ഇന്ത്യന്‍ സൈനിക പോസ്റ്റുകള്‍ക്ക് നേരെ പാക് വെടിവെപ്പ്; ഗ്രാമീണര്‍ക്ക് പരിക്ക്

സാംബ: ജമ്മു കശ്മീര്‍ അതിര്‍ത്തിയിലെ 30 ഇന്ത്യന്‍ സൈനിക പോസ്റ്റുകള്‍ക്ക് നേരെ വീണ്ടും പാക് സേനയുടെ വെടിവെപ്പ്. സാംബ ജില്ലയിലെ ഹിര നഗര്‍, കത്വ, രാംഗര്‍ എന്നിവിടങ്ങളിലാണ് ഞായറാഴ്ച രാത്രി വെടിവെപ്പും ഷെല്ലാക്രമണവും നടന്നത്. പാക് ആക്രമണത്തില്‍ ഗ്രാമീണര്‍ക്ക് പരിക്കേറ്റതായി റിപ്പോര്‍ട്ടുണ്ട്.

വെടിവെപ്പിലും ഷെല്ലാക്രമണത്തിലും വീടുകള്‍ക്കും കച്ചവട സ്ഥാപനങ്ങള്‍ക്കും നാശനഷ്ടം സംഭവിച്ചിട്ടുണ്ട്. അറുപതോളം മോര്‍ട്ടാര്‍ ഷെല്ലുകള്‍ ഗ്രാമങ്ങളില്‍ പതിച്ചതായി പ്രദേശവാസികള്‍ പറഞ്ഞു.

അതിര്‍ത്തിയിലെ പാക് ആക്രമണത്തിന്‍െറ പശ്ചാത്തലത്തില്‍ ഗ്രാമീണരെ സുരക്ഷിത സ്ഥാനങ്ങളിലേക്ക് മാറ്റി. പാക് വെടിവെപ്പിനെതിരെ അതിര്‍ത്തി രക്ഷാസേന ശക്തമായി തിരിച്ചടിക്കുകയാണ്.

വെള്ളിയാഴ്ച പാക് സേന നടത്തിയ വെടിവെപ്പില്‍ ഒരു ഗ്രാമീണന്‍ കൊല്ലപ്പെട്ടതിനെ തുടര്‍ന്ന് ഇന്ത്യന്‍ സേന തിരിച്ചടിച്ചിരുന്നു. ശനിയാഴ്ച ബി.എസ്.എഫ് ഒൗട്ട്പോസ്റ്റുകള്‍ക്കു നേരെ നടന്ന പാക് ഷെല്ലാക്രമണം രണ്ടു ഗ്രാമീണര്‍ക്ക് പരിക്കേറ്റു.