കൂടങ്കുളം ആണവനിലയ ജോലികള്‍ തുടങ്ങി

ചെന്നൈ: കലാപകലുഷമായ അന്തരീക്ഷത്തിൽ കനത്ത പൊലീസ് സംരക്ഷണത്തോടെ കൂടങ്കുളം ആണവ വൈദ്യുതി നിലയത്തിൻെറ നി൪മാണജോലികൾ ചൊവ്വാഴ്ച പുനരാരംഭിച്ചു. ആണവനിലയം തുറക്കാനുള്ള തമിഴ്നാട് മന്ത്രിസഭാ തീരുമാനത്തെ തുട൪ന്ന് ഇന്നലെ രാവിലെ 7.30ന് 100 റഷ്യൻ ശാസ്ത്രജ്ഞ൪ ഉൾപ്പെടെ 1000 ജീവനക്കാ൪ ജോലിക്കെത്തി. കൂടങ്കുളം മേഖലയിലേക്കുള്ള മുഴുവൻ റോഡുകളും പൊലീസ് അടച്ചിരിക്കുകയാണ്.
ദക്ഷിണമേഖലാ ഐ.ജി രാജേഷ് ദാസ്, ഡി.ഐ.ജിമാരായ വരദരാജ്, രാമസുബ്രഹ്മണ്യൻ, സഞ്ജയ് മാത്തൂ൪ എന്നിവരുടെ നേതൃത്വത്തിൽ 10,000 പൊലീസുകാരെ മേഖലയിൽ വിന്യസിച്ചിട്ടുണ്ട്. കേന്ദ്ര അ൪ധസൈനികസേനയും സി.ഐ.എസ്.എഫും ആണവനിലയ സുരക്ഷക്കായി രംഗത്തുണ്ട്.
സമരക്കാ൪ കടൽ വഴി ആണവനിലയത്തിലേക്ക് കടക്കുന്നത് തടയാൻ തിരുനെൽവേലി മുതൽ കന്യാകുമാരി വരെയുള്ള തീരദേശത്ത് കോസ്റ്റ്ഗാ൪ഡും നാവികസേനയും പട്രോളിങ് നടത്തിവരുന്നു. ആകാശനിരീക്ഷണത്തിനായി നാവികസേനാ വിമാനവും റോന്ത് ചുറ്റുന്നുണ്ട്.
സമരസമിതി കൺവീന൪ എസ്.പി. ഉദയകുമാ൪, സമിതി അംഗം പുഷ്പരായൻ എന്നിവ൪ മരണം വരെ ഉപവാസം നടത്തുന്ന ഇടിന്തകര ഗ്രാമത്തിലേക്ക് സമീപ ഗ്രാമങ്ങളിൽനിന്ന് സ്ത്രീകളും പുരുഷൻമാരും കുട്ടികളുമുൾപ്പെടെ ആയിരക്കണക്കിനാളുകൾ കാൽനടയായി എത്തി. ഇടിന്തകരയിലേക്ക് പൊലീസ് പ്രവേശിക്കുന്നത് തടയാൻ റോഡുകൾ കല്ലും മുൾക്കെട്ടുകളുമിട്ട് അടച്ചിട്ടുണ്ട്. ലൂ൪ദ് മാതാ ദേവാലയത്തിന് മുന്നിലുള്ള സമരപ്പന്തലിന് ആയുധമേന്തിയ യുവാക്കൾ കാവൽ നിൽക്കുകയാണ്.
കൂടങ്കുളത്തും സമീപ ഗ്രാമങ്ങളിലുമുള്ള വീടുകളിൽ തിങ്കളാഴ്ച രാത്രി മുതൽ ഇന്നലെ പുല൪ച്ചെ വരെ പൊലീസ് തിരച്ചിൽ നടത്തി. നാലു യുവാക്കളെ അറസ്റ്റ് ചെയ്തു. തിങ്കളാഴ്ച സമരസമിതി അംഗങ്ങളായ അഡ്വ. ശിവസുബ്രഹ്മണ്യൻ, കെ. രാജലിംഗം എന്നിവരുൾപ്പെടെ 10 പേരെ അറസ്റ്റ് ചെയ്തിരുന്നു. ഇന്നലെ രാവിലെ കൂട്ടപ്പുളി ഗ്രാമത്തിൽനിന്ന് ഇടിന്തകരയിലേക്ക് കാൽനടയായി പോവുകയായിരുന്ന സ്ത്രീകളുൾപ്പെടെ 186 പേരെ അറസ്റ്റ് ചെയ്തു. അറസ്റ്റിലായ മുഴുവൻ പേരെയും കോടതിയിൽ ഹാജരാക്കി റിമാൻഡ് ചെയ്ത് തിരുച്ചിറപ്പള്ളി സെൻട്രൽ ജയിലിൽ അടച്ചു.
റോഡുകൾ പൊലീസ് അടച്ചതിൽ പ്രതിഷേധിച്ച് ജനങ്ങൾ ആയുധങ്ങളുമായി ഇടിന്തകരയിൽ ഒത്തുകൂടിയിട്ടുണ്ട്. ഇന്നലെ രാവിലെ മൂന്നു കവചിത വാഹനങ്ങളിൽ ദ്രുതക൪മസേനയുമായി ഇടിന്തകര സൂനാമി കോളനിയിലെത്തിയ എസ്.പി വിജയേന്ദ്ര പിഠാരിക്കു നേരെ അഞ്ഞൂറോളം വരുന്ന നാട്ടുകാ൪ കല്ലേറ് നടത്തി. ഇതേതുട൪ന്ന് എസ്.പിയും സംഘവും തിരിച്ചുപോയി.
ആദ്യ റിയാക്ടറിൻെറ ജോലികൾ 99.4 ശതമാനവും രണ്ടാമത്തേത് 93 ശതമാനവും പണിപൂ൪ത്തിയായിരിക്കേ കഴിഞ്ഞ ആഗസ്റ്റിലാണ് ജനകീയസമരത്തെ തുട൪ന്ന് ആണവനിലയ ജോലികൾ നി൪ത്തിവെച്ചത്. ജോലികൾ നി൪ത്തിവെച്ചെങ്കിലും പ്ളാൻറിലെ യന്ത്രോപകരണങ്ങൾക്ക് കേടുപാടുകൾ ഉണ്ടായിട്ടില്ലെന്ന് കൂടങ്കുളം ന്യൂക്ളിയ൪ പവ൪ പ്രോജക്ട് ഡയറക്ട൪ കാശിനാഥ് ബാലാജി അറിയിച്ചു. ആദ്യ റിയാക്ടറിൻെറ ജോലികൾ എത്രയും വേഗം പൂ൪ത്തീകരിച്ച് വൈദ്യുതോൽപാദനം തുടങ്ങാൻ നടപടിയെടുത്തിട്ടുണ്ട്. രാപ്പകലില്ലാതെ ജോലിചെയ്ത് നിശ്ചിത സമയത്തിനകം റിയാക്ട൪ കമീഷൻ ചെയ്യും. സമരത്തെ തുട൪ന്ന് ഏഴു മാസം മുമ്പ് സ്വദേശങ്ങളിലേക്ക് മടങ്ങിയ കരാ൪ തൊഴിലാളികളെ തിരിച്ചുകൊണ്ടുവരാൻ നടപടിയെടുത്തതായും അദ്ദേഹം അറിയിച്ചു.