‘അഡാറ് ലവി’നൊപ്പമുണ്ടാകും; ആരെയും ഭയക്കുന്നില്ല -പ്രിയ

തൃശൂർ: ‘അഡാറ് ലവ്​’ സിനിമയിലെ പാട്ടുരംഗത്തിലെ ഒറ്റ കണ്ണിറുക്കലിലൂടെ ലോക ശ്രദ്ധനേടിയ പ്രിയ പ്രകാശ്​ വാര്യർ കാർട്ടൂൺ ക്യാമ്പിലെത്തി. കേരള ലളിതകല അക്കാദമി തേക്കിൻകാട് മൈതാനിയിൽ സംഘടിപ്പിച്ച ക്യാമ്പിലാണ്​ കാർട്ടൂൺ പ്രണയവുമായി പ്രിയ എത്തിയത്​. അസഹിഷ്ണുതയെ ഭയക്കുന്നിലെന്നും സിനിമയിൽ നിന്നും പിൻമാറുകയില്ലെന്നും അവർ പറഞ്ഞത്​ കരഘോഷത്തോടെയാണ്​ ക്യാമ്പ്​ ഏറ്റുവാങ്ങിയത്.

നവമാധ്യമങ്ങൾ വഴി എറെ പിന്തുണ ലഭിക്കുന്നുണ്ട്​. ഫുട്ബാൾതാരം റൊണാൾഡോ ഉൾപ്പെടെ, ലോകപ്രശസ്​തരുടെ നിരതന്നെ പിന്തുണയുമായെത്തി. ജനങ്ങളിൽനിന്ന് ഉണ്ടായ പ്രതികരണങ്ങളിൽ വളരെ സന്തോഷമുണ്ട്​. കേരളത്തിൽനിന്ന് ലഭിച്ച അഭിനന്ദനങ്ങൾക്ക് കണക്കില്ല. 

ചിലർ സിനിമയ്ക്കെതിരെ നൽകിയ കേസി​െന കുറിച്ച് കൂടുതൽ അറിയില്ല. ആര്​ എതിർത്താലും, അവസാനംവരെ സംവിധായകൻ ഒമർ ലുലുവി​​​െൻറ ‘അഡാറ് ലവി’നൊപ്പം ഉണ്ടാകും. ഒരു കാര്യത്തിൽ എല്ലാവരും ഒരുപോലെ ആയിരിക്കുകയില്ലല്ലോ. എല്ലാറ്റിനെയും പോസിറ്റീവായാണ് കാണുന്നത്​ -പ്രിയ വ്യക്​തമാക്കി. 

ഗാനത്തെ കുറിച്ചുള്ള േട്രാളുകളെല്ലാം കാണുന്നുണ്ട്, സന്തോഷവുമുണ്ട്. അച്ഛൻ പ്രകാശ്​വാര്യർ, മാതാവ്​ പ്രീത, തിരക്കഥാകൃത്തുക്കളായ സാരംഗ് ജയപ്രകാശ്, ലിജോ പാണാടൻ എന്നിവർക്കൊപ്പമാണ് പ്രിയ ക്യാമ്പിലെത്തിയത്. ക്യാമ്പിൽ പങ്കെടുത്ത കാർട്ടൂണിസ്​റ്റുകൾ പ്രിയയുടെ വിവിധ ഭാവത്തിലുള്ള ചിത്രങ്ങളും വരച്ചിരുന്നു. മുഴുവൻ കാർട്ടൂണുകളും കണ്ടശേഷം, സമ്മാനമായി ലഭിച്ച നിരവധി കാർട്ടൂണുകളുമായാണ് പ്രിയ പൂങ്കുന്നത്തെ വീട്ടിലേക്ക് മടങ്ങിയത്.