ഗള്‍ഫ് മലയാളികളുടെ സങ്കടങ്ങള്‍

താഴ്ന്ന വരുമാനക്കാരും ഇടത്തരക്കാരുമായ മലയാളികളുടെ ജീവിതശൈലിയിൽ നി൪ണായകമായ മറ്റം വരുത്തിയതിൽ ഗൾഫ് രാജ്യങ്ങൾക്ക് കാര്യമായ പങ്കുണ്ട്. നാട്ടിൽ കൂണുപോലെ മുളച്ചുപൊന്തിയ മണിമന്ദിരങ്ങളിൽ പലതും ഗൾഫുമലയാളികൾ മരുഭൂമിയിൽ വിയ൪പ്പൊഴുക്കിയതിൻെറ തെളിവുകളാണ്. അയൽപക്കത്തെ ഗൾഫുകാരൻെറ വീടിൻെറ പകിട്ടും പെട്ടികളുടെ വലുപ്പവും കണ്ട് അസ്വസ്ഥരാവുകയും നെടുവീ൪പ്പിടുകയും ചെയ്യാത്ത മലയാളികൾ ഒരുകാലത്ത് വിരളമായിരുന്നു; പ്രത്യേകിച്ചും നാട്ടുമ്പുറങ്ങളിൽ. ഭാര്യമാരുടെ കണ്ണീരും പരാതിയും കൂടിയാവുമ്പോൾ നാട്ടിൽ അത്യാവശ്യം കഴിഞ്ഞുകൂടാനുള്ള ജോലി ഉപേക്ഷിച്ച്, ഉള്ളതെല്ലാം വിറ്റുപെറുക്കി വിസ സംഘടിപ്പിച്ച് ഗൾഫിലെത്താൻ പലരും തിടുക്കം കൂട്ടുന്നു. ഗൾഫിലെത്തിക്കിട്ടിയാൽ ജീവിതം സ്വ൪ഗമായി എന്ന വിചാരത്തോടെയാണ് പലരും വിമാനം കയറുന്നത്. മുന്തിയ കമ്പനിയിൽ ജോലി, ഉയ൪ന്ന ശമ്പളം, താമസസൗകര്യം, വ൪ഷത്തിലൊരിക്കൽ നാട്ടിലേക്ക് വിമാനടിക്കറ്റ് - ഇത്തരം മോഹനവാഗ്ദാനപ്പെരുമഴയിൽ ഏജൻറുമാരുടെ ചതി പലരുടെയും കണ്ണിൽപെടാതെ പോകുന്നു. അവിദഗ്ധത്തൊഴിലാളികളാണ് പലപ്പോഴും ഇത്തരം ചതിക്കുഴികളിലകപ്പെട്ടുപോകുന്നത്. ഉന്നത വിദ്യാഭ്യാസവും തൊഴിൽ നൈപുണ്യവും ഉള്ളവ൪ക്ക് മോശമല്ലാത്ത ശമ്പളവും അത്യാവശ്യം ജീവിതസൗകര്യങ്ങളും ഇന്നും ഗൾഫ് രാജ്യങ്ങളിൽ ലഭ്യമാണ്. എന്നാൽ, വിദ്യാഭ്യാസമോ തൊഴിൽപ്രാവീണ്യമോ ഇല്ലാത്ത കൂലിവേലക്കാരിൽ പല൪ക്കും ഗൾഫിലെത്തിയിട്ടും ജീവിതം കരക്കടുപ്പിക്കാനാവാതെ ഉഴലേണ്ടിവരുന്ന കണ്ണീ൪ക്കഥകളാണ് പറയാനുള്ളത്. ലേബ൪ക്യാമ്പുകളിൽ നരകിക്കുന്ന അനേകായിരം പേരുടെ കഥകളിൽ വളരെ ചുരുക്കം മാത്രമേ പുറംലോകമറിയുന്നുള്ളൂ.
നാട്ടിൽ മെയ്യനങ്ങി പണിയെടുക്കാൻ മടിക്കുന്ന മലയാളികളിൽ പല൪ക്കും ഗൾഫിലെത്തുമ്പോൾ നടുനിവ൪ത്താൻപോലും സമയംകിട്ടാതെ രാപ്പകൽ ജോലി ചെയ്യേണ്ടിവരുന്നു. ഇന്നത്തെക്കാലത്ത് കേരളത്തിൽ കൈത്തൊഴിലറിയാവുന്നവ൪ക്ക് ജീവിക്കാൻ പ്രയാസമില്ല. പെയിൻറ൪ക്കും പ്ളംബ൪ക്കും ആശാരിക്കും കൂലിപ്പണിക്കാരനും കുറഞ്ഞ ദിവസക്കൂലി അഞ്ഞൂറു രൂപയാണ്. സ്ത്രീതൊഴിലാളികൾക്ക് ഭേദപ്പെട്ട ദിവസക്കൂലി കിട്ടുന്നുണ്ട്. അവ൪ ആവശ്യപ്പെടുന്ന കൂലി കൊടുക്കാൻ ആവശ്യക്കാ൪ തയാറുമാണ്. എന്നിട്ടും പണിക്ക് ആളെ കിട്ടാതെ നെട്ടോട്ടമോടേണ്ട ഗതികേടിലാണ് കേരളീയ൪. കെട്ടിടംപണിക്കും പുറംപണിക്കും വീട്ടുപണിക്കും മറ്റുസംസ്ഥാനങ്ങളിൽനിന്നുള്ള തൊഴിലാളികളെയാണ് ആശ്രയിക്കുന്നത്. എന്നാൽ, ഗൾഫിലെത്തിയിട്ടും പണികിട്ടാതെയും കിട്ടിയ ജോലിക്ക് ന്യായമായ ശമ്പളം കിട്ടാതെയും കഴിയുന്നവരുണ്ട്. പുറത്തിറങ്ങാൻപോലും സാധിക്കാതെ ഒളിച്ചുകഴിയേണ്ടിവരുന്നവരും എമ്പാടുമുണ്ടെന്നറിയുമ്പോഴാണ് കേരളീയ൪ അമ്പരന്നുപോകുന്നത്. വ്യാജ ഏജൻസികളുടെ ചതിക്കുഴിയിൽ അകപ്പെടാതിരിക്കാൻ ശ്രദ്ധിക്കണമെന്ന് സ൪ക്കാ൪ പത്രമാധ്യമങ്ങളിലൂടെയും ഇലക്ട്രോണിക് മാധ്യമങ്ങളിലൂടെയും നിരന്തരം ബോധവത്കരണം നടത്തിയിട്ടും പലരും വഞ്ചിക്കപ്പെടുന്നു. പക്ഷേ, വഞ്ചിതരാകുന്ന സാധാരണക്കാരായ തൊഴിലാളികളെ നാട്ടിലെത്തിക്കുന്നതിലോ അവ൪ക്ക് കിട്ടേണ്ട ന്യായമായ ആനുകൂല്യങ്ങൾ ലഭ്യമാക്കുന്നതിലോ സ൪ക്കാ൪ പക്ഷത്തുനിന്ന് കാര്യമായ ഏ൪പ്പാടുകളൊന്നുംതന്നെ ഉണ്ടാകാറില്ലെന്നാണ് പ്രവാസികളുടെ പരാതി. കേരളത്തിലെ സാമ്പത്തികവ്യവസ്ഥ ഇന്നും നിയന്ത്രിക്കുന്നത് പ്രവാസികളാണെന്ന കാര്യത്തിൽ സംശയമില്ല. ഗൾഫ് പണത്തിൻെറ ഒഴുക്ക് കുറയുമ്പോൾ കേരളത്തിലെ പല വീടുകളിലെയും ജീവിതനിലവാരത്തിനു പകിട്ടുകുറയുന്നതും അതുകൊണ്ടുതന്നെയാണ്. തൊഴിൽരഹിതരായി നാട്ടിൽ തിരിച്ചെത്തുന്ന പ്രവാസികളുടെ ഉന്നമനത്തിനായി തയാറാക്കുന്ന പല പദ്ധതികളും കടലാസിലൊതുങ്ങിപ്പോകുന്നു.
നാട്ടിലേക്ക് പുറപ്പെടാൻ തീരുമാനിക്കുന്നതു മുതൽ തിരിച്ചെത്തുന്നതുവരെയുള്ള ചൂഷണപരമ്പരകളെക്കുറിച്ച് പറഞ്ഞാൽ അറുതിയില്ലെന്നാണ് ഗൾഫ്സുഹൃത്തുക്കൾ പറയുന്നത്. വെക്കേഷൻ സമയമാകുന്നതോടെ വിമാനക്കമ്പനികൾ ഒരു മാനദണ്ഡവുമില്ലാതെ വിമാനക്കൂലി കുത്തനെ വ൪ധിപ്പിക്കുന്നു. ഇതിനെതിരെ ചെറുവിരൽപോലുമനക്കാൻ പ്രവാസികാര്യ വകുപ്പ് തയാറാകുന്നുമില്ല. കുടുംബത്തിലെ നൂറായിരം പ്രശ്നങ്ങൾക്ക് നടുവിലാണ് മിക്ക ഗൾഫുകാരനും വിമാനമിറങ്ങുന്നത്. അവരെ സ്വീകരിക്കാൻ കൂട്ടത്തോടെ വിമാനത്താവളത്തിലെത്തുന്ന ഓരോ ബന്ധുവിൻെറയുമുള്ളിലെ ഹിഡൻ അജണ്ടആലോചിച്ച് തലപുണ്ണാക്കിക്കൊണ്ടായിരിക്കും പലരും വീട്ടിലെത്തുന്നത്. മക്കളുടെ വിവാഹം, ചികിത്സാസഹായം, കച്ചവടം തുടങ്ങാൻ മുതൽമുടക്ക്, ഗൾഫിലേക്കൊരു വിസ... ആവശ്യങ്ങളുടെ പട്ടിക നീണ്ടുപോകുന്നു. ആശുപത്രിയിൽ, മാ൪ക്കറ്റിൽ, വീടുപണിയിൽ - ഏതുകാര്യത്തിലായാലും പ്രവാസികളോട് എന്തിനും ഏതിനും ഇരട്ടിത്തുക ഈടാക്കുന്ന രീതി പണ്ടുമുതലേയുണ്ട്. ആശുപത്രികളിലും മറ്റും പോകുമ്പോൾ ഗൾഫുകാരനാണെന്ന് അറിയാതിരിക്കാൻ മുഷിഞ്ഞവേഷം ധരിച്ചാണ് ചെല്ലാറുള്ളതെന്ന് ഒരു ഗൾഫ്സുഹൃത്ത് വിഷമത്തോടെയാണ് പറഞ്ഞത്. ബന്ധുക്കളെ സന്തോഷിപ്പിക്കാനും മുഷിപ്പിക്കാതെ പറഞ്ഞയക്കാനുമുള്ള ശ്രമത്തിനിടയിൽ ഭാര്യമാരുടെ പരിഭവവും കണ്ണീരും കണ്ടില്ലെന്ന് വെക്കേണ്ടിവരുമ്പോഴുള്ള ഹൃദയവേദന തിരിച്ചെത്തിയാലും മുറിപ്പാടായി അലട്ടിക്കൊണ്ടേയിരിക്കും. എല്ലാവരേയും സന്തോഷിപ്പിച്ചും അനുനയിപ്പിച്ചും കാര്യങ്ങൾ പരിഹരിക്കുന്നതിനിടയിൽ ലീവ് തീരുന്നു.
ഗൾഫിലെ നരകയാതനകളെക്കുറിച്ച് ഓ൪ക്കാതിരിക്കാനാണ് നാട്ടിലെ അസൗകര്യങ്ങളെക്കുറിച്ച് പറഞ്ഞ് ജാടകാണിക്കുന്നതെന്നാണ് ചില ഗൾഫുസുഹൃത്തുക്കൾ സ്വകാര്യമായി പറയുന്നത്. അവിടെ രാജകീയജീവിതമാണെന്ന നാട്ടുകാരുടെ സങ്കൽപം തക൪ക്കാൻ പലരും ആഗ്രഹിക്കുന്നില്ല. ഇടുങ്ങിയ മുറികളിൽ അഞ്ചുംപത്തും പേ൪ ഞെങ്ങിഞെരുങ്ങിയാണ് കഴിഞ്ഞുകൂടുന്നത്. പ്രഭാതക൪മങ്ങൾ നി൪വഹിക്കാൻ പലപ്പോഴും ക്യൂനിൽക്കേണ്ടിവരും. ഭക്ഷണം സ്വയം പാകംചെയ്തു കഴിക്കണം. എരിപൊരിവെയിലത്ത് പണിചെയ്യുന്ന സാധാരണക്കാരായ തൊഴിലാളികളുടെ ജീവിതത്തെക്കുറിച്ചാണ് പറയുന്നത്. പ്രവാസികളിൽ ഏറിയപങ്കും അവരാണല്ലോ. നാട്ടിലായിരുന്നെങ്കിൽ ജോലി കഴിഞ്ഞ് തിരിച്ചെത്തുമ്പോൾ ഭക്ഷണമൊരുക്കി കാത്തിരിക്കാനെങ്കിലും ആളുണ്ടാകുമായിരുന്നല്ലോ എന്നോ൪ത്ത് നീറുന്ന മനസ്സുമായാണ് പലരും കട്ടിലിൽചെന്നുവീഴുന്നത്. ജോലിചെയ്തുതള൪ന്നതിനാൽ കിടന്നപാടെ മയങ്ങിപ്പോകുന്നത് വലിയ അനുഗ്രഹമാണ് എന്ന് പറയുമ്പോഴുള്ള അവരുടെ നീറ്റൽ, കേൾക്കുന്നവരേയും അസ്വസ്ഥരാക്കുന്നു. ഗൾഫിലെ മഹിമയെക്കുറിച്ച് പൊങ്ങച്ചം പറയുന്ന പല കുടുംബങ്ങളും താമസിക്കുന്നത് വളരെ ചെറിയ ഫ്ളാറ്റുകളിലാണ്. രണ്ടോ മൂന്നോ കുട്ടികളും ഭാര്യയും ഭ൪ത്താവും ഒരു കിടപ്പുമുറികൊണ്ട് തൃപ്തിപ്പെടേണ്ടിവരുന്നു. എന്നാലും, നാട്ടിൽനിന്നെത്തുന്നവരെ സ്വീകരിക്കാനും അവരെ ഗൾഫ്കാണിക്കാനും തിരിച്ചുപോകുമ്പോൾ അവ൪ക്കാവശ്യമുള്ള സാധനങ്ങൾ വാങ്ങിക്കൊടുക്കാനും പ്രവാസികൾ കാണിക്കുന്ന സന്മനസ്സ് പലരും കാണുന്നില്ല, മനസ്സിലാക്കുന്നില്ല. ബന്ധു കുറച്ചുദിവസം കൂടെതാമസിച്ചു തിരിച്ചുപോകുമ്പോഴേക്കും പലരുടെയും കുടുംബബജറ്റിൻെറ താളം തെറ്റുന്നു. ഗൾഫിലും കടക്കെണിയിലകപ്പെട്ട് ആത്മഹത്യയെക്കുറിച്ച് ചിന്തിക്കുന്ന കുടുംബങ്ങളുടെ എണ്ണം ഏറുകയാണെന്നത് ഞെട്ടിക്കുന്ന സത്യമാണ്. ആഡംബരജീവിതത്തിൻെറ പകിട്ടിൽ ആകൃഷ്ടരായി ആധുനിക ഗൃഹോപകരണങ്ങളും മുന്തിയവാഹനങ്ങളും കടമെടുത്ത് വാങ്ങിക്കൂട്ടുകയും തിരിച്ചടക്കാൻ വകയില്ലാതെ കുടുംബത്തോടെ ജീവിതം അവസാനിപ്പിക്കുകയുംചെയ്യുന്ന പല പ്രവാസികളുടെയും ദാരുണകഥകൾ കേരളത്തിലെത്തുന്നില്ല.
ശൈഖുമാരെപ്പോലെ ആഡംബരജീവിതം നയിക്കുന്ന വിരലിലെണ്ണാവുന്ന കുറെ മലയാളികളും ഗൾഫുനാടുകളിലുണ്ട്. അവ൪ക്കു പക്ഷേ, സാധാരണക്കാരായ മലയാളികളെ കാണുന്നതും അവരുമായി ഇടപഴകുന്നതും ഇഷ്ടമല്ല. മലയാളിയാണെന്ന് പുറംലോകം അറിയുന്നതുപോലും അവ൪ക്ക് ചതു൪ഥിയാണ്. എന്നാൽ, നാട്ടിൽനിന്നെത്തുന്ന രാഷ്ട്രീയക്കാരും ഉദ്യോഗസ്ഥപ്രതിനിധികളും ചിലപ്പോൾ മന്ത്രിമാ൪പോലും ഇവരുടെ അതിഥികളായിരിക്കും. സ്വന്തം പേരിനും പെരുമക്കുംവേണ്ടിയുള്ള സാമൂഹിക പ്രവ൪ത്തനമല്ലാതെ പാവപ്പെട്ട സ്വന്തം നാട്ടുകാ൪ക്കുവേണ്ടി ഒന്നും ഇവരുടെ പക്ഷത്തുനിന്നുണ്ടാകാറില്ല എന്നാണ് സാധാരണക്കാരായ മലയാളികളുടെ പരാതി. ഗൾഫ് മലയാളികൾ വിഷമസന്ധിയിൽ അകപ്പെടുമ്പോൾ സഹായഹസ്തവുമായി എത്തുന്നത് സന്നദ്ധസംഘടനകളും സേവനമനസ്കരായ ചില വ്യക്തികളുമാണ്. സ്വന്തം സത്പ്രവൃത്തികൾ ലോകമറിയണമെന്ന് നി൪ബന്ധമില്ലാത്ത ചില കൂട്ടായ്മകൾ ഗൾഫിൽ ക്രിയാത്മകമായി പ്രവ൪ത്തിക്കുന്നു എന്നത് പ്രവാസികൾക്ക് മരുഭൂമിയിലെ മരുപ്പച്ചയാണ്. അത്തരം കൂട്ടായ്മകളെ കണ്ടെത്താനും പ്രോത്സാഹിപ്പിക്കാനും നമ്മുടെ മുഖ്യധാരാമാധ്യമങ്ങൾ തയാറാവണം!