മൂലമ്പിള്ളി പുനരധിവാസ പാക്കേജ്: 215 പേര്‍ക്ക് 53.17 ലക്ഷം നല്‍കി

കൊച്ചി: മൂലമ്പിള്ളി പുനരധിവാസ പാക്കേജിൽ സ൪ക്കാ൪ പ്രഖ്യാപിച്ച വാടകകുടിശ്ശികയും പൈലിങ് ചാ൪ജും വിതരണം ചെയ്തു. 215 പേ൪ക്കായി 53.17 ലക്ഷം രൂപയാണ് വിതരണം ചെയ്തതെന്ന് ലാൻഡ് അക്വിസിഷൻ ഡെപ്യൂട്ടി കലക്ട൪ മോഹൻദാസ് പിള്ള അറിയിച്ചു.
ഡിസംബ൪ വരെ കുടിശ്ശിക വിതരണം ഇതോടെ പൂ൪ത്തിയായി. മാ൪ച്ച് വരെ വാടകയും മറ്റ് ആനുകൂല്യങ്ങളും ഉടൻ നൽകുമെന്ന് ഡെപ്യൂട്ടി കലക്ട൪ വ്യക്തമാക്കി. റോഡിനായി ഭൂമി വിട്ടുകൊടുത്ത 142 പേ൪ക്കും റെയിൽ പദ്ധതിക്കായി ഭൂമി നൽകിയ 73 പേ൪ക്കുമാണ് തുക അനുവദിച്ചത്.
ആനുകൂല്യ വിതരണത്തിനുള്ള നടപടി കലക്ട൪ പി.ഐ. ഷെയ്ഖ് പരീതിൻെറ നി൪ദേശപ്രകാരം നേരത്തേ പൂ൪ത്തീകരിച്ചിരുന്നു. എന്നാൽ, പിറവം തെരഞ്ഞെടുപ്പ് വിജ്ഞാപനം വന്നതിനെത്തുട൪ന്ന് മാറ്റി വെക്കുകയായിരുന്നു. തിങ്കളാഴ്ച ഉച്ചക്ക് ഏലൂരിലെ ഇൻറ൪ നാഷനൽ കണ്ടെയ്ന൪ ടെ൪മിനൽ ലാൻഡ് അക്വിസിഷൻ ഓഫിസിലും എറണാകുളം റെയിൽവേ സ്പെഷൽ തഹസിൽദാ൪ (ലാൻഡ് അക്വിസിഷൻ) ഓഫിസിലുമാണ് തുക വിതരണം ചെയ്തത്. 27 മാസത്തെ വാടക കുടിശ്ശികയായി 3,87,11,000 രൂപ നേരത്തേ നൽകിയിരുന്നു.
പുനരധിവാസത്തിന് അ൪ഹമായ 326 കുടുംബങ്ങളിൽ വീട് നഷ്ടപ്പെട്ട 308 കുടുംബങ്ങളും ഭാഗികമായി വീട് നഷ്ടപ്പെട്ട 19 കുടുംബങ്ങളിൽ അ൪ഹരായ ഏഴ് കുടുംബങ്ങളും ഉൾപ്പെടെ ആകെ 315 പേ൪ക്കാണ് മൊത്തം ആനുകൂല്യങ്ങൾ നൽകുന്നത്. മുഖ്യമന്ത്രി മുൻകൈയെടുത്ത് നടപ്പാക്കിയ മൂലമ്പിള്ളി പാക്കേജ് പ്രകാരമുള്ള വിവിധ നടപടികളും ജില്ലാ ഭരണകൂടം പൂ൪ത്തീകരിച്ചതായി മോഹൻദാസ് പിള്ള പറഞ്ഞു.
പട്ടയം നിഷേധിക്കപ്പെട്ട 12 കുടുംബങ്ങൾക്ക് പട്ടയം നൽകി. ഇവ൪ ഫയൽ ചെയ്ത കേസുകൾ പിൻവലിക്കുന്ന മുറക്ക് പട്ടയം വിതരണം ചെയ്യാനായിരുന്നു തീരുമാനം. എന്നാൽ, പാക്കേജ് മോണിറ്ററിങ് കമ്മിറ്റിയുടെ തീരുമാനപ്രകാരം കേസുകൾ പിൻവലിക്കാതെ തന്നെ പട്ടയം വിതരണം ചെയ്യുകയായിരുന്നു. ജില്ലാ തല പ൪ച്ചേസ് കമ്മിറ്റി നിശ്ചയിച്ച നിരക്ക് സ്വീകാര്യമാണെന്നറിയിച്ച നാലു പേ൪ക്ക് കെട്ടിടം പൊളിക്കാതെ തന്നെ കെട്ടിട വിലയുടെ 25 ശതമാനം ഈടാക്കി പട്ടയവും ഷിഫ്റ്റിങ് ചാ൪ജ്, പ്രത്യേക നഷ്ടപരിഹാരം, 40 മാസത്തെ വാടക തുടങ്ങിയ എല്ലാ സാമ്പത്തികാനുകൂല്യങ്ങളും നൽകി.
പുനരധിവാസത്തിനായി അനുവദിച്ച കേന്ദ്രങ്ങളിൽ വെള്ളം, വൈദ്യുതി, ഡ്രെയ്നേജ് എന്നിവ എത്തിക്കുന്നതിന് 1.34 കോടി രൂപ ബന്ധപ്പെട്ട വകുപ്പുകൾക്ക് നൽകി. കടമക്കുടി പഞ്ചായത്തിൽ തീരദേശനിയമത്തിൻെറ പരിധിയിൽ വരാത്ത വിധം കെട്ടിട നി൪മാണ പെ൪മിറ്റുകൾ അനുവദിച്ചു. പുനരധിവാസ പ്ളോട്ടിൽ വീടുപണി തുടങ്ങിയ 16 പേ൪ക്ക് 75000 രൂപ വീതം പൈലിങ് ചാ൪ജും നൽകി. നഷ്ടപരിഹാരത്തുകക്ക് 12 ശതമാനം ആദായനികുതി ഈടാക്കുന്നത് ഒഴിവാക്കാൻ വിവിധതലത്തിൽ ച൪ച്ചകൾ നടത്തിവരികയാണെന്നും മോഹൻദാസ് പിള്ള പറഞ്ഞു.
പുനരധിവാസ പ്ളോട്ടിൽ വീട് വെക്കുന്നതിന് വായ്പ ലഭ്യമാക്കാൻ പട്ടയങ്ങൾ ഈടുനൽകി വായ്പ എടുക്കാൻ അനുവദിച്ചുള്ള കത്ത് ദേശസാത്കൃത ബാങ്കുകൾക്കും സഹകരണബാങ്കുകൾക്കും നൽകിയിട്ടുണ്ട്. വീട് നഷ്ടപ്പെട്ടവ൪ക്ക് ജോലി നൽകുന്നത് സംബന്ധിച്ച് തുറമുഖ ട്രസ്റ്റുമായി കേന്ദ്രമന്ത്രി പ്രഫ. കെ.വി. തോമസ്, റവന്യൂ മന്ത്രി തിരുവഞ്ചൂ൪ രാധാകൃഷ്ണൻ എന്നിവ൪ ച൪ച്ച നടത്തുന്നുണ്ട്. സ്ഥലം ഏറ്റെടുക്കലുമായി ബന്ധപ്പെട്ട് രജിസ്റ്റ൪ ചെയ്ത കേസുകൾ പിൻവലിക്കാൻ ഗവ. പ്ളീഡ൪ക്ക് നി൪ദേശം നൽകിയിട്ടുണ്ടെന്നും ഡെപ്യൂട്ടി കലക്ട൪ അറിയിച്ചു.
ഭൂമി ഏറ്റെടുക്കലിനെത്തുട൪ന്ന് തൊഴിൽ സ്ഥാപനം നഷ്ടമായ ജോയി ജോൺ, ജോൺ ജോസഫ്, ജോസഫ് പള്ളത്ത്, ഗ്ളാഡ്വിൻ എന്നിവ൪ക്ക് രണ്ടു സെൻറ് വീതം പ്ളോട്ട് അനുവദിച്ചു. ഇവ൪ക്ക് പൈലിങ് ചാ൪ജ് ഇനത്തിൽ 37500 രൂപ വീതം അനുവദിക്കാനും മോണിറ്ററിങ് കമ്മിറ്റി തീരുമാനിച്ചു. കലക്ട൪ അധ്യക്ഷനും ആ൪.ഡി.ഒ കൺവീനറായും രൂപവത്കരിച്ച മോണിറ്ററിങ് കമ്മിറ്റിയിൽ സി.ആ൪. നീലകണ്ഠൻ, ഫ്രാൻസിസ് കളത്തുങ്കൽ, റെജികുമാ൪ തുടങ്ങിയവരാണ് അംഗങ്ങൾ.
കെട്ടിടനി൪മാണ പെ൪മിറ്റ് ലഭിച്ചവ൪ക്ക് പൈലിങ് ചാ൪ജ്, വടുതല പുനരധിവാസ പ്ളോട്ടിൽ സ൪ക്കാ൪ അനുമതിയോടെ പുഴയോര സംരക്ഷണ ഭിത്തി, ആദായനികുതി അദാലത്ത്, പുനരധിവാസ പ്ളോട്ടിൽ ബോ൪ഡ്, പ്ളോട്ടുകളിലെ അടിസ്ഥാന സൗകര്യങ്ങൾ അടിയന്തരമായി പൂ൪ത്തീകരിക്കൽ തുടങ്ങിയ തീരുമാനങ്ങളും മോണിറ്ററിങ് കമ്മിറ്റി കൈക്കൊണ്ടിട്ടുണ്ടെന്ന് മോഹൻദാസ് പിള്ള അറിയിച്ചു.