മദ്യപാനിയുടെ ആക്രമണത്തില്‍ പൊലീസുകാരന് പരിക്ക്

കൊച്ചി: മദ്യപാനിയുടെ ആക്രമണത്തിൽ പൊലീസുകാരൻെറ കാലിന് കുത്തേറ്റു. മറ്റൊരാൾക്ക് നിസ്സാര പരിക്കേറ്റു. മദ്യപിച്ച് വീട്ടിൽ ബഹളം വെച്ചയാളെ പിടികൂടാൻ ശ്രമിക്കുന്നതിനിടെ ഇയാൾ പൊലീസുകാരെ ആക്രമിക്കുകയായിരുന്നു. കടവന്ത്ര സ്റ്റേഷനിലെ ഷിബുകുമാറിനാണ് (40) കാലിൽ കുത്തേറ്റത്. ഇയാളുടെ കൈയും ഒടിഞ്ഞിട്ടുണ്ട്. മറ്റൊരു പൊലീസുകാരനായ നാസറിനാണ് നിസ്സാര പരിക്കേറ്റത്. വ്യാഴാഴ്ച രാവിലെയാണ് സംഭവം. കടവന്ത്ര കാരത്തല ലെയ്നിൽ ശിവമഠം വീട്ടിൽ സുജിത്താണ് (36) പൊലസുകാരെ ആക്രമിച്ചത്. ഇയാൾ പിന്നീട് രക്ഷപ്പെട്ടു. മദ്യപിച്ച് വീട്ടിൽ ബഹളം ഉണ്ടാക്കുന്നുവെന്ന് ഇയാളുടെ ബന്ധുക്കൾ ഫോണിലൂടെ പരാതി പറഞ്ഞതിനെത്തുട൪ന്നാണ് രണ്ട് പൊലീസുകാ൪ വീട്ടിലെത്തിയത്. പിടികൂടാൻ ശ്രമിക്കുന്നതിനിടെ കത്തി ഉപയോഗിച്ച് പൊലീസുകാരനെ കുത്തുകയായിരുന്നു. സംഭവമറിഞ്ഞ് കൂടുതൽ പൊലസീസെത്തിയപ്പോൾ ഇയാൾ രക്ഷപ്പെട്ടു.