സ്​ത്രീത്വത്തെ അപമാനിക്കൽ; വിനായകനെതിരെ ​കേസ്​

കൽപറ്റ: യുവതിയോട്​ ഫോണിൽ ലൈംഗിക ചുവയിൽ സംസാരി​ക്കുകയും ചീത്തവിളിക്കുകയും ചെയ്​തെന്ന പരാതിയിൽ നടൻ വിനായകനെതിരെ കൽപറ്റ പൊലീസ്​ കേസെടുത്തു. കോട്ടയം പാമ്പാടി സ്വദേശിനിയും നടിയും ആക്​ടിവിസ്​റ്റുമായ യുവതി വയനാട്ടിൽനിന്ന്​ ഫോൺ ചെയ്​തപ്പോൾ വിനായകൻ മോശമായി ​സംസാരിച്ചുവെന്നാണ്​ പരാതി. കഴിഞ്ഞ ഏപ്രിലിലാണ്​ സംഭവം. പാമ്പാടി പൊലീസിൽ ഇൗയിടെ നൽകിയ പരാതി കൽപറ്റ പൊലീസിന്​ കൈമാറുകയായിരുന്നു. കേസെടുത്ത്​ അന്വേഷണം തുടങ്ങിയതായി കൽപറ്റ സി.ഐ സജുകുമാർ പറഞ്ഞു.

ദേശീയാടിസ്​​ഥാനത്തിൽ നടന്ന പരീക്ഷയിൽ ജില്ലയിൽനിന്ന്​ ഉന്നത വിജയം നേടിയ പെൺകുട്ടിയെ കാണാൻ ജില്ലയിൽ വന്ന യുവതി അവരുടെ നാട്ടിൽ വിദ്യാർഥികൾക്ക്​ പഠനോപകരണങ്ങൾ നൽകുന്ന ചടങ്ങിലേക്ക്​ വിനായകനെ ക്ഷണിക്കാനാണ് കൽപറ്റയിൽനിന്ന്​ ഫോൺ ചെയ്​തത്​. എന്നാൽ, ഫോൺ എടുത്തില്ല. തിരിച്ചുവിളിച്ച വിനായകൻ വളരെ മോശമായി സംസാരിച്ചുവെന്നാണ്​ പരാതി. ​കാൾ റെക്കോഡ്​ സൂക്ഷിച്ചിട്ടുണ്ടെന്ന്​ യുവതി പൊലീസിനെ അറിയിച്ചിട്ടുണ്ട്​.

യുവതിയുടെ വിവാദ വെളിപ്പെടുത്തൽ
കൽപറ്റ: ‘മുമ്പ്​ നടിക്കൊപ്പം നിലകൊണ്ട വിനായകനോട് ബഹുമാനമായിരുന്നു. എന്നാൽ, യഥാർഥ ജീവിതത്തിൽ അദ്ദേഹം സ്ത്രീവിരുദ്ധത കാണിച്ചത് അനുഭവമുണ്ട്. നാട്ടിൽ കുട്ടികളുടെ പരിപാടിക്ക് വിളിച്ച എന്നോട് കൂടെ കിടക്കാമോയെന്നും അമ്മയെക്കൂടി വേണമെന്നും പറഞ്ഞ വിനായകനോട് ഒരു ബഹുമാനവുമില്ല’ -യുവതി ഇങ്ങനെ വെളിപ്പെടുത്തിയത്​ സമൂഹ മാധ്യമങ്ങളിൽ അടുത്തിടെ ചർച്ചയായിരുന്നു. പുതിയ സിനിമ പുറത്തിറങ്ങുന്നതിന് മുന്നോടിയായി നൽകിയ അഭിമുഖത്തിലാണ്​ യുവതി വിവാദ വെളിപ്പെടുത്തൽ നടത്തിയത്​. യുവതിയുടെ പോസ്​റ്റിന് പിന്തുണയുമായി നിരവധി പേർ രംഗത്തെത്തി. ഇതു വൈറലായതിനെ തുടർന്ന്​ വിനായകൻ സൈബർ ആക്രമണം നേരിട്ടിരുന്നു