മലയാള സിനിമയിൽ സ്ത്രീവിരുദ്ധത  ശക്തം –കമൽ

കോഴിക്കോട്: മലയാള സിനിമയിൽ കുറേകാലമായി നിലനിൽക്കുന്ന സ്ത്രീവിരുദ്ധത ശക്തമാണെന്ന്​ ചലച്ചിത്ര അക്കാദമി ചെയർമാൻ കമൽ. അവതരണം, പ്രമേയം എന്നിവയിൽ ഇത് പ്രകടമാണ്. ഷൂട്ടിങ് ലൊക്കേഷനുകളിലല്ല, സ്ക്രീനിലാണ് സ്ത്രീവിരുദ്ധതയെന്നും കമൽ വ്യക്തമാക്കി. കാലിക്കറ്റ് പ്രസ്ക്ലബ് സംഘടിപ്പിച്ച ‘മീറ്റ് ദ പ്രസി’ൽ സംസാരിക്കുകയായിരുന്നു അദ്ദേഹം. 

ഒരു ഫിലിം മേക്കർ എന്ന നിലയിൽ സിനിമയിലെ സ്ത്രീവിരുദ്ധതയെ താൻ എതിർക്കുന്നു. ഇതുമായി ബന്ധപ്പെട്ട് ഇക്കഴിഞ്ഞ ഐ.എഫ്.എഫ്.കെയിൽ നടന്ന ചർച്ച പുരോഗമനപരമാണ്. സിനിമയിലെ സ്ത്രീകൾ സം‍ഘടിക്കുന്നത് ആശ്വാസ്യകരമാണ്. 
നടി ആക്രമിക്കപ്പെട്ടശേഷം സിനിമ വ്യവസായത്തിലെ പല പ്രവണതകളും ശരിയല്ലെന്ന് തിരിച്ചറിവ്​ വന്നിട്ടുണ്ട്.

മുമ്പ് ചിലരെ മാറ്റിനിർത്തുന്ന രീതിയുണ്ടായിരുന്നു. എന്നാൽ, എല്ലാവർക്കും ഇടം വേണമെന്ന പ്രവണത തുടങ്ങി. സൂപ്പർതാരത്തിന് മാത്രമല്ല, ചെറിയ താരത്തിനും ഇടമുണ്ടെന്ന മാറ്റം വലിയ കാര്യമാണ്. സൂപ്പർതാരമെന്ന വാക്ക് ഉപയോഗിച്ച്​ തുടങ്ങിയിട്ട്​ മൂന്നു പതിറ്റാണ്ടായെന്നും വിപണിയുടെ സാധ്യതകളെ ഓരോ കാലത്തും ഉപയോഗിക്കുകയാണെന്നും കമൽ കൂട്ടിച്ചേർത്തു.

ചലച്ചിത്ര മേളകൾ ബുദ്ധിജീവികളു​െടത്​ മാത്രമല്ല, സാധാരണക്കാര​​​െൻറത്​ കൂടിയാണ്​. അതിനാൽ ഐ.എഫ്.എഫ്.കെയേക്കാൾ പ്രാധാന്യം ടൂറിങ് ടാക്കിസിന് അക്കാദമി നൽകും. സാധാരണക്കാരിലേക്ക് സൗജന്യമാ‍യി സിനിമകൾ എത്തിക്കാനാണ് ടൂറിങ് ടാക്കിസുകൾ. അക്കാദമിയുടെ ഉത്തരവാദിത്തമെന്ന നിലക്കാണ് കോഴിക്കോട്ടേക്ക് പ്രാദേശിക രാജ്യാന്തര ചലച്ചിത്രമേള കൊണ്ടുവന്നത്. അടുത്ത വർഷങ്ങളിലും ഇത് തുടരുമെന്ന്​ കമൽ അറിയിച്ചു. ചെലവൂർ വേണു, ആർ.ഐ.എഫ്.എഫ്.കെ ഡെപ്യൂട്ടി ഡയറക്ടർ എച്ച്. ഷാജി, അക്കാദമി പ്രോഗ്രാം ഡെപ്യൂട്ടി ഡയറക്ടർ എൻ.പി. സജീഷ് എന്നിവരും പങ്കെടുത്തു. പ്രസ്ക്ലബ് പ്രസിഡൻറ് കെ. പ്രേമനാഥ് അധ്യക്ഷത വഹിച്ചു. സെക്രട്ടറി പി. വിപുൽനാഥ് സ്വാഗതം പറഞ്ഞു.