എൻ.ടി.ആറി​െൻറ മകൻ ഹരികൃഷ്​ണ വാഹനാപകടത്തിൽ മരിച്ചു

ഹൈദരാബാദ്​:  ആന്ധ്രപ്രദേശ്​ മുൻ മുഖ്യമന്ത്രി എൻ.ടി. രാമറാവുവി​​​െൻറ മകനും മുൻ എം.പിയുമായ നന്ദമൂരി ഹരികൃഷ്​ണ (62) വാഹനാപകടത്തിൽ മരിച്ചു. ബുധനാഴ്ച പുലര്‍ച്ചക്ക്​ തെലങ്കാനയിലെ നല്‍ഗൊണ്ടയിലാണ് അപകടം.  നെല്ലൂർ ജില്ലയിലെ കവാലിയിൽ വിവാഹത്തിൽ പ​െങ്കടുത്ത്​ ഹൈദരാബാദിലേക്ക്​ മടങ്ങവെ തെലുഗു സിനിമാ താരംകൂടിയായ ഹരികൃഷ്​ണ സഞ്ചരിച്ച കാർ ഡിവൈഡറിൽ ഇടിച്ച്​ മറിയുകയായിരുന്നു.

തലക്ക്​ ഗുരുതരമായി പരിക്കേറ്റ ഹരികൃഷ്ണയെ നർകാട്​പള്ളിയിലെ കമിനേനി ആശുപത്രിയില്‍ പ്രവേശിപ്പിച്ചെങ്കിലും രക്ഷിക്കാനായില്ല. ഹരികൃഷ്​ണയാണ്​ കാർ ഒാടിച്ചതെന്നാണ്​ പൊലീസി​​​െൻറ നിഗമനം. അപകടസമയത്ത്​ അദ്ദേഹം സീറ്റ്​ബെൽറ്റ്​​ അണിഞ്ഞിരുന്നില്ല. രാജ്യസഭ മുൻ എം.പിയായ ഹരികൃഷ്ണ ആന്ധ്രപ്രദേശ് മുഖ്യമന്ത്രി ചന്ദ്രബാബു നായിഡുവി​​​െൻറ ഭാര്യാ സഹോദരനും തെലുഗുദേശം പാർട്ടി (ടി.ഡി.പി) പോളിറ്റ്​ ബ്യൂറോ അംഗവുമാണ്​. 

1964ൽ ‘ശ്രീകൃഷ്​ണാവതാരം’ എന്ന ചിത്രത്തിൽ ബാലതാരമായി സിനിമ കരിയറിന്​ തുടക്കം കുറിച്ച അദ്ദേഹം ‘സീതയ്യ’, ‘ലഹിരി ലഹിരി ലഹിരിലോ’ എന്നിവയടക്കം നിരവധി പ്രമുഖ സിനിമകളിൽ വേഷമിട്ടു. മികച്ച സ്വഭാവ നടനുള്ള ആന്ധ്ര സർക്കാറി​​​െൻറ നന്ദി അവാർഡും കരസ്​ഥമാക്കി. 1996ൽ അവിഭക്ത ആന്ധ്രയിലെ ചന്ദ്രബാബു നായിഡു മന്ത്രിസഭയിൽ അംഗമായിരുന്ന ഹരികൃഷ്​ണ 1998ൽ നായിഡുവിനോട്​ തെറ്റിപ്പിരിഞ്ഞ്​ അണ്ണാ ടി.ഡി.പി രൂപവത്​കരിച്ചു​.

പിന്നീട്​ അനുരഞ്​ജനത്തിലായതി​െന തുടർന്ന്​ മാതൃപാർട്ടിയിൽ മടങ്ങിയെത്തി. 2008ൽ അവിഭക്ത ആന്ധ്രപ്രദേശിൽനിന്ന്​ രാജ്യസഭയിലെത്തി. തെലങ്കാന രൂപവത്​കരണവുമായി ബന്ധപ്പെട്ട പ്രതിഷേധത്തിനിടെ 2013ൽ ഹരികൃഷ്​ണ രാജ്യസഭ അംഗത്വം​ രാജിവെക്കുകയായിരുന്നു. 

പ്രമുഖ നടന്മാരായ ജൂനിയര്‍ എൻ.ടി.ആര്‍, നന്ദമൂരി കല്യാണ്‍ റാം എന്നിവരാണ് മക്കള്‍.  2014 ൽ റോഡ് അപകടത്തിലാണ് ഹരികൃഷ്​ണയുടെ മറ്റൊരു മകനായ ജാനകി റാമും മരിച്ചത്.  
ഉപരാഷ്​ട്രപതി എം. വെങ്കയ്യ നായിഡു അനുശോചിച്ചു.