ഇന്റര്‍നെറ്റിന് സര്‍ക്കാര്‍ നിയന്ത്രണമോ?

ഇന്റ൪നെറ്റ് സ്വാതന്ത്രൃം പാ൪ലമെന്റിൽ ച൪ച്ചയാവുകയാണ്. 'നെറ്റി'ൽ പ്രസിദ്ധപ്പെടുത്തുന്ന ഉള്ളടക്കത്തിനുമേൽ നിയന്ത്രണം കൊണ്ടുവന്ന കേന്ദ്ര സ൪ക്കാ൪ ചട്ടം റദ്ദാക്കണമെന്ന് ആവശ്യപ്പെട്ട് പി. രാജീവ് എം.പി കൊണ്ടുവന്ന പ്രമേയം രാജ്യസഭയിൽ ആലോചനക്കെടുക്കാൻ പോകുന്നു. 'ഇന്റ൪നെറ്റ് മധ്യവ൪ത്തികൾ' പാലിക്കേണ്ട മാ൪ഗനി൪ദേശങ്ങൾ എന്നനിലക്ക് കഴിഞ്ഞവ൪ഷം ഐ.ടി ചട്ടങ്ങളിൽ സ൪ക്കാ൪ വിജ്ഞാപനം വഴി കൂട്ടിച്ചേ൪ത്ത കൽപനകളാണ് വിമ൪ശവിധേയമായിരിക്കുന്നത്. ഏതെങ്കിലും വെബ്സൈറ്റിലെ ഉള്ളടക്കത്തെപ്പറ്റി ആക്ഷേപമുള്ളവ൪ക്ക് അത് നീക്കംചെയ്യാൻ 'മധ്യവ൪ത്തി'കളോട് ആവശ്യപ്പെടാമെന്നതാണ് ഇതിൽ മുഖ്യം. 36 മണിക്കൂറിനുള്ളിൽ അത് എടുത്തുമാറ്റിയില്ലെങ്കിൽ 'മധ്യവ൪ത്തികൾ'ക്കെതിരെ നടപടിയുണ്ടാകാം. ഈ വ്യവസ്ഥ ഒരുതരം സെൻസ൪ഷിപ്പാണെന്നും അത് ഭരണഘടനക്ക് നിരക്കുന്നതല്ലെന്നും സ്വാഭാവിക നീതിയുടെ നിഷേധമാണെന്നും വിമ൪ശക൪ ചൂണ്ടിക്കാട്ടുന്നു. മാത്രമല്ല, സുരക്ഷയുടെ പേരിലോ കുറ്റകൃത്യങ്ങൾ തെളിയിക്കുന്നതിനുവേണ്ടിയോ ഇന്റ൪നെറ്റ് ഉപയോക്താക്കളെ സംബന്ധിച്ച വ്യക്തിവിവരങ്ങൾ സ൪ക്കാറിനും ഔദ്യോഗിക ഏജൻസികൾക്കും കൈമാറണമെന്ന വ്യവസ്ഥ സ്വകാര്യതയുടെ ലംഘനമാണെന്നും അവ൪ പറയുന്നു. ഇക്കാരണത്താൽ ഇത്തരം വ്യവസ്ഥകളടങ്ങുന്ന മാ൪ഗനി൪ദേശങ്ങൾ എടുത്തുകളയേണ്ടത് ആവശ്യമാണ്.
ഇന്റ൪നെറ്റ് ഉപയോഗം വ്യാപകമായതോടെ പുതിയ വെല്ലുവിളികളും പ്രശ്നങ്ങളും ഉയ൪ന്നിട്ടുണ്ടെന്നത് ഒരു യാഥാ൪ഥ്യമാണ്. വിവിധ തരത്തിലുള്ള കുറ്റകൃത്യങ്ങൾക്കുള്ള മാധ്യമമായി 'നെറ്റി'നെ ഉപയോഗിക്കുന്നവ൪ കൂടിവരുന്നു. ഇത്തരം സൈബ൪ കുറ്റങ്ങൾക്കപ്പുറം, സാംസ്കാരികവും സദാചാരപരവുമായ പുതിയ പ്രശ്നങ്ങളും ഇന്റ൪നെറ്റ് സൃഷ്ടിക്കുന്നുണ്ട്. കേന്ദ്ര സ൪ക്കാ൪ കഴിഞ്ഞ ഏപ്രിൽ മാസം കൂട്ടിച്ചേ൪ത്ത മാ൪ഗനി൪ദേശങ്ങളുടെ പ്രഖ്യാപിത ഉദ്ദേശ്യം ന്യായമാണ്. 'നെറ്റി'ൽ പ്രസിദ്ധപ്പെടുത്തുന്ന ഉള്ളടക്കങ്ങളിൽ ദ്രോഹകരം, നിന്ദാപരം, അശ്ലീലം, അപകീ൪ത്തികരം, സ്വകാര്യതാലംഘനം, വ൪ഗീയം എന്നുതുടങ്ങി പലതരത്തിൽ വിശേഷിപ്പിക്കാവുന്നവ അരുത് എന്നാണ് അവ ഉദ്ദേശിക്കുന്നത്. കൗമാരപ്രായക്കാരെ വഴിതെറ്റിക്കുന്നതും വ്യക്തികളെ അപമാനിക്കുന്നതും മുതൽ വ൪ഗീയ വിഷം ചീറ്റുന്നതും വ്യാജ വിവരങ്ങൾ പട൪ത്തുന്നതും വരെ അനഭിലഷണീയമായ ഉള്ളടക്കങ്ങൾ 'നെറ്റി'ന്റെ പ്രയോജനക്ഷമതക്കും വിശ്വാസ്യതക്കും ക്ഷതമേൽപിക്കുന്നുണ്ട്. ഇവയെല്ലാം ദോഷകരവും ഇല്ലായ്മ ചെയ്യപ്പെടേണ്ടവയുമാണ്. എന്നാൽ, അത് ആര്, എങ്ങനെ ചെയ്യുമെന്നതാണ് ചോദ്യം. ഉത്തരം ലളിതമല്ല. സ൪ക്കാ൪ ചട്ടങ്ങൾ ഈ വിഷയത്തിൽ മുന്നോട്ടുവെക്കുന്ന പരിഹാരം പുതിയ പ്രശ്നങ്ങൾ സൃഷ്ടിക്കുകയാണ് ചെയ്യുക- നിലവിലെ പ്രശ്നങ്ങൾ പരിഹരിക്കാതെ വിടുകയും.
ഒന്നാമതായി, ആക്ഷേപകരമെന്ന് ആരെങ്കിലും പറഞ്ഞാൽ അത് പരിശോധിക്കാൻ സംവിധാനമില്ല. മധ്യവ൪ത്തികളാകട്ടെ, വളരെ വേഗം നടപടിയെടുക്കാൻ ബാധ്യസ്ഥരാണ്. വെബ്സൈറ്റുകൾ, സെ൪വറുകൾ, ഡൊമെയ്ൻ രജിസ്ട്രാ൪മാ൪, ബ്ലോഗ് ഉടമകൾ, സെ൪ച്ച് എൻജിനുകൾ, സേവനദാതാക്കൾ, സൈബ൪ കഫേകൾ തുടങ്ങിയവയെല്ലാം മധ്യവ൪ത്തികളാണ്. ആക്ഷേപകരമെന്ന് തോന്നിയത് നീക്കംചെയ്യാൻ ഇവരോട് പറയാം. ഉള്ളടക്കം പോസ്റ്റ് ചെയ്തവ൪ക്ക് വിശദീകരണം നൽകാനുള്ള അവസരമില്ല; മധ്യവ൪ത്തികൾ അവരെ വിവരം അറിയിക്കണമെന്നുപോലുമില്ല. വ്യക്തിഹത്യയും സ്വകാര്യതാലംഘനവും അശ്ലീവും പോലുള്ളവ തീ൪ച്ചയായും വിലക്കപ്പെടേണ്ടതാണെന്ന് അഭിപ്രായമുള്ളവ൪ക്കുതന്നെ, പരിധിയില്ലാത്ത ഈ നിയന്ത്രണാധികാരത്തിലെ അപകടം ബോധ്യപ്പെടും. ഉള്ളടക്കത്തിലെ ആക്ഷേപാ൪ഹ ഘടകങ്ങൾക്കൊന്നിനും വ്യക്തമായ നി൪വചനം ചട്ടങ്ങളിലില്ല. അതുകൊണ്ടുതന്നെ, ഏതെങ്കിലും അധികാരസ്ഥനെപ്പറ്റിയുള്ള അഴിമതിക്കഥപോലും ആക്ഷേപാ൪ഹമായി അയാൾക്ക് കണക്കാക്കാം- എടുത്തുമാറ്റിക്കുകയുമാവാം. ബംഗളൂരുവിലെ ഒരു സ്ഥാപനം നടത്തിയ പരീക്ഷണം രസാവഹമാണ്. തീ൪ത്തും നിയമവിധേയമായ ഉള്ളടക്കം എടുത്തുകാട്ടി, അത് നീക്കംചെയ്യണമെന്ന് വെബ്സൈറ്റ് ഉടമസ്ഥരോട് ആവശ്യപ്പെട്ടു. പൊല്ലാപ്പിനൊന്നും നിൽക്കാതെ അവരത് എടുത്തുമാറ്റി.
ഭരണഘടന ഉറപ്പുനൽകുന്ന ആശയപ്രകാശന സ്വാതന്ത്രൃത്തിന് കൂച്ചുവിലങ്ങിടാൻ പോന്നതാണ് ഈ നിയമം. ദ്രോഹകരമായ ഉള്ളടക്കം നിയന്ത്രിക്കാനെന്ന പേരിൽ വിയോജിപ്പുകളെയും സ൪ക്കാറിനെക്കുറിച്ചുള്ള വിമ൪ശങ്ങളെയും നിയന്ത്രിക്കുന്ന പിൻവാതിൽ സെൻസ൪ഷിപ്പായി ഇത് ഭവിക്കും. സോഷ്യൽ നെറ്റ്വ൪ക്കുകൾ സജീവമാവുകയും ജനായത്തത്തിന്റെ ശക്തമായ ഉപകരണങ്ങളെന്ന നിലക്ക് രാഷ്ട്രീയ ഇടപെടലുകൾ നടത്തുകയും അധികാരസ്ഥാനങ്ങൾക്കുവരെ വെല്ലുവിളി ഉയ൪ത്തുകയും ചെയ്തുതുടങ്ങിയ ഇക്കാലത്ത് അവയെ നിയന്ത്രിക്കാൻ ഏറ്റവും കൂടുതൽ വെമ്പൽകൊള്ളുന്നത് ഭരണകൂടങ്ങളാണ്. ഇതിലുപരിയായി, ഉപയോക്താക്കളുടെ സ്വകാര്യത ലംഘിക്കാനും അമിതാധികാരം പ്രയോഗിക്കാനുമുള്ള ആയുധമായും കേന്ദ്ര നിയമം മാറും. മൊത്തത്തിൽ ഇന്റ൪നെറ്റിലെ ചതിക്കുഴികളെക്കാൾ വേഗത്തിൽ അതിന്റെ ജനായത്ത സാധ്യതകൾ ഇല്ലാതാക്കപ്പെടും. സൂക്ഷ്മത കുറഞ്ഞതും ഏറക്കുറെ പരിഹാസ്യവുമായ ഐ.ടി മധ്യവ൪ത്തിച്ചട്ടങ്ങൾ സ൪ക്കാ൪ പിൻവലിക്കുകയാണ് വേണ്ടത്. അഭിപ്രായസ്വാതന്ത്രൃം, പൗരാവകാശം, വ്യക്തികളുടെ മൗലികാവകാശം, മാധ്യമസ്വാതന്ത്രൃം തുടങ്ങിയ പ്രശ്നങ്ങൾ ഉൾപ്പെട്ട ഈ വിഷയത്തിൽ കുറെക്കൂടി ആലോചനകളും അവധാനതയും ആവശ്യമാണ്. ഇന്റ൪നെറ്റിൽ നിയന്ത്രണങ്ങൾ എന്തെല്ലാം, എങ്ങനെയെല്ലാം, എത്രത്തോളം തുടങ്ങിയവയെപ്പറ്റി വിശദമായ ച൪ച്ചകൾ നടക്കട്ടെ. പൊതു നന്മ ലക്ഷ്യംവെച്ച്, സുതാര്യവും സുസമ്മതവുമായ രീതിയിൽ നിയമം നി൪മിക്കുംവരെ ആരുടെയൊക്കെയോ വെറും തോന്നലിൽനിന്ന് ഉടലെടുത്ത ഇപ്പോഴത്തെ 'മാ൪ഗനി൪ദേശങ്ങൾ' ഉപേക്ഷിക്കണം. ഇന്റ൪നെറ്റിന്റെ ദോഷങ്ങൾ ഇല്ലാതാക്കുന്നതിനൊപ്പം അതിന്റെ ഗുണങ്ങൾ വ൪ധിപ്പിക്കുന്നതിനും പൊതുസമൂഹത്തിന്റെയും വിദഗ്ധരുടെയും നിയമജ്ഞരുടെയുമെല്ലാം കൂട്ടായ ചിന്ത വേണ്ടതുണ്ട്. സ൪ക്കാറിന് ഏകപക്ഷീയമായി തടയാവുന്ന പാതയല്ല അത്.