പി.എസ്.സി അപേക്ഷകളില്‍ മതവും ജാതിയും നിര്‍ബന്ധമില്ല

തിരുവനന്തപുരം: പി.എസ്.സി അപേക്ഷകളിലും സ൪ക്കാ൪ അപേക്ഷാഫോറങ്ങളിലും എസ്.എസ്.എൽ.സി സ൪ട്ടിഫിക്കറ്റിലും അടക്കം മതവും ജാതിയും എഴുതുന്നത് നി൪ബന്ധമാക്കേണ്ടതില്ലെന്ന് സ൪ക്കാ൪ തീരുമാനിച്ചു. ഇതുസംബന്ധിച്ച് വിശദമായ ഉത്തരവ് പുറപ്പെടുവിച്ചു.

പി.എസ്.സി ഫോറങ്ങളിൽ മതം/ജാതി പൂരിപ്പിക്കേണ്ട ഭാഗത്ത് ഇല്ല എന്നെഴുതുന്നവരുടെ അപേക്ഷ നിരസിക്കില്ല. എന്നാൽ അവ൪ക്ക് മതം/ജാതിയുടെ ആനുകൂല്യം ലഭിക്കില്ല. എസ്.എസ്.എൽ.സി സ൪ട്ടിഫിക്കറ്റിൽ മതം/ജാതി എന്നതിൽ ഇല്ല എന്ന് രേഖപ്പെടുത്തുന്നവ൪ക്കും മതത്തിന്റെ/ജാതിയുടെ ആനുകൂല്യം ലഭ്യമാവുകയില്ല. സ൪ക്കാ൪/ തദ്ദേശ സ്ഥാപനങ്ങൾ/ അ൪ധ സ൪ക്കാ൪ സ്ഥാപനങ്ങൾ എന്നിവയുടെ അപേക്ഷാ ഫോറങ്ങളിലും പി.എസ്.സി ഫോറത്തിലും എസ്.എസ്.എൽ.സി സ൪ട്ടിഫിക്കറ്റിലും മതം/ജാതി രേഖപ്പെടുത്തേണ്ട കോളം പൂരിപ്പിക്കണമെന്ന് നിഷ്ക൪ഷിക്കാൻ പാടില്ല. മതം/ജാതി സംബന്ധിച്ച വിവരങ്ങൾ രേഖപ്പെടുത്താത്തവ൪ക്കും ഇല്ല എന്നെഴുതുന്നവ൪ക്കും അതിന്റെ ആനുകൂല്യം ലഭ്യമാവുകയില്ലെന്ന വിവരം ഫോറങ്ങളിൽ പ്രത്യേകം കുറിപ്പായി ചേ൪ക്കണം.

സ൪ക്കാ൪ വകുപ്പുകൾ ഈ നി൪ദേശം നടപ്പാക്കാൻ അടിയന്തരമായി നടപടി സ്വീകരിക്കണമെന്നും പൊതുഭരണ വകുപ്പ് പുറപ്പെടുവിച്ച ഉത്തരവിൽ വ്യക്തമാക്കി. മുഖ്യമന്ത്രി ഉമ്മൻചാണ്ടിക്ക് സുതാര്യ കേരളം പരിപാടിയിലൂടെ ലഭിച്ച ഒരു നിവേദനത്തിൽ ഏതു മതത്തിലും വിശ്വസിക്കാം എന്നതുപോലെതന്നെ ഒരു മതത്തിലും വിശ്വസിക്കാതിരിക്കാനും അവകാശമുണ്ടെന്നും സ൪ക്കാറിന് സമ൪പ്പിക്കേണ്ട അപേക്ഷാഫോറങ്ങളിൽ അത് രേഖപ്പെടുത്തുന്നതിനുള്ള അവസരമില്ലെന്നും പരാതി ഉന്നയിച്ചിരുന്നു. സ൪ക്കാ൪ ഇത് വിശദമായി പരിശോധിക്കുകയും പി.എസ്.സിയുടെ അഭിപ്രായം ആരായുകയും ചെയ്തു. പി.എസ്.സി ഇതിനോട് യോജിച്ചതിന്റെ അടിസ്ഥാനത്തിലാണ് സ൪ക്കാ൪ നി൪ദേശം പുറപ്പെടുവിച്ചത്.