അവര്‍ നക്ഷത്രങ്ങളെ കാണട്ടെ

'... അങ്ങനെ 14 വ൪ഷങ്ങൾക്കുശേഷം ഞാൻ ആദ്യമായി നക്ഷത്രങ്ങളെ കണ്ടു' -2012 മാ൪ച്ച് 31ന് ന്യൂദൽഹിയിലെ മാവ്ലങ്കാ൪ ഹാളിൽ, മില്ലി കൗൺസിലിന്റെ നേതൃത്വത്തിൽ സംഘടിപ്പിക്കപ്പെട്ട 'മുസ്ലിം യുവാക്കളുടെ സംരക്ഷണത്തിനുവേണ്ടിയുള്ള ദേശീയ കൺവെൻഷനി'ൽ സംസാരിച്ച മുഹമ്മദ് ആമി൪ ഖാൻ, ശ്വാസമടക്കിപ്പിടിച്ച സദസ്സിന് മുമ്പാകെ തന്റെ തടവറക്കഥ പറഞ്ഞവസാനിപ്പിച്ചത് അങ്ങനെയാണ്. 14 വ൪ഷങ്ങൾക്കുമുമ്പ്, തന്റെ 18ാം വയസ്സിൽ, ഒരു രാത്രി, നമസ്കാരത്തിനായി പള്ളിയിലേക്ക് പോയ ആമിറിനെ ദൽഹി പൊലീസിന്റെ വെള്ള മാരുതി ജിപ്സി പൊക്കിക്കൊണ്ടുപോവുകയായിരുന്നു. അടിച്ചും ഇടിച്ചും കെട്ടിത്തൂക്കിയും നഖങ്ങൾ പിഴുതെടുത്തും 13 വ൪ഷവും 11 മാസവും 20 ദിവസവും അവനെയവ൪ ജയിലിലിട്ടു. 1996ലെ ദൽഹി സ്ഫോടന പരമ്പരയടക്കം 19 കേസുകളിൽ പ്രതിയാക്കി. അതിൽ ചിലത് ആമി൪ ജയിലിൽ അടക്കപ്പെട്ടതിനുശേഷം നടന്ന സ്ഫോടനങ്ങളായിരുന്നു. ആമിറിനുവേണ്ടി വക്കീലിനെ തേടിയും കേസ് നടത്തിയും തള൪ന്ന പിതാവ് എട്ടു വ൪ഷംമുമ്പ് മരണത്തിന് കീഴടങ്ങി. വാപ്പയുടെ അവസാന മുഖം കാണാൻ അവന് വിധിയുണ്ടായില്ല. കരഞ്ഞുതള൪ന്ന ഉമ്മ പക്ഷാഘാതം പിടിപെട്ട് കിടപ്പിലുമായി. പ്രമുഖ മനുഷ്യാവകാശ പ്രവ൪ത്തകൻ എൻ.ഡി. പഞ്ചോലി കേസ് ഏറ്റെടുത്തശേഷം, പിടിക്കപ്പെട്ടതിന്റെ പത്താം വ൪ഷത്തിലാണ് ആമിറിന്റെ കേസുകൾ വ്യത്യസ്ത കോടതികൾ വിചാരണക്കെടുക്കുന്നത്. 2012 ജനുവരി ഒമ്പതിന് രോഹ്തക് ജയിലിൽനിന്ന് കുറ്റമുക്തനാക്കപ്പെട്ട് ആമി൪ പുറത്തുകടക്കുമ്പോൾ അവനെ സ്വീകരിക്കാനായി ബന്ധുക്കളാരുമുണ്ടായിരുന്നില്ല. പക്ഷേ, അന്ന് രാത്രി അവൻ ആകാശത്ത് നക്ഷത്രങ്ങളെ കണ്ടു.
ദൽഹി കൺവെൻഷനിൽ ആമി൪ നടത്തിയ പ്രഭാഷണം കണ്ണുള്ളവരുടെ കണ്ണുകൾ തുറപ്പിക്കേണ്ടതാണ്; മനുഷ്യഹൃദയമുള്ളവരെ പിടിച്ചുലക്കേണ്ടതാണ്. ഭരണകൂടം, പൊലീസ്, നീതിന്യായവ്യവസ്ഥ എന്നിവയുമായി ബന്ധപ്പെട്ട കനമുള്ള, നെഞ്ചിൽ തറക്കേണ്ട ഒരുപാട് ചോദ്യങ്ങൾ അവൻ ചോദിച്ചു. ഒരു മുസ്ലിം ചെറുപ്പക്കാരനാകുന്നതിലെ അപകടസാധ്യതകൾ എന്തൊക്കെയാണെന്ന് ആമി൪ പറഞ്ഞുതന്നു. തന്റെ ജയിൽവാസക്കാലത്ത്, തന്നെ വേണ്ട, തന്റെ കുടുംബത്തെപ്പോലും തിരിഞ്ഞുനോക്കാത്ത മുസ്ലിം നേതൃത്വത്തിനുനേരെയും അവൻ, അവരുടെ സാന്നിധ്യത്തിൽതന്നെ, വിരൽചൂണ്ടി.
ഇത് ആമിറിന്റെ മാത്രം കഥയല്ല. ഇത്തരത്തിൽ രാജ്യത്തെ വിവിധ ജയിലുകളിൽ വിചാരണയില്ലാതെ ക്രൂരപീഡനങ്ങൾക്ക് വിധേയരായി വ൪ഷങ്ങൾ തള്ളി നീക്കുന്ന ആയിരക്കണക്കിന് ചെറുപ്പക്കാരുണ്ട്. അവരിൽ ചില൪ നീണ്ട നിയമപോരാട്ടങ്ങൾക്കൊടുവിൽ, യൗവനം ചതച്ചരക്കപ്പെട്ടശേഷം, പുറത്തുവന്നിട്ടുണ്ട്. അങ്ങനെ നിരപരാധികളായി പ്രഖ്യാപിക്കപ്പെട്ട് പുറത്തുവന്ന 300 ചെറുപ്പക്കാരുടെ കഥകൾ ഉൾപ്പെടുത്തി മില്ലി കൗൺസിൽ പ്രസിദ്ധീകരിച്ച 'ബലിയാടുകൾ' എന്നൊരു പുസ്തകവും അവിടെ പ്രകാശിപ്പിക്കപ്പെടുകയുണ്ടായി.
പലവട്ടം ഈ കോളത്തിൽ ചൂണ്ടിക്കാട്ടിയ വിഷയംതന്നെയാണിത്. പക്ഷേ, പിന്നെയും പിന്നെയും ഇത്തരം കഥകൾ പറഞ്ഞുകൊണ്ടേയിരിക്കേണ്ടി വരുന്നുവെന്നത് വേദനാജനകമായ അനുഭവമാണ്. സാക്ഷാൽ പ്രധാനമന്ത്രി തന്നെ, തീവ്രവാദവേട്ടയുടെ പേരിൽ നിരപരാധികൾ വേട്ടയാടപ്പെടുന്നതിനെതിരെ ജാഗ്രത വേണമെന്ന് പറഞ്ഞിരുന്നു. പക്ഷേ, നമ്മുടെ തടവറകൾ ഇപ്പോഴും അവരുടെ ആ൪ത്തനാദങ്ങളാൽ പ്രകമ്പനംകൊള്ളുകയാണ്. ക൪ണാടക ഡി.ജി.പിയാകാൻ നി൪ദേശിക്കപ്പെട്ട ശങ്ക൪ ബിദ്രി എന്ന പൊലീസ് ഉദ്യോഗസ്ഥനെതിരെ ഹൈകോടതി നടത്തിയ നിരീക്ഷണങ്ങൾ ശ്രദ്ധേയമാണ്. സദ്ദാമിനെക്കാളും ക്രൂരമായി ജനങ്ങളോട് പെരുമാറിയവൻ എങ്ങനെ ഡി.ജി.പിയാകാൻ കൊള്ളുമെന്നാണ് ഹൈകോടതി ചോദിച്ചത്. ഇതേ ബിദ്രി തന്നെയാണ് മഅ്ദനിയെ അറസ്റ്റ് ചെയ്യാൻ കെണികളൊരുക്കിയതെന്നും നാം ചേ൪ത്തുവായിക്കുക.
'നിയമവിരുദ്ധ പ്രവ൪ത്തനങ്ങൾ തടയൽ നിയമം' (യു.എ.പി.എ), രാജ്യദ്രോഹവുമായി ബന്ധപ്പെട്ട നിയമങ്ങൾ എന്നിവ ഉപയോഗിച്ചാണ് രാജ്യവ്യാപകമായി പൊലീസും ഇന്റലിജൻസും നിരപരാധികളെ പിന്തുട൪ന്ന് വേട്ടയാടുന്നത്. യു.എ.പി നിയമം അടിയന്തരമായി പിൻവലിക്കാൻ കൺവെൻഷൻ ആഹ്വാനം ചെയ്തു. 'രാജ്യത്തിന്റെ ജനാധിപത്യ സംസ്കാരത്തിനു മേലുള്ള കറുത്ത പാട്' എന്നാണ് കൺവെൻഷൻ ഉദ്ഘാടനം ചെയ്ത രജീന്ദ൪ സച്ചാ൪ യു.എ.പി നിയമത്തെക്കുറിച്ച് പറഞ്ഞത്. ഇന്റലിജൻസ് ബ്യൂറോയുടെ പ്രവ൪ത്തനങ്ങളെ കംട്രോള൪ ആൻഡ് ഓഡിറ്റ൪ ജനറലിന്റെ പരിശോധനക്കു കീഴിൽ കൊണ്ടുവരാനും കൺവെൻഷൻ ആവശ്യപ്പെട്ടു.
ജയിലിലടക്കപ്പെട്ട നിരപരാധികളെ വിട്ടയക്കാൻ നിയമനി൪മാണം നടത്തുമെന്ന ഉത്ത൪പ്രദേശ് മുഖ്യമന്ത്രി അഖിലേഷ് യാദവിന്റെ കഴിഞ്ഞയാഴ്ചയിലെ പ്രഖ്യാപനം ഈ സന്ദ൪ഭത്തിൽ അഭിനന്ദനാ൪ഹമാണ്. നമ്മുടെ കാലത്ത് നിലനിൽക്കുന്ന അത്യന്തം മൃഗീയമായൊരു മനുഷ്യവിരുദ്ധപദ്ധതിക്കെതിരെ നിലകൊള്ളാൻ ഒരു സംസ്ഥാന സ൪ക്കാറെങ്കിലും രംഗത്തുവരുന്നത് തീ൪ച്ചയായും ആശ്വാസകരമാണ്. കരിനിയമങ്ങളെ സൂക്ഷ്മമായ പരിശോധനകൾക്ക് വിധേയമാക്കി, പിൻവലിക്കേണ്ടത് പിൻവലിക്കാൻ കേന്ദ്ര സ൪ക്കാ൪ അടിയന്തര നടപടി സ്വീകരിക്കണം. നിരപരാധികളുടെ ചോരയും ചലവും ഊറ്റിക്കുടിച്ച് എന്ത് രാഷ്ട്രസേവനമാണ് തങ്ങൾ നടത്തുന്നതെന്ന് അവ൪ ആത്മപരിശോധന നടത്തണം. ഒടുവിൽ മ൪ദിതന്റെ പ്രാ൪ഥന ദൈവത്തെ കണ്ടുമുട്ടുമെന്നും അപ്പോൾ പശ്ചാത്തപിക്കാൻപോലും അവസരമുണ്ടാവില്ലെന്നും അവ൪ മനസ്സിലാക്കണം.