കന്നഡ നടൻ അംബരീഷ്​​ അന്തരിച്ചു

ബംഗളൂരു: മുൻ മന്ത്രിയും പ്രശസ്​ത കന്നട നടനുമായ അംബരീഷ് അന്തരിച്ചു. 66 വയസ്സായിരുന്നു. ഹൃദയാഘാതംമൂലമാണ്​ അന്ത്യം. വൃക്കരോഗബാധിതനായ അദ്ദേഹം ബംഗളൂരുവിലെ സ്വകാര്യ ആശുപത്രിയിൽ ചികിത്സയിലായിരുന്നു. കന്നട സിനിമയിലെ സൂപ്പർ ഹീറോ ആയിരുന്ന അംബരീഷ്​ രാഷ്​ട്രീയത്തിലിറങ്ങി എം.എൽ.എ, എം.പി, കേന്ദ്ര-സംസ്​ഥാന മന്ത്രിപദങ്ങൾ അലങ്കരിച്ചു. മലയാളികൾക്ക്​ ഏറെ പരിചിതയായ നടി സുമലതയാണ് ഭാര്യ. മകൻ: അഭിഷേക്​.

1972ൽ നഗരഹാവു എന്ന സിനിമയിലൂടെയാണ് വെള്ളിത്തിരയിലേക്കുള്ള പ്രവേശം​. കന്നട, ഹിന്ദി, തെലുങ്ക്​, തമിഴ്, മലയാളം ഭാഷകളിലായി 230ഒാളം സിനിമയിൽ അഭിനയിച്ചിട്ടുണ്ട്. ’94ൽ ഇന്ത്യൻ നാഷനൽ കോൺഗ്രസിൽ ചേർന്ന ശേഷമാണ്​ രാഷ്​ട്രീയത്തിൽ സജീവമായത്​. എന്നാൽ, സീറ്റ് വിഷയത്തിൽ ’96ൽ പാർട്ടി വിട്ട്​ ജനതാദളിൽ ചേർന്നു.

98ൽ മാണ്ഡ്യയിൽനിന്ന് വിജയിച്ചു. പിന്നീട്​ അദ്ദേഹം കോൺഗ്രസിൽതന്നെ തിരിച്ചെത്തി. മൻമോഹൻ സിങ്​ മന്ത്രിസഭയിൽ വാർത്തവിതരണ പ്രക്ഷേപണ സഹമന്ത്രി ആയിരുന്നു. കർണാടകയിൽ സിദ്ധരാമയ്യ മന്ത്രിസഭയിൽ ഭവനമന്ത്രി സ്​ഥാനവും വഹിച്ചിട്ടുണ്ട്​