സ്കൂളിലെ അറബിഭാഷാ പഠനം ശ്രീരാമസേന തടഞ്ഞു

മംഗളൂരു: കുട്ടികളെ അറബി ഭാഷ പഠിപ്പിക്കുന്നെന്ന്​ ആരോപിച്ച്​ ​ശ്രീരാമസേന പ്രവര്‍ത്തകര്‍ എയ്​ഡഡ്​ സ്​കൂളിൽ ഇരച്ചുകയറി ക്ലാസുകൾ തടസ്സപ്പെടുത്തി. മംഗളൂരു സെന്‍റ് തോമസ് എയ്ഡഡ് ഹയര്‍ പ്രൈമറി സ്കൂളിലെ ഭാഷാ പഠനമാണ്​ ശ്രീരാമസേനാ പ്രവര്‍ത്തകര്‍ തടസപ്പെടുത്തിയത്​. ശനിയാഴ്​ച വിദേശ ഭാഷാ പഠനം നടക്കുന്നതിനിടെയാണ്​ സ്​കൂളിൽ അതിക്രമം നടന്നത്​.

കുട്ടികളെ നിര്‍ബന്ധിച്ച് അറബിയും ഉര്‍ദുവും പഠിപ്പിക്കുകയാണെന്ന് ആരോപിച്ചാണ് 60ഓളം പേര്‍ ശനിയാഴ്ച രാവിലെ വിദ്യാലയത്തിലേക്ക് ഇരച്ചുകയറിയത്. വിദ്യാർഥികളിൽ നിന്ന്​ അറബിക്​ പാഠപുസ്​തകം പിടിച്ചുവാങ്ങിയ അക്രമികൾ അറബി പഠനം തുടരാന്‍ അനുവദിക്കില്ലെന്ന്​ പ്രഖ്യാപിച്ചു. ഇനി സ്​കൂളിലേക്ക്​ വരരുതെന്ന്​  ഭാഷാധ്യാപകനെ ഭീഷണിപ്പെടുത്തി.
പാഠ്യപദ്ധതിയില്‍ ഉള്‍പ്പെടാത്ത അറബിയും ഉര്‍ദുവും പഠിപ്പിക്കുന്നത് ഭരണഘടനാവിരുദ്ധമാണെന്ന് ​ശ്രീരാമസേന നേതാക്കൾ പറഞ്ഞു.  ഭഗവദ്ഗീതയും വേദപഠനങ്ങളും ഉള്‍പ്പെടുത്തുകയാണെങ്കിൽ  അറബിക്കും ഉർദും പഠിപ്പിക്കാമെന്നും സേന നേതാക്കൾ ആവശ്യപ്പെട്ടു.

അതേസമയം താൽപര്യമുള്ള വിദ്യാർഥികൾക്ക്​ ഫ്രഞ്ച്​, ജർമൻ, അറബ്​ ഭാഷകൾ പഠിപ്പിക്കുന്നുണ്ടെന്ന്​ ഹെഡ്മാസ്റ്റര്‍ മെല്‍വിന്‍ ബ്രാഗ്സ് അറിയിച്ചു. സ്​കൂളിൽ ഉർദു പഠിപ്പിക്കുന്നില്ലെന്നും  ഹെഡ്​മാസ്​റ്റർ പറഞ്ഞു. പിടിഎ കമ്മിറ്റിയുടെ അനുമതിയോടെ,  അധിക സമയം കണ്ടെത്തിയാണ്​ വിദേശ ഭാഷാ ക്ലാസ്​ നടത്തുന്നത്​.  കരാട്ടേയും പരിശീലിപ്പിക്കുന്നുണ്ട്. മുസ്​ലിം കുട്ടികൾ മാത്രമാണ്​ അറബി ഭാഷാ പഠനത്തിൽ പ​െങ്കടുക്കുന്നതെന്നും ഹെഡ്​മാസ്​റ്റർ അറിയിച്ചു.  ഇതിന് ആരെയും നിര്‍ബന്ധിക്കാറില്ല. അക്രമികൾക്കെതിരെ പരാതി നല്‍കിയിട്ടില്ലെന്നും ​​അദ്ദേഹം പറഞ്ഞു.