ശ്രീനിവാസനെതിരെ വനിത കമീഷൻ കേ​സെടുത്തു

തിരുവനന്തപുരം: നടൻ ശ്രീനിവാസനെതിരെ വനിത കമീഷൻ കേസെടുത്തു. അംഗനവാടി ടീച്ചർമാർക്കെതിരെ  മോശം പരമാർശം നടത്തിയതിനാണ്​​ കേസ്​. അംഗനവാടി ടീച്ചർമാരുടെ സംഘടന വനിത കമ്മീഷൻ അംഗം ഷാഹിദ കമാലിന്​​ പരാതി നൽകിയിരുന്നു​. 

സ്​ത്രീത്വത്തെ അപമാനിച്ചുവെന്ന്​ ചൂണ്ടിക്കാട്ടി അംഗനവാടി ടീച്ചർമാർ നൽകിയ പരാതിയിലാണ്​ നടപടി. അംഗനവാടി ടീച്ചർമാർ വിദ്യാഭ്യാസമില്ലാത്തവരാണെന്നായിരുന്നു ശ്രീനിവാസൻെറ പരാമർശം. സ്വകാര്യ ചാനലിന്​ നൽകിയ അഭിമുഖത്തിലാണ്​ ശ്രീനിവാസൻ വിവാദ പരാമർശം നടത്തിയത്​.

ജോലിയില്ലാത്തവരെ അംഗനവാടി ടീച്ചർമാരായി നിയമിക്കുകയാണെന്നും ഇവർക്ക്​ മതിയായ വിദ്യാഭ്യാസമില്ലെന്നും ശ്രീനിവാസൻ അഭിമുഖത്തിൽ പറഞ്ഞിരുന്നു. എന്നാൽ, വിദേശരാജ്യങ്ങളിൽ ഇതല്ല സ്ഥിതിയെന്നും അദ്ദേഹം വ്യക്​തമാക്കിയിരുന്നു.