ഗണേഷിൻെറ ദിലീപ്​ അനുകൂല പരാമർശങ്ങൾക്കെതിരെ പൊലീസ്​ കോടതിയിൽ

അങ്കമാലി: നടിയെ ആക്രമിച്ച കേസിൽ ജയിലിൽ കഴിയുന്ന ദിലീപിനെ സന്ദർശിച്ചശേഷം കെ.ബി. ഗണേഷ്​കുമാർ എം.എൽ.എ നടത്തിയ പരാമർശങ്ങൾക്കെതിരെ അന്വേഷണ ഉദ്യോഗസ്ഥർ കോടതിയിൽ. ഗണേഷി​​​െൻറ പരാമർശങ്ങൾ ആസൂത്രിതവും സാക്ഷികളെ സ്വാധീനിക്കുന്നതുമാണെന്ന്​ ചൂണ്ടിക്കാട്ടി അന്വേഷണ ഉദ്യോഗസ്ഥൻ പെരുമ്പാവൂര്‍ സി.​െഎ ബൈജു പൗലോസാണ്​ അങ്കമാലി മജിസ്​​ട്രേറ്റ്​ കോടതിയെ സമീപിച്ചത്​. ദിലീപിനെ സന്ദര്‍ശിക്കുന്നവരെ സംബന്ധിച്ച മുഴുവന്‍ വിവരവും ഹാജരാക്കാന്‍ ആലുവ സബ് ജയില്‍ സൂപ്രണ്ടിന്​ കോടതി നിർദേശം നൽകി.

ജയിലില്‍ കഴിയുന്ന ദിലീപിനെ സന്ദര്‍ശിക്കുന്നവരുടെ തിരക്ക് നാള്‍ക്കുനാള്‍ വർധിക്കുന്നതായും ഇത് കേസന്വേഷണത്തെയും മറ്റും ബാധിക്കുമെന്നും കോടതി അടിയന്തരമായി ഇടപെടണമെന്നുമായിരുന്നു അന്വേഷണ ഉദ്യോഗസ്​ഥ​​​െൻറ ആവശ്യം. പിതാവി​​​െൻറ ശ്രാദ്ധ ചടങ്ങും ഓണവുമായി ബന്ധപ്പെട്ട് കഴിഞ്ഞദിവസങ്ങളില്‍ സിനിമപ്രവര്‍ത്തകരും ബന്ധുക്കളും നാട്ടുകാരും സുഹൃത്തുക്കളും അടക്കം നിരവധി പേര്‍ ജയിലില്‍ ദിലീപിനെ സന്ദര്‍ശിച്ചിരുന്നു.
 
കോടതി വിധിക്കുന്നതുവരെ ദിലീപിനെ കുറ്റക്കാരനായി കാണാനാവില്ലെന്നും പൊലീസ്​ നടപടി തെറ്റാണെങ്കില്‍ മുഖ്യമന്ത്രി ഇടപെട്ട്​ തിരുത്തിക്കണമെന്നും ദിലീപിനെ സന്ദർശിച്ചശേഷം ഗണേഷ്​കുമാർ മാധ്യമങ്ങളോട്​ പറഞ്ഞിരുന്നു. ദിലീപിനെ സന്ദർശിക്കാൻ സിനിമപ്രവർത്തകർ മടിക്കരുതെന്നും ഗണേഷ്​ ആവശ്യപ്പെട്ടു.

തുടർന്നുള്ള ദിവസങ്ങളിൽ സിനിമലോകത്തുനിന്ന്​ ദിലീപിനെ കാണാനെത്തുന്നവരുടെ എണ്ണം കൂടി. ഇത്​ ഉന്നതതലത്തിൽ നടന്ന ഗൂഢാലോചനയുടെ ഭാഗമാണെന്ന്​ സംശയിക്കേണ്ടിയിരിക്കു​െന്നന്നും പൊലീസി​​​െൻറ റിപ്പോർട്ടിൽ പറയുന്നു. വരും ദിവസങ്ങളിൽ പ്രമുഖതാരങ്ങളടക്കം ദിലീപിനെ കാണാൻ ജയിലിലെത്തുമെന്ന അഭ്യൂഹങ്ങൾക്കിടെയാണ്​ പൊലീസ്​ കോടതിയെ സമീപിച്ചത്​. ദിലീപിനെ ജയിലിൽ കാണാനെത്തുന്ന സന്ദർശകർക്ക്​ വെള്ളിയാഴ്​ച മുതൽ നിയന്ത്രണം ഏർപ്പെടുത്തിയിട്ടുണ്ട്​.