സിറിയന്‍ ഒഫിഷ്യലുകളെ ഒളിമ്പിക്സില്‍ സഹകരിപ്പിക്കില്ലെന്ന് കാമറണ്‍

ലണ്ടൻ: സിറിയൻ പ്രസിഡൻറ് ബശ്ശാ൪ അൽ അസദിനും കൂട്ടാളികൾക്കും യൂറോപ്യൻ യൂനിയൻ ഉപരോധം ഏ൪പ്പെടുത്തിയ സാഹചര്യത്തിൽ സിറിയൻ ഒഫിഷ്യലുകളെ ലണ്ടൻ ഒളിമ്പിക്സുമായി സഹകരിപ്പിക്കില്ലെന്ന് ബ്രിട്ടീഷ് പ്രധാനമന്ത്രി ഡേവിഡ് കാമറൺ പറഞ്ഞു. ലണ്ടനിൽ അന്താരാഷ്ട്ര ഒളിമ്പിക്സ് കമ്മിറ്റി പ്രസിഡൻറ് ജാക്വസ് റോഷെയുമൊത്ത് നടത്തിയ വാ൪ത്താ സമ്മേളനത്തിലാണ് അദ്ദേഹം ഇക്കാര്യം വ്യക്തമാക്കിയത്.
സിറിയൻ ഒളിമ്പിക് കമ്മിറ്റി പ്രസിഡൻറ് ജനറൽ മുവഫക് ജുമാഅക്ക് ഉപരോധമൊന്നുമില്ലെങ്കിലും ബശ്ശാറിൻെറ അടുത്ത അനുയായിയായ അദ്ദേഹത്തിന് വിസ അനുവദിക്കണമോ എന്ന കാര്യം പരിശോധിക്കുമെന്ന് ബ്രിട്ടൻെറ ആഭ്യന്തര മന്ത്രാലയം അറിയിച്ചു.