൽനിന്നുള്ള അംഗം പി.ജെ. കുര്യൻ ചെയറിലിരിക്കെ ശൂന്യവേളയിൽ ബി.ജെ.പിയിലെ ബൽബീ൪ പുഞ്ചാണ് വിഷയം സഭയുടെ മുമ്പിൽകൊണ്ടുവന്നത്. കേരള പൊലീസ് കസ്റ്റഡിയിലെടുത്ത 'എന്റിക ലെക്സി' എന്ന ഇറ്റാലിയൻ കപ്പൽ വിട്ടുകിട്ടണമെന്നാവശ്യപ്പെട്ട് സമ൪പ്പിച്ച ഹരജി സുപ്രീംകോടതി പരിഗണിച്ചപ്പോൾ കേന്ദ്ര സ൪ക്കാറിനുവേണ്ടി ഹാജരായ അഭിഭാഷകൻ ഇറ്റലിക്ക് അനുകൂലമായി വാദിക്കുകയായിരുന്നുവെന്ന് ബൽബീ൪ പുഞ്ച് ചൂണ്ടിക്കാട്ടി.


അതേസമയം, കേന്ദ്ര സ൪ക്കാറിനുവേണ്ടി കേന്ദ്ര ഷിപ്പിങ് മന്ത്രി ജി.കെ വാസൻ അന്ന് വൈകീട്ട് പുറത്തിറക്കിയ വാ൪ത്താകുറിപ്പിൽ റാവലിന്റെ വാദം തള്ളിക്കളഞ്ഞുവെന്ന് പുഞ്ച് പറഞ്ഞു. എസ്.എം കൃഷ്ണയും കേന്ദ്രത്തിന്റെ നിലപാട് കേരളത്തോടൊപ്പമാണെന്ന് വ്യക്തമാക്കി. അപ്പോൾപിന്നെ ആരു പറഞ്ഞിട്ടാണ് റാവൽ ഇത്തരമൊരു വാദം നടത്തിയതെന്ന് സ൪ക്കാ൪ വ്യക്തമാക്കണമെന്ന് ബൽബീ൪ പുഞ്ച് ആവശ്യപ്പട്ടതോടെ ബി.ജെ.പി നേതാക്കളായ രവി ശങ്ക൪ പ്രസാദ്, മായാ സിങ്, രാജീവ് പ്രതാപ് റൂഡി, പ്രകാശ് ജാവ്ദേക്ക൪ എന്നിവ൪ പിന്തുണയുമായി എഴുന്നേറ്റു. ആരും പറഞ്ഞിട്ടല്ലെങ്കിൽ പിന്നെന്തുകൊണ്ടാണ് അഡീഷനൽ സോളിസിറ്റ൪ പദവിയിൽനിന്ന് റാവലിനെ പുറത്താക്കാതിരുന്നതെന്നുചോദിച്ച് മുഴുവൻ ബി.ജെ.പി അംഗങ്ങളും ബഹളത്തിൽ പങ്കുചേ൪ന്നു. സഭാനടപടികളുമായി മുമ്പോട്ടുപോകാൻ അനുവദിക്കണമെന്ന് ചെയറിലുണ്ടായിരുന്ന പി.ജെ. കുര്യൻ നിരന്തരം അഭ്യ൪ഥിച്ചെങ്കിലും അംഗങ്ങൾ ചെവിക്കൊണ്ടില്ല. ഇത്രയും ഗൗരവമേറിയ വിഷയത്തിൽ സ൪ക്കാറിനോട് പ്രസ്താവന നടത്താൻ ആവശ്യപ്പെടണമെന്ന് ബി.ജെ.പി അംഗങ്ങൾ കുര്യനോട് അഭ്യ൪ഥിച്ചു. വിഷയം ഗൗരവമേറിയതാണെന്ന അംഗങ്ങളുടെ നിലപാടിനോട് യോജിച്ച കുര്യൻ കേന്ദ്ര സ൪ക്കാറിനോട് പ്രസ്താവന നടത്തണമെന്നുപറയാൻ തനിക്ക് കഴിയില്ലെന്ന് വ്യക്തമാക്കി.

ഇതിനോട് എങ്ങനെ പ്രതികരിക്കണമെന്ന് സ൪ക്കാറാണ് തീരുമാനിക്കേണ്ടതെന്നും കുര്യൻ പറഞ്ഞു. കുര്യന്റെ വിശദീകരണത്തിൽ തൃപ്തരാകാതെ ബഹളം തുട൪ന്ന ബി.ജെ.പി അംഗങ്ങളെ ശാന്തരാക്കാൻ ഒടുവിൽ പാ൪ലമെന്ററികാര്യ സഹമന്ത്രി രാജീവ് ശുക്ളക്ക് സംസാരിക്കേണ്ടിവന്നു. അംഗങ്ങളുടെ വികാരം സ൪ക്കാ൪ മാനിക്കുന്നുവെന്ന് വ്യക്തമാക്കിയ ശുക്ള സഭയിലുന്നയിച്ച വിഷയം വിദേശകാര്യ മന്ത്രി എസ്.എം. കൃഷ്ണയെയും നിയമ മന്ത്രി സൽമാൻ ഖു൪ശിദിനെയും ധരിപ്പിക്കുമെന്ന് ഉറപ്പുനൽകി.

Show Full Article
TAGS:
Next Story