താരങ്ങൾ ചാനൽ പരിപാടികളിൽ നിന്ന്​ വിട്ടുനിൽക്കണമെന്ന്​ ഫിലിം ചേംബർ

കൊച്ചി: സിനിമ താരങ്ങൾ ടെലിവിഷൻ ചാനലുകളുടെ അവാർഡ്​ നിശകളിലും മറ്റ്​ സ്​റ്റേജ്​ ഷോകളിലും പ​െങ്കടുക്കുന്നതിനെതിരെ ഫിലിം ചേംബർ രംഗത്ത്​. സിനിമ സംപ്രേഷണാവകാശം സംബന്ധിച്ച ചാനലുകളുടെ പുതിയ നിലപാടിൽ പ്രതിഷേധിച്ച്​ താരങ്ങൾ ഇത്തരം പരിപാടികളിൽനിന്ന്​ പൂർണമായും വിട്ടുനിൽക്കണമെന്നാണ്​ ഫിലിം ചേംബറി​​​െൻറ ആവശ്യം. തിങ്കളാഴ്​ച കൊച്ചിയിൽ നടക്കുന്ന യോഗത്തിൽ‘അമ്മ’ ഉൾപ്പെടെ പ്രധാന സിനിമ സംഘടനകളുമായി വിഷയം ചർച്ച ചെയ്യും.

ചിത്രീകരണം പൂർത്തിയാകും​ മുമ്പ്​ തന്നെ ന്യായമായ പ്രതിഫലം നൽകി മിക്ക സിനിമകളുടെയും സംപ്രേഷണാവകാശം ചാനലുകൾ വാങ്ങുന്ന രീതിയാണ്​ കാലങ്ങളായി ഉണ്ടായിരുന്നത്​. എന്നാൽ, അടുത്തകാലത്ത്​ ഇത്​ അവസാനിപ്പിച്ചു. തിയറ്ററിൽ മികച്ച കലക്​ഷൻ നേടുന്നതോ സൂപ്പർ താരങ്ങൾ അഭിനയിക്കുന്നതോ ആയ സിനിമകളുടെ സംപ്രേഷണാവകാശം മാത്രമേ ഇപ്പോൾ ചാനലുകൾ വാങ്ങാറുള്ളൂ. ഇതോടെ നൂറിലധികം സിനിമകളാണ്​ സംപ്രേഷണാവകാശം വിറ്റുപോകാതെ കിടക്കുന്നത്​. ഇത്​ തങ്ങളെ കടുത്ത പ്രതിസന്ധിയിലാക്കിയതായി നിർമാതാക്കളും വിതരണക്കാരും പറയുന്നു.

തങ്ങൾ നിർമിക്കുന്ന സിനിമകളിലൂടെ താരങ്ങളാകുന്നവരെ വെച്ച്​ സ്​റ്റേജ്​ ഷോ നടത്തി വരുമാനമുണ്ടാക്കുന്ന ചാനലുകൾ സംപ്രേഷണാവകാശം വാങ്ങുന്നതിൽ കാണിക്കുന്ന വിവേചനം അനുവദിക്കാനാവില്ലെന്നാണ്​ നിർമാതാക്കളുടെ നിലപാട്​. ക്യൂബ്, യു.എഫ്.ഒ തുടങ്ങിയ ഡിജിറ്റല്‍ പ്രൊജക്​ഷന്‍ സംവിധാനങ്ങളും തങ്ങളെ ചൂഷണം ചെയ്യുന്നതായി ഇവർക്ക്​ പരാതിയുണ്ട്​.

ചാനലുകൾ സംഘടിപ്പിക്കുന്ന പരിപാടികളിൽ താരങ്ങൾ പ​​െങ്കടുക്കരുതെന്ന ആവശ്യം നിർമാതാക്കൾക്കിടയിൽനിന്ന്​ ഉയർന്നുവന്നിട്ടുണ്ടെന്ന്​ ഫിലിം പ്രൊഡ്യൂസേഴ്​സ്​ അസോസിയേഷൻ പ്രസിഡൻറും നിർമാതാവുമായ സുരേഷ്​കുമാർ ‘മാധ്യമ’ത്തോട്​ പറഞ്ഞു. ​തിങ്കളാഴ്​ചത്തെ യോഗത്തിൽ ‘അമ്മ’യുടെ നിലപാട്​ വ്യക്​തമാക്കുമെന്ന്​ സെക്രട്ടറി ഇടവേള ബാബുവും അറിയിച്ചു