'പൊലീസി​നെ വട്ടം കറക്കിയ കള്ളന്‍റെ കഥക്ക്'​ ദേശീയ അവാർഡ്​; ആഹ്ലാദത്തിൽ ഷേണി ഗ്രാമവും

thodimuthal-police-team
നടൻ ഫഹദ് ഫാസിനൊപ്പം ആദൂർ മുൻ സി.​െഎ സിബി തോമസ്​

കാഞ്ഞങ്ങാട്​  'പൊലീസി​നെ വട്ടം കറക്കിയ കള്ള​ന്‍റെ കഥയായ തൊണ്ടിമുതലും ദൃക്​സാക്ഷിക്കും ദേശീയ അവാർഡ്​ കിട്ടിയത്തി​ന്‍റെ ആഹ്ലാദത്തിമിർപ്പിലാണ്​ ഷേണി ഗ്രാമം​‍. ഇൗ ഗ്രാമത്തിലെ പൊലീസ്​ സ്റ്റേഷന്​ ചുറ്റിപറ്റിയ കഥയാണ്​ ഇൗ സിനിമ​‍. ദിലീഷ് പോത്തന്‍റെ സംവിധാനത്തിലൊരുങ്ങിയ ‘തൊണ്ടിമുതലും ദൃക്സാക്ഷിയും മികച്ച മലയാള ചിത്രമായും ഫഹദ് ഫാസിൽ മികച്ച സഹനടനായും സജീവ് പാഴൂർ തിരക്കഥക്കുള്ള പുരസ്കാരവും നേടി​. 

thodimuthal-police-team
സിനിമയുടെ ചിത്രീകരണവേളയിൽ
 


പൊലീസുകാരുടെയും കള്ളന്‍റെയും കളവിനിരയായവരുടെയും ജീവിതത്തിന്‍റെ ധര്‍മ്മസങ്കടങ്ങളാണ് ദിലീഷ് പോത്തന്‍ കാസര്‍ക്കോടിന്‍റെ മണ്ണില്‍ ഏറ്റവും സരസമായി ‘തൊണ്ടിമുതലും ദൃക്‌സാക്ഷി’യിലൂടെ ദൃശ്യവത്കരിച്ചത്. പ്രേക്ഷകര്‍ അതില്‍ ഏറ്റവും നെഞ്ചേറ്റിയ ഒരാളാണ് ചിത്രത്തിലെ ഷേണി പൊലീസ് സ്റ്റേഷനിലെ എസ്‌​‍.ഐ​‍. ആയി അഭിനയിച്ച സിബി തോമസ്​‍. ഇദ്ദേഹം ആദൂർ മുൻ സി​​‍.െഎ​‍.യാണ്​​‍. സിനിമക്ക്​ ദേശീയ അവാർഡ്​ ലഭിച്ചതിൽ വളരെയധികം സന്തോഷമുണ്ടെന്നും ഇത്​ പ്രതീക്ഷിച്ചതാണെന്നും കാസർകോട്​ കോസ്​റ്റൽ പൊലീസ്​ സി​.െഎ. സിബി തോമസ്​ മാധ്യമത്തോട്​ പറഞ്ഞു. 

സിനിമയിൽ അഭിനയിച്ച പൊലീസ്​ അംഗങ്ങൾ ദിലീഷ് പോത്തനൊപ്പം
 


സിബി തോമസിന്​ പുറമേ തുക്കരിപ്പൂർ കോസ്​റ്റൽ പൊലീസിലെ ബാബുദാസ്​ കോടോത്ത്​, എ.ആർ. ക്യാമ്പിലെ സജിത്ത്​ സി. പടന്ന, അശോകൻ കള്ളാർ എന്നിവർ കൂടി സിനിമയിൽ പൊലീസുകാരായി വേഷമിട്ടിരുന്നു. വനിത പൊലീസുകാരായി വിദ്യാനഗർ പൊലീസ്​ സ്​​റ്റേഷനിലെ ഷീബ, രാജപുരം പൊലീസ്​ സ്റ്റേഷനിലെ സരള, മഞ്ചേശ്വരം പൊലീസ്​ സ്റ്റേഷനിലെ ശരാവതി എന്നിവരും അഭിനയിച്ചു. 

thodimuthal-police-team
നടൻ അലൻസിയറിനോടൊപ്പം സി.​െഎ സിബി തോമസ്
 


സിനിമക്കായി അണിയറ പ്രവർത്തകർ എത്തിയത്​ മുതൽ വളരെ നല്ല സഹകരണത്തോടെയായിരുന്നു ഷേണിയിലുള്ള നാട്ടുകാർ അവരോട്​ സഹകരിച്ചിരുന്നത്​. സാധാരണ സിനിമ അണിയറ പ്രവർത്തകർ ജില്ലയിലേക്കുള്ള വരവ്​ കുറവായത്​ കൊണ്ട്​ തന്നെ വളരെ താൽപര്യത്തോട്​ കൂടിയായിരുന്നു അണിയറ പ്രവർത്തകരെ വരവേറ്റിരുന്നത്​. സിനിമയുടെ ചിത്രീകരണത്തിനു വേണ്ടി ഷേണിക്കടുത്ത മണിയംപാറയിലാണ്​ 25 ലക്ഷം രൂപ ചെലവിൽ പൊലീസ്​ സ്റ്റേഷൻ നിർമ്മിച്ചത്​. 

thodimuthal-police-team
സംവിധാ‍യകൻ ദിലീഷ് പോത്തനൊപ്പം സി.​െഎ സിബി തോമസും കുടുംബവും
 


പൊലീസ്​ സ്റ്റേഷൻ നിർമ്മിക്കുന്നതിന്​ വേണ്ടിയുള്ള എല്ലാ സഹായവും ഒരുക്കിയത്​ ഷേണിയിലുള്ള നാട്ടുകാരായിരുന്നു. നാട്ടുകാരുടെ പൂർണമായ സഹകരണത്തോടെ ഒരുമാസം കൊണ്ടാണ്​ ഇരുനില കെട്ടിടം പണി പൂർത്തീകരിക്കാനായത്​. ഇതിൽ നാട്ടുകാരെ സിനിമയുടെ അണിയറ പ്രവർത്തകർ അനുമോദിക്കുകയും ചെയ്​തിരുന്നു. ഷൂട്ടിങ്ങിനു വേണ്ടി​യൊരുക്കിയ ഇരുനില പൊലീസ്​ സ്റ്റേഷൻ നാടി​ന്‍റെ പിന്നാക്കാവസ്​ഥ പരിഗണിച്ച്​ എൻമകജെ പഞ്ചായത്തി​ന്‍റെ മണിയംപാറയിലെ ലൈബ്രറിക്ക്​ കൊടുക്കാനുള്ള ഒരുക്കത്തിലാണ്.​ നാട്ടിൽ ചിത്രീകരിച്ച സിനിമക്ക്​ അവാർഡ്​ കിട്ടിയ വാർത്ത പടക്കം പൊട്ടിച്ചാണ്​ ഷേണിയിലെ നാട്ടുകാർ ആഘോഷിച്ചത്.​

COMMENTS