ദുൽഖറും കീർത്തിയും; ബിഗ്ബജറ്റ് തെലുങ്ക് ചിത്രം ’മഹാനടി’യുടെ ടീസർ
text_fields
യുവ സൂപ്പർതാരം ദുൽഖർ സൽമാന്‍റെ ആദ്യ തെലുങ്ക് ചിത്രം മഹാനടിയുടെ ടീസർ പുറത്തിറങ്ങി. അന്തരിച്ച തെന്നിന്ത്യൻ നടി സാവിത്രിയുടെ സംഭവ ബഹുലമായ ജീവിത കഥപറയുന്ന ചിത്രത്തിൽ കീർത്തി സുരേഷ് സാവിത്രിയായി വേഷമിടുന്നു. പഴയ കാല റൊമാൻറിക് ഹീറോ ജെമിനി ഗണേശനായാണ് ഡി.ക്യൂ അഭിനയിക്കുന്നത്. നാഗ് അശ്വിനാണ് മഹാനടി സംവിധാനം ചെയ്യുന്നത്.
1940 മതൽ 1980 വരെയുള്ള മഹാനടി സാവിത്രിയുടെ ജീവിതമാണ് ചിത്രത്തിലൂടെ സംവിധായകൻ പറയുന്നത്. സാവിത്രി അഭിനയിച്ച സിനിമകളും അന്നത്തെ പ്രണയ നായകനായ ജെമിനി ഗണേശനുമായുള്ള സാവിത്രിയുടെ വിവാഹവും മഹാനടിയിലൂടെ പുന:സൃഷ്ടിക്കുന്നുണ്ട്.
നാഗ ചൈതന്യ, സാമന്ത റുത്പ്രഭു, അർജുൻ റെഡ്ഡി ഫെയിം വിജയ് ദേവരകൊണ്ട, ഷാലിനി പാണ്ഡെ, പ്രകാശ് രാജ് എന്നിവരും പ്രധാന വേഷത്തിലുണ്ട്.
യുവ നടൻ നാഗചൈതന്യ മുത്തച്ഛനും അന്നത്തെ മുൻനിര താരവുമായ നാഗേശ്വര റാവുവിെൻറ ചെറുപ്പകാലം അഭിനയിക്കുന്നു. തെലുങ്ക് സൂപ്പർസ്റ്റാർ നാഗാർജുനയുടെ മകനാണ് നാഗചൈതന്യ. വിഖ്യാത നടനായ എൻ.ടി രാമറാവുവും ചിത്രത്തിൽ വരുന്നുണ്ട്. വിജയ് ദേവരകൊണ്ട, സാമന്ത എന്നിവർ മാധ്യമ പ്രവർത്തകരായാണ് മഹാനടിയിൽ എത്തുന്നത്.
മെയ് ഒമ്പതിന് ലോക വ്യാപകമായി മഹാനടി തിയറ്ററുകളിലെത്തും. വിജയാന്തി മൂവിസാണ് നിർമാണം. തമിഴിലും മലയാളത്തിലും ചിത്രം മൊഴിമാറ്റി റിലീസ് ചെയ്തേക്കും. ‘നടിഗർ തിലകം’ എന്നാണ് ചിത്രത്തിന് തമിഴിൽ നൽകിയിരിക്കുന്ന പേര്.