ഇന്ത്യയിലെ കോവിഡ്​ രോഗികളിൽ പരീക്ഷണം നടത്താൻ ഇസ്രയേൽ പ്രതിരോധ സംഘം

ന്യൂഡൽഹി: കോവിഡ്​ വൈറസ്​ ബാധിച്ച്​ ഡൽഹിയിലെ നാല്​ ആശുപത്രികളിൽ പ്രവേശിപ്പിച്ച രോഗികളിൽ പരീക്ഷണം നടത്താൻ ഇസ്രയേലിന്​ എല്ലാവിധ സൗകര്യവും ഒരുക്കി കേന്ദ്ര സർക്കാർ. രോഗികളുടെ വിവരങ്ങളും ഉമിനീരി​െൻറ സാമ്പിളുകളും ഇസ്രയേൽ പ്രതിരോധ സംഘത്തിന്​ കൈമാറാനുള്ള അനുമതിയും നൽകിയിട്ടുണ്ടെന്ന്​ ദ ഹിന്ദു റിപ്പോർട്ട്​ ചെയ്യുന്നു.

രാജ്യത്തെ ഡിഫൻസ്​ റിസേർച്ച്​ ആൻഡ്​ ഡെവലപ്​മെൻറ്​ ഒാർഗനൈസേഷൻ (ഡി.ആർ.ഡി.ഒ) ഇസ്രയേലിലെ ഡയറക്​ടറേറ്റ്​ ഒാഫ്​ ഡിഫൻസ്​ റിസേർച്ച്​ ആൻഡ്​ ഡെവലപ്​മെൻറുമായി (ഡി.ആർ.ഡി.ഡി) സഹകരിച്ചായിരിക്കും ഇന്ത്യയി​ലെ കോവിഡ്​ രോഗികളിൽ പരീക്ഷണം നടത്തുക. അതിൽ ഒാഡിയോ ടെസ്​റ്റ്​​, ശ്വാസോച്ഛാസ പരിശോധന, തെർമൽ പരിശോധന എന്നിവയോടൊപ്പം കോവിഡ്​ 19മായി ബന്ധപ്പെട്ട പ്രോട്ടീനുകൾ ​െഎസൊലേറ്റ്​ ചെയ്യാനായുള്ള പോളിഅമിനോ ടെസ്​റ്റും നടത്തും. ഇന്ത്യയിലെ കോവിഡ്​ രോഗികളുടെ 5000 ഉമിനീർ സാമ്പിളുകൾ ഇസ്രയേൽ പ്രതിരോധ സംഘത്തിന്​ കൈമാറാൻ ഡി.ആർ.ഡി.ഒ നിർദ്ദേശിച്ചിട്ടുണ്ട്​.

ഇസ്രയേലിലെ സംഘം ഇന്ത്യയിലെത്തി ഒരു ദിവസത്തിനകം തന്നെ ​െഎ.സി.എം.ആർ തലവൻ ഡോ. ബൽറാം ഭാർഗവയടങ്ങുന്ന ആരോഗ്യമന്ത്രാലയത്തി​െൻറ സ്​ക്രീനിങ്​ കമ്മിറ്റി ഗവേഷണത്തിന്​ അനുമതി നൽകി. ഇൗ മാസം കമ്മിറ്റിയിലെ മുഴുവൻ അംഗങ്ങളും ചേരുന്ന യോഗത്തിലായിരിക്കും അന്തിമ തീരുമാനം എടുക്കുക. രാജ്യത്തെ ബയോ മെഡിക്കൽ ഗവേഷണത്തിനും വിദേശ സഹായത്താൽ നടത്തുന്ന ഗവേഷണത്തിനും ചുക്കാൻ പിടിക്കുന്നത്​ ​െഎ.സി.എം.ആർ ആയിരുന്നുവെങ്കിലും ഇസ്രയേൽ ഗവേഷകരുടെ പരീക്ഷണങ്ങൾ നിയന്ത്രിക്കുക ഡി.ആർ.ഡി.ഒ ആയിരിക്കും.

രോഗികളുടെ സാമ്പിളുകൾ ശേഖരിക്കേണ്ട ഡൽഹിയിലെ രണ്ട്​ പ്രമുഖ ആശുപത്രികൾ ഗവേഷണത്തിലെ വിദേശ സഹകരണത്തി​െൻറ പേരിൽ അതിന്​ വിസമ്മതിക്കുകയും ആരോഗ്യ മന്ത്രാലയത്തി​െൻറ സ്​ക്രീനിങ്​ കമ്മിറ്റിയുടെ അനുമതി തേടാൻ ഡി.ആർ.ഡി.ഒയോട്​ നിർദേശിക്കുകയും ചെയ്​തിരുന്നു. അതിന്​ പിന്നാലെയാണ്​ ഡി.ആർ.ഡി.ഒ എച്ച്​.എം.എസ്​.സിയുടെ അനുമതി തേടിയത്​.

ലേഡി ഹാർഡിങ്​ മെഡിക്കൽ കോളജ്​, രാം മനോഹർ ലോഹ്യ ആശുപത്രി എന്നിവയുടെ ഇൻസ്റ്റിറ്റ്യൂഷനൽ എതിക്​സ്​ കമ്മിറ്റിയാണ്​ നിർദേശവുമായി രംഗത്തെത്തിയിരുന്നത്​. ശ്രീ ഗംഗാരാം ആശുപത്രി, ലോക്​ നായക്​ ജയ്​പ്രകാശ്​ ആശുപത്രി എന്നിവിടങ്ങളിൽനിന്നും ഇസ്രയേൽ പ്രതിരോധ സംഘം സാമ്പിളുകളും വിവരങ്ങളും ശേഖരിച്ചേക്കും.