ചൈനീസ് മഞ്ച നൂല്‍ നിരോധിക്കുമെന്ന് ഡല്‍ഹി സര്‍ക്കാര്‍

ന്യൂഡല്‍ഹി: പട്ടംപറത്തലിന് ചൈനീസ് മഞ്ച എന്ന നൈലോണ്‍ നൂല്‍ ഉപയോഗിക്കുന്നത് നിരോധിക്കുമെന്ന് ഡല്‍ഹി സര്‍ക്കാര്‍ ഡല്‍ഹി ഹൈകോടതിയെ അറിയിച്ചു. മൂര്‍ച്ചയേറിയ ഈ നൂല്‍ ഉപയോഗിക്കുന്നതുവഴി അപകടങ്ങള്‍ വര്‍ധിക്കുന്ന സാഹചര്യത്തിലാണ് നടപടി. പട്ടംപറത്തുന്നതിന് പരുത്തിനൂലോ മറ്റു പ്രകൃതിദത്ത നൂലുകളോ നിര്‍ബന്ധമാക്കുമെന്നും ചീഫ് ജസ്റ്റിസ് ജി. രോഹിണി, ജസ്റ്റിസ് സംഗീത ധിംഗ്ര എന്നിവരുടെ ബെഞ്ചിനെ സര്‍ക്കാര്‍ അറിയിച്ചു. ഇതിനായുള്ള കരട് വിജ്ഞാപനം ഡല്‍ഹി സര്‍ക്കാറിന്‍െറ പരിസ്ഥിതി വകുപ്പ് തയാറാക്കിയിട്ടുണ്ടെന്നും സര്‍ക്കാര്‍ സത്യവാങ്മൂലത്തില്‍ അറിയിച്ചു. രാജ്യത്തിന്‍െറ പല ഭാഗങ്ങളിലും മരണങ്ങള്‍ക്കിടയാക്കിയതിനാല്‍ ചൈനീസ് മഞ്ച നിരോധിക്കണമെന്ന ഹരജിയില്‍ പ്രതികരണം തേടി ഹൈകോടതി അയച്ച നോട്ടീസിനുള്ള മറുപടിയായാണ് സര്‍ക്കാര്‍ സത്യവാങ്മൂലം സമര്‍പ്പിച്ചത്.