പ്രശ്​നത്തിൽ പ്രമുഖ നട​െൻറ ഇടപെടലും; വെളിപ്പെടുത്തലുമായി മാമാങ്കം സംവിധായകൻ

മമ്മൂട്ടിയുടെ ബ്രഹ്മാണ്ഡ ചിത്രം മാമാങ്കത്തിലെ സംവിധായകനെ മാറ്റിയതുമായി ബന്ധപ്പെട്ട വിവാദങ്ങളിൽ പുതിയ വെളിപ്പെടുത്തലുമായി സജീവ്​ പിള്ള. ഒരു പ്രധാന നട​​െൻറ ഇടപെടലാണ്​ പ്രശ്​നം വഷളാക്കിയതെന്ന്​ സംവിധായകൻ സജീവ്​ പിള്ള ആരോപിച്ചു. മമ്മൂട്ടിയുടെ പേര് ഈ വിഷയത്തിലേക്ക് നിര്‍മ്മാതാവ് പത്ര സമ്മേളനം നടത്തി വലിച്ചിഴച്ചത് കൊണ്ടാണ് താന്‍ ഇക്കാര്യം തുറന്നുപറയുന്നതെന്നും സജീവ് പറഞ്ഞു.

സ്‌ക്രിപ്റ്റ്​ തിരുത്താതെ ഷൂട്ടിങുമായി മുന്നോട്ട് പോകുന്നില്ലെന്ന്​ നിർമാതാവ്​ പറഞ്ഞിരുന്നെന്നും ഒപ്പം പൂര്‍ണമായും വരുതിക്ക് നിന്ന് പ്രവര്‍ത്തിക്കണമെന്ന നിര്‍ബന്ധവുമുണ്ടായതായി സജീവ്​ പിള്ള പറഞ്ഞു. തുടര്‍ന്ന് പ്രധാന നട​​െൻറ വീട്ടില്‍ വച്ച് ഒരു ഒത്തുതീര്‍പ്പ് ചര്‍ച്ച നടന്നു. നിലവിലുള്ള, അന്യനാട്ടുകാരായ അസോസിയേറ്റുകളെ ഒഴിവാക്കണമെന്നും മലയാളം ഇന്‍ഡസ്ട്രിയില്‍ തഴക്കമുള്ള അസോസിയേറ്റുകളെ വയ്ക്കണമെന്നുമുള്ള നിര്‍ദ്ദേശം ഉണ്ടായി. എന്നാൽ ഒരു സിനിമ ചെയ്ത ഒരാളെ പോലും അസോസിയേറ്റ് ആയി വേണ്ടെന്ന നിലപാടിലായിരുന്നു മമ്മൂക്കയെന്നും സജീവ്​ പറഞ്ഞു.

നിര്‍മാതാവി​​െൻറ നിര്‍ദ്ദേശമനുസരിച്ച് ഞാന്‍ ചില സീനുകള്‍ അധികമായി തിരക്കഥയില്‍ ഉള്‍പ്പെടുത്തിയിരുന്നു. എന്നിട്ടും നിര്‍മാതാവ് വഴങ്ങിയില്ല. ഇരുപത്തിയഞ്ചും മുപ്പതും കോടിയൊക്കെ പോയാലും സജീവിനെ ഇല്ലാതാക്കും എന്ന് നിര്‍മാതാവ് പറഞ്ഞതായി അറിയാൻ കഴിഞ്ഞു.

സംവിധായകനെ നിയന്ത്രിക്കാന്‍ സീനിയറായ ഒരാളെ കൊണ്ടുവരണമെന്ന് നിർമാതാവ്​ ശാഠ്യം പിടിച്ചു. ആദ്യ സിനിമയിലെ പരാജയം ഇവിടെ തീര്‍ക്കണം എന്നുള്ളതായിരുന്നു വേണു കുന്നിപ്പള്ളിയുടെ തീരുമാനം. ശേഷം തന്നെ സിനിമയിൽ നിന്ന്​ മാറ്റിയതായുള്ള ടെര്‍മിനേഷന്‍ നോട്ടീസ് വന്നുവെന്നും സജീവ്​​ വെളിപ്പെടുത്തി. തുടർന്ന്​ മുഖ്യനട​​െൻറ വീട്ടില്‍ വച്ചുണ്ടായ ധാരണയും പാലിക്കപ്പെട്ടില്ലെന്നും അദ്ദേഹം അറിയിച്ചു.

അധികം വൈകാതെ നിര്‍മാതാവ് രണ്ടാം ഷെഡ്യൂളില്‍ തെലുങ്ക് സിനിമാ പശ്ചാത്തലമുള്ള അസോസിയേറ്റിനെ കൊണ്ടു വരികയും അയാളെ വച്ച് ഒരു ഷൂട്ട് പ്ലാന്‍ ചെയ്യാന്‍ മുന്നോട്ട് പോവുകയും ചെയ്​തു. ഫെഫ്കയുടേയും മുഖ്യനട​​െൻറയും ഇടപെടല്‍ മൂലം അത് നടന്നില്ലെന്നും സജീവ്​ പിള്ള പറഞ്ഞു.