ദിലീപിന്‍റെ പരാതിയിൽ കേസെടുത്തിട്ടില്ലെന്ന് പൊലീസ്

കൊച്ചി: നടിയെ ആക്രമിച്ച കേസുമായി ബന്ധപ്പെട്ട് തന്നെ ബ്ളാക്മെയിൽ ചെയ്യുന്നുവെന്ന നടൻ ദിലീപിന്‍റെ പരാതിയിൽ കേസൊന്നും രജിസ്റ്റർ ചെയ്തിട്ടില്ലെന്ന് എറണാകുളം റൂറൽ എസ്.പി എ.വി. ജോർജ്. പിന്നീട് കേസെടുക്കുമോയെന്ന് ഇപ്പോൾ പറയാനാവില്ല. ദിലീപിന്‍റെ പരാതയിലല്ല, നടിയെ ആക്രമിച്ച കേസുമായി ബന്ധപ്പെട്ടാണ് ഇന്ന് രണ്ട് പേരെ കസ്റ്റഡിയിലെടുത്തതെന്നും അദ്ദേഹം പറഞ്ഞു. കേസിൽ വിഷ്ണു, സനൽ എന്നീ സഹതടവുകാരെ പൊലീസ് അറസ്റ്റ് ചെയ്തിരുന്നു.

അതേസമയം, ആക്രമണത്തെക്കുറിച്ച്  ദിലീപ് നേരത്തെ അറിഞ്ഞിരുന്നുവെന്ന് സുനിൽകുമാർ പൊലീസിന് മൊഴി നൽകിയതായി ചില ടെലിവിഷൻ ചാനലുകൾ റിപ്പോർട്ട് ചെയ്തു. രണ്ട് മാസം മുമ്പ് ദിലീപ് നൽകിയ പരാതിക്ക് ശേഷം നാല് തവണയെങ്കിലും സുനിൽകുമാറിനെ ചോദ്യം ചെയ്തിട്ടുണ്ട്. മാധ്യമങ്ങളിലും മറ്റും പ്രചരിച്ച കത്തിൽ പറയുന്ന ഉള്ളടക്കം തന്നെയാണ് ചോദ്യം ചെയ്യലിൽ സുനിൽകുമാർ അന്വേഷണ സംഘത്തിന് നൽകിയത് എന്നാണ് സൂചന.