സുവർണ ചകോരം പ്രഖ്യാപിച്ച് നിശാഗന്ധിയിൽ ഇന്ന് തിരി താഴും

തിരുവനന്തപുരം: സിനിമയുടെ വസന്തകാലമൊരുക്കിയ 20ാമത് രാജ്യാന്തര ചലച്ചിത്രമേളക്ക് വെള്ളിയാഴ്ച നിശാഗന്ധിയിൽ തിരിതാഴും. 178 സിനിമകളുമായെത്തിയ മേളയുടെ സമാപനച്ചടങ്ങുകൾ വൈകീട്ട് ആറിന് ആരംഭിക്കും.  ചടങ്ങിൽ വിവിധ അവാർഡുകളും  പ്രഖ്യാപിക്കും. ഇക്കൊല്ലത്തെ ആജീവനാന്ത നേട്ടങ്ങൾക്കുള്ള ഐ.എഫ്.എഫ്.കെ അവാർഡ് പ്രശസ്​ത ഇറാനിയൻ സംവിധായകൻ ദാർയൂഷ് മഹ്റൂജിക്ക് സമ്മാനിക്കും.

മികച്ച രാജ്യാന്തര സിനിമക്കുള്ള സുവർണചകോരം, മികച്ച സംവിധായകനും നവാഗത സംവിധായകനും പ്രേക്ഷകരുടെ സിനിമക്കും നൽകുന്ന രജതചകോരങ്ങൾ, ഫെഫ്കയുടെ നേരത്തേ പ്രഖ്യാപിച്ച 10 ലക്ഷം രൂപയുടെ മാസ്​റ്റേഴ്സ്​ അവാർഡ്, ഫിപ്രസി, നെറ്റ്പാക് അവാർഡുകൾ, മികച്ച തിയറ്ററിനുള്ള രണ്ട് അവാർഡ്, മികച്ച റിപ്പോർട്ടിങ്ങിനുള്ള മാധ്യമ അവാർഡുകൾ എന്നിവയാണ് ചടങ്ങിൽ സമ്മാനിക്കുക.

മന്ത്രി തിരുവഞ്ചൂർ രാധാകൃഷ്ണൻ അധ്യക്ഷത വഹിക്കുന്ന ചടങ്ങിൽ ഗവർണർ പി.സദാശിവം മുഖ്യാതിഥിയായിരിക്കും. പ്രതിപക്ഷ നേതാവ് വി.എസ്​. അച്യുതാനന്ദൻ, മന്ത്രി വി.എസ്​. ശിവകുമാർ എന്നിവർ പങ്കെടുക്കും. ചലച്ചിത്ര അക്കാദമി ചെയർമാൻ ടി.രാജീവ് നാഥ് 20ാമത് ചലച്ചിത്രമേളയിലെ അവാർഡ് പ്രഖ്യാപനം നടത്തും. പുരസ്​കാരങ്ങൾ ഗവർണർ വിതരണം ചെയ്യും. ദാർയൂഷ് മഹ്റൂജി മറുപടി പ്രസംഗം നടത്തും. സുവർണചകോരം ലഭിച്ച ചിത്രത്തിെൻറ പ്രദർശനം സമാപനച്ചടങ്ങിനുശേഷം നിശാഗന്ധിയിൽ നടക്കും. ഫിപ്രസി അവാർഡ് ലഭിച്ച ചിത്രം ടാഗോർ തിയറ്ററിലും നെറ്റ്പാക് അവാർഡ് ലഭിച്ച ചിത്രം കലാഭവനിലും പ്രദർശിപ്പിക്കും.