ജില്ലാ പഞ്ചായത്ത് വീണ്ടും അവാര്‍ഡിന്‍െറ തിളക്കത്തില്‍

കാസ൪കോട്: പ്രവ൪ത്തന മികവിൽ കാസ൪കോട് ജില്ലാ പഞ്ചായത്തിൻെറ ശിരസ്സിൽ മറ്റൊരു പൊൻതൂവൽ കൂടി. സംസ്ഥാന സ൪ക്കാറിൻെറ മികച്ച ജില്ലാ പഞ്ചായത്തിനുള്ള സ്വരാജ് ട്രോഫി അവാ൪ഡാണ് ശനിയാഴ്ച ജില്ലാ പഞ്ചായത്തിനെ തേടിയെത്തിയത്. ജില്ലാ പഞ്ചായത്തിന് ഈ വ൪ഷം ലഭിക്കുന്ന മൂന്നാമത്തെ അവാ൪ഡാണിത്.
ഏറ്റവും മികച്ച ജില്ലാ പഞ്ചായത്തിനുള്ള ദേശീയ അവാ൪ഡിന് ഒരാഴ്ച മുമ്പാണ് കാസ൪കോട് അ൪ഹമായത്. 2010-11 സാമ്പത്തിക വ൪ഷത്തെ പ്രവ൪ത്തന മികവിനായിരുന്നു കേന്ദ്രസ൪ക്കാറിൻെറ പഞ്ചായത്ത് എംപവ൪മെൻറ് ആൻഡ് അക്കൗണ്ടബിലിറ്റി ഇൻസെൻറീവ് സ്കീം (പി.ഇ.എ.ഐ.ഡി) അവാ൪ഡ് ലഭിച്ചത്. 25 ലക്ഷം രൂപയാണ് അവാ൪ഡ് തുക. ജില്ലയിലെ എല്ലായിടങ്ങളിലും ശുചിത്വ സൗകര്യവും പൊതു കക്കൂസുകളും ഗാ൪ഹിക കക്കൂസുകളും സ്ഥാപിച്ചതിന് നി൪മൽ പുരസ്കാരം ആഴ്ചകൾക്ക് മുമ്പാണ് ജില്ലാ പഞ്ചായത്തിനെ തേടിയെത്തിയത്.
2010-11 വ൪ഷം പൊതുവിഭാഗത്തിൽ 81 ശതമാനവും പട്ടികജാതി-വ൪ഗ മേഖലയിൽ 91 ശതമാനവും പദ്ധതി നി൪വഹണത്തിൽ ചെലവഴിച്ചു. ഉൽപാദന-പശ്ചാത്തല മേഖലകളിൽ 95 ശതമാനവും ചെലവഴിക്കാൻ ജില്ലാ പഞ്ചായത്തിനായി. 2011-12ലും മുൻവ൪ഷത്തെ നേട്ടം നിലനി൪ത്താനായതാണ് ജില്ലാ പഞ്ചായത്തിനെ തേടി അവാ൪ഡുകളുടെ നിരതന്നെ എത്താനിടയാക്കിയത്. ഭരണ സമിതി യോഗ നടത്തിപ്പിലെ മികവും ജില്ലയിൽ നടപ്പാക്കിയ നൂതന പദ്ധതികളുമാണ് മൂന്ന് അവാ൪ഡുകൾക്കും പരിഗണിച്ച പ്രത്യേക മേഖലകൾ.
ഭരണസമിതിയുടെയും നി൪വഹണ ഉദ്യോഗസ്ഥരുടെയും കൂട്ടായ്മയാണ് ജില്ലയെ അവാ൪ഡുകൾക്ക് അ൪ഹമാക്കിയതെന്ന് പഞ്ചായത്ത് പ്രസിഡൻറ് അഡ്വ. പി.പി. ശ്യാമളാദേവി പറഞ്ഞു.