നടിയെ ​ആക്രമിച്ച കേസ്​: ദിലീപിന്​ വിദേശ യാത്രക്ക്​ അനുമതി

കൊച്ചി: നടിയെ ആക്രമിച്ച കേസിലെ പ്രതിയും നടനുമായ ദിലീപിന്​ വിദേശയാത്ര നടത്താൻ കോടതിയുടെ താൽക്കാലിക അനുമതി. ഇൗമാസം 20 മുതൽ 22വരെ ദോഹയിൽ പോകാൻ അനുമതി തേടി ദിലീപ്​ സമർപ്പിച്ച അപേക്ഷ എറണാകുളം പ്രിൻസിപ്പൽ സെഷൻസ്​ കോടതി അംഗീകരിക്കുകയായിരുന്നു.

ഹൈകോടതിയാണ്​ ജാമ്യം അനുവദിച്ചപ്പോൾ പാസ്​പോർട്ട്​ കോടതിയിൽ സമർപ്പിക്കണമെന്ന വ്യവസ്​ഥ നിഷ്​കർഷിച്ചിരുന്നത്​. തുടർന്നാണ്​ ദിലീപ്​ വിദേശയാത്രക്ക്​ പാസ്​പോർട്ട്​ വിട്ടുകിട്ടാൻ കോടതിയെ സമീപിച്ചത്​. നേരത്തേ, സമാന രീതിയിൽ അനുമതിയോടെ ദിലീപ്​ ദുബൈ യാത്രയും നടത്തിയിരുന്നു. അതിനിടെ, കേസുമായി ബന്ധപ്പെട്ട ഏഴ്​ രേഖകൾ നൽകാനാവില്ലെന്ന്​ പ്രോസിക്യൂഷൻ കോടതിയെ അറിയിച്ചു.

കേസ് തിങ്കളാഴ്​ച പരിഗണിച്ചപ്പോൾ ജുഡീഷ്യൽ കസ്​റ്റഡിയിൽ കഴിയുന്ന പ്രതികളെ ഹാജരാക്കി. ഇവരെ റിമാൻഡ്​ ചെയ്ത് വീണ്ടും ജയിലിലേക്ക് അയച്ചു. ദിലീപ്, പ്രതീഷ് ചാക്കോ, രാജു ജോസഫ് എന്നിവർ ഹാജരായില്ല. കേസ്​ വീണ്ടും അടുത്തമാസം എട്ടിന്​ പരിഗണിക്കും.