ശബരിമലയിലെ സ്ത്രീപ്രവേശം: കേസ് കേള്‍ക്കാന്‍ വനിതാ ജഡ്ജിയും

ന്യൂഡല്‍ഹി: ശബരിമലയിലെ സ്ത്രീ പ്രവേശം സംബന്ധിച്ച കേസ് പരിഗണിക്കുന്ന സുപ്രീംകോടതി ബെഞ്ച് വനിതാ അംഗത്തെക്കൂടി ഉള്‍പ്പെടുത്തി പുന$സംഘടിപ്പിച്ചു. ജസ്റ്റിസുമാരായ കുര്യന്‍ ജോസഫ്, ഗോപാല്‍ ഗൗഡ എന്നിവരെ മാറ്റി. പകരം,  ജസ്റ്റിസുമാരായ ആര്‍. ഭാനുമതിയെയും സി. നാഗപ്പനെയും ഉള്‍പ്പെടുത്തി.  മൂന്നംഗ ബെഞ്ചിന്‍െറ അധ്യക്ഷന്‍ ജസ്റ്റിസ്  ദീപക് മിശ്രയെ നിലനിര്‍ത്തി.
ശബരിമലയില്‍ പ്രായഭേദമില്ലാതെ എല്ലാ സ്ത്രീകള്‍ക്കും പ്രവേശം നല്‍കണമെന്ന് ആവശ്യപ്പെട്ട് യങ് ലോയേഴ്സ് അസോസിയേഷന്‍ സമര്‍പ്പിച്ച ഹരജിയില്‍ അന്തിമവാദം തുടരുന്നതിനിടെയാണ് ബെഞ്ച് പുനഃസംഘടിപ്പിച്ചത്. രണ്ട് ജഡ്ജിമാരെ മാറ്റിയതിനാല്‍ കേസില്‍ വാദം ആദ്യം മുതല്‍ പുതുതായി കേള്‍ക്കേണ്ടി വരും. സാധാരണരീതിയില്‍ അന്തിമവാദത്തിനിടെ ബെഞ്ച് പുനഃസംഘടിപ്പിക്കാറില്ല.