പാര്‍ട്ടിയില്‍ ഒറ്റപ്പെടുത്തുന്നു; സോണിയക്ക് തരൂരിന്‍െറ കത്ത്

ന്യൂഡല്‍ഹി: കോണ്‍ഗ്രസില്‍ ഒറ്റപ്പെടുത്താന്‍ ശ്രമം നടക്കുന്നുവെന്നും തന്‍െറ പ്രവര്‍ത്തനം അംഗീകരിക്കപ്പെടുന്നില്ലെന്നും ചൂണ്ടിക്കാട്ടി ശശി തരൂര്‍ എം.പി സോണിയ ഗാന്ധിക്ക് കത്തയച്ചു. പാര്‍ട്ടി എം.പിമാരുടെ യോഗത്തില്‍ പ്രകടിപ്പിച്ച അഭിപ്രായം മാധ്യമങ്ങളോട്  പറഞ്ഞതിന് സോണിയ തരൂരിനെ ശാസിച്ചുവെന്ന വാര്‍ത്തകള്‍ക്കു പിന്നാലെയാണ് കത്ത്. എന്നാല്‍  കത്തയച്ച കാര്യം തരൂര്‍ ശരിവെക്കുകയോ നിഷേധിക്കുകയോ ചെയ്തിട്ടില്ല.
കോണ്‍ഗ്രസിന്‍െറ താല്‍പര്യങ്ങള്‍ക്ക് എതിരായാണ് താന്‍ മാധ്യമങ്ങളോട് സംസാരിക്കുന്നതെന്ന് തെറ്റിദ്ധരിപ്പിക്കാന്‍ ചിലര്‍ക്ക് കഴിഞ്ഞിട്ടുണ്ടെന്ന് തരൂര്‍ കത്തില്‍ പറഞ്ഞു.പാര്‍ട്ടി താല്‍പര്യങ്ങള്‍ക്കൊത്ത് ആത്മാര്‍ഥമായാണ് പ്രവര്‍ത്തിക്കുന്നത്. എന്നാല്‍, പലപ്പോഴും അത് കാണുകയോ അംഗീകരിക്കുകയോ ചെയ്യുന്നില്ല. ചോര്‍ത്തിക്കൊടുക്കുന്നത് ഗൂഢാലോചനക്കാരുടെയും ഭീരുക്കളുടെയും രീതിയാണ്. താന്‍ രണ്ടു ഗണത്തിലും പെടില്ല. ഭാവിയില്‍ സ്വന്തം കാഴ്ചപ്പാട് പ്രകടിപ്പിക്കുന്നത് വിലക്കാനോ കുടുക്കാനോ ചെയ്തതാകാമെന്നും തരൂര്‍ കത്തില്‍ പറയുന്നു.