നടിയു​െട ദൃശ്യങ്ങൾ ആവശ്യപ്പെട്ട ദിലീപി​െൻറ ഹരജി തിങ്കളാഴ്ച പരിഗണിക്കും

കൊച്ചി: നടിയെ ആക്രമിച്ച കേസിൽ ദൃശ്യങ്ങൾ ആവശ്യപ്പെട്ട് നടൻ ദിലീപ് നൽകിയ ഹരജി തിങ്കളാഴ്ച പരിഗണിക്കാൻ മാറ്റി. പ്രോസിക്യൂഷനും  ദിലീപിന്‍റെ അഭിഭാഷകനും വാദത്തിനായി കൂടുതൽ സമയം ആവശ്യപ്പെട്ട സാഹചര്യത്തിലാണ് ഹരജി മാറ്റിയത്. ദൃശ്യങ്ങൾ നൽകുന്നത് ആക്രമിക്കപ്പെട്ട പെണ്‍കുട്ടിയുടെ സ്വകാര്യതയെ ബാധിക്കും. ഈ സാഹചര്യത്തില്‍ ദിലീപിന്‍റെ ആവശ്യം അംഗീകരിക്കരുത് എന്നാണ് പൊലീസിന്റെ നിലപാട്. 

ഹൈകോടതിയിലെ ഹരജിയില്‍ തീരുമാനമാകുന്നതുവരെ വിചാരണ തുടങ്ങരുതെന്ന ദിലീപിന്‍റെ ആവശ്യം സിംഗിള്‍ ബെഞ്ച് നേരത്തെ തള്ളിയിരുന്നു. ക്രിമിനല്‍ നടപടിക്രമവും തെളിവ് നിയമവും അനുസരിച്ച് പ്രതിയെന്ന നിലയിലുള്ള അവകാശങ്ങള്‍ സംരക്ഷിക്കണമെന്നാണ് ദിലീപിന്‍റെ ആവശ്യം.