ദല്‍ഹിയില്‍ 5 വര്‍ഷത്തിനിടയിലെ ഏറ്റവും തണുപ്പേറിയ ക്രിസ്മസ്

ന്യൂദൽഹി: രാഷ്ട്ര തലസ്ഥാനത്ത് കഴിഞ്ഞ അഞ്ചുവ൪ഷത്തിനിടയിലെ ഏറ്റവും തണുപ്പേറിയ ക്രിസ്മസ് ആണ് ഇത്തവണത്തേത്. ഇന്നു രാവിലെ ദൽഹിയിൽ ഈ സീസണിലെ ഏറ്റവും കുറവ് താപനിലയായ 2.9 ഡിഗ്രി രേഖപ്പെടുത്തിയതോടെയാണിത്. കഴിഞ്ഞദിവസം 3.3 ഡിഗ്രി ആയിരുന്നു ദൽഹിയിലെ താപനില. ഈ മാസം 16ന് രേഖപ്പെടുത്തിയ 4.7 ഡിഗ്രിയായിരുന്നു ഇതിനുമുൻപ് ഈ സീസണിൽ ദൽഹിയിലെ ഏറ്റവും കുറഞ്ഞ താപനില.

മഞ്ഞുവീഴ്ച്ചയും ശീതക്കാറ്റും തലസ്ഥാനത്ത് ജനജീവിതം ദുസ്സഹമാക്കിയിരിക്കുകയാണ്. പ്രതികൂല കാലാവസ്ഥ വ്യോമഗതാഗതവും ട്രെയിൻ ഗതാഗതവും പാടെ താറുമാറാക്കിയിട്ടുണ്ട്. താപനില ഇനിയും താഴുമെന്നാണ് സൂചന.

ദൽഹിക്ക് പുറമെ ഉത്തരേന്ത്യൻ സംസ്ഥാനങ്ങളും തണുപ്പുകൊണ്ട് വിറയ്ക്കുകയാണ്. അസഹ്യമായ തണുപ്പ് ഇതുവരെ 128 പേരുടെ ജീവൻ അപഹരിച്ചു. ഭൂരിപക്ഷം മരണവും ഉത്ത൪പ്രദേശിലാണ്.