ഡല്‍ഹി സംസ്ഥാനമായി പ്രഖ്യാപിക്കണമെന്ന കേസില്‍ സുപ്രീംകോടതി വാദം കേട്ടില്ല

ന്യൂഡല്‍ഹി: ഡല്‍ഹിയെ സംസ്ഥാനമായി പ്രഖ്യാപിക്കണമെന്നാവശ്യപ്പെട്ട് ആം ആദ്മി പാര്‍ട്ടി സര്‍ക്കാര്‍ സമര്‍പ്പിച്ച ഹരജിയില്‍ വാദംകേള്‍ക്കാന്‍ സുപ്രീംകോടതി വിസമ്മതിച്ചു. ഡല്‍ഹി കേന്ദ്ര ഭരണപ്രദേശമാണെന്നും ഭരണാധിപന്‍ ലഫ്. ഗവര്‍ണറാണെന്നുമുള്ള ഡല്‍ഹി ഹൈകോടതി വിധിക്കെതിരെ ആദ്യം അപ്പീല്‍ സമര്‍പ്പിക്കാന്‍ ആവശ്യപ്പെട്ടാണ് നേരത്തേ ആപ് സര്‍ക്കാര്‍ സമര്‍പ്പിച്ച ഹരജി പരിഗണിക്കാന്‍ സുപ്രീംകോടതി വിസമ്മതിച്ചത്.

സമര്‍പ്പിക്കുന്ന അപ്പീലിനൊപ്പം ഈ ഹരജിയും പരിഗണിക്കാമെന്നാണ് ജസ്റ്റിസുമാരായ എ.കെ സിക്രി, എന്‍.വി. രമണ എന്നിവരടങ്ങുന്ന ബെഞ്ച് അറിയിച്ചത്. ഡല്‍ഹിയെ സംസ്ഥാനമായി പ്രഖ്യാപിക്കണമെന്ന് ആവശ്യപ്പെട്ട് ആപ് സര്‍ക്കാര്‍ നേരത്തേ സമര്‍പ്പിച്ച ഹരജി വെള്ളിയാഴ്ച സുപ്രീംകോടതിയുടെ പരിഗണനയിലത്തെിയതായിരുന്നു. തൊട്ടുതലേന്നാണ് ഇതിനെതിരെ ഹൈകോടതി വിധിയുണ്ടായത്. ഹൈകോടതി വിധിക്കെതിരെ തങ്ങള്‍ മറ്റൊരു അപ്പീല്‍ സമര്‍പ്പിക്കുമെന്ന് ഡല്‍ഹി സര്‍ക്കാറിനുവേണ്ടി ഹാജരായ ഇന്ദിരാ ജയ്സിങ് വെള്ളിയാഴ്ച ബെഞ്ച് മുമ്പാകെ ബോധിപ്പിച്ചു.