പരസ്യപ്രസ്​താവന വേണ്ടെന്ന്​ ‘അമ്മ’; പരാതിയുള്ള താരങ്ങളെ ചർച്ചക്ക്​ വിളിച്ചു

കൊച്ചി: അംഗങ്ങളുടെ പരസ്യപ്രസ്​താവന വിലക്കി അഭിനേതാക്കളുടെ സംഘടനയായ അമ്മ. പരിഹരിക്കാൻ പറ്റാത്ത പ്രശ്​നങ്ങളില്ലെന്നും മാധ്യമങ്ങളിലൂടെയുള്ള പരസ്യപ്രസ്​താവനകളും ചർച്ചകളും സ്വയം അപഹാസ്യരാകാനും സംഘടനക്കും മലയാള സിനിമക്കും നഷ്​ടമുണ്ടാക്കാനും മാത്രമേ സഹായിക്കൂവെന്നും ജനറൽ സെക്രട്ടറി ഇടവേള ബാബു അംഗങ്ങൾക്ക്​ അയച്ച സർക്കുലറിൽ പറയുന്നു. സംഘടനയുടെ 24 വർഷം പഴക്കമുള്ള നിയമാവലി കാലാനുസൃതമായി പരിഷ്​കരിക്കാൻ കമ്മിറ്റി ഉണ്ടാക്കിയതായും സർക്കുലറിൽ അറിയിച്ചു​.

ജൂൺ 24ന്​ നടന്ന ജനറൽ ബോഡിയുടെ നടപടിക്രമങ്ങളും തുടർന്ന്​ അന്നുതന്നെ ചേർന്ന പുതിയ ഭരണസമിതിയുടെ തീരുമാനങ്ങളും വിശദീകരിക്കുന്നതാണ്​ സർക്കുലർ. ദിലീപിനെ തിരിച്ചെടുക്കാനുള്ള തീരുമാനം ചർച്ച ചെയ്യാൻ പ്രത്യേക​ യോഗം വിളിക്കണമെന്നാവശ്യപ്പെട്ട്​ കത്ത്​ നൽകിയ രേവതി, പദ്​​മപ്രിയ, പാർവതി എന്നിവരെ ആഗസ്​റ്റ്​ ഏഴിന്​ കൊച്ചിയിൽ നടക്കുന്ന എക്​സിക്യൂട്ടിവ്​ യോഗത്തിലേക്ക്​ കൂടിക്കാഴ്​ചക്ക്​ ക്ഷണിച്ചിട്ടുണ്ട്​. ഇതോടൊപ്പം ജോയ്​ മാത്യു, ഷമ്മി തിലകൻ എന്നിവരുമായും ചർച്ച നടത്തും.

ഭരണസമിതിയിലെ ചില സ്ഥാനങ്ങൾ വനിതകൾക്ക്​ സംവരണം ചെയ്യണമെന്നതടക്കം നിർദേശങ്ങൾ പുതിയ നിയമാവലിയിൽ ഉൾപ്പെടുത്തും. നിയമാവലി പരിഷ്​കരണം സംബന്ധിച്ച്​ അഭിപ്രായം അറിയിക്കാൻ അംഗങ്ങളോട്​ നിർദേശിച്ചിട്ടുണ്ട്​. അച്ചടക്ക സമിതിയിലും സ്​ത്രീപ്രാതിനിധ്യം ഉറപ്പാക്കും. സമിതിക്ക്​ കീഴിൽ വനിത സെല്ലിന്​ രൂപം നൽകും. ആക്രമിക്കപ്പെട്ട നടിക്ക്​ തുടർ സഹായങ്ങൾ ആവശ്യമ​ുണ്ടോ എന്ന്​ ചോദിച്ചറിയാൻ വനിത അംഗങ്ങളെ ചുമതലപ്പെടുത്തി. സംഘടന നടിക്കൊപ്പമില്ലെന്ന്​ പ്രചരിപ്പിക്കാൻ ചില ബാഹ്യശക്തികൾ ശ്രമിക്കുന്നതായും സർക്കുലറിൽ കുറ്റപ്പെടുത്തുന്നു.

‘അമ്മ’യുടെ സാമൂഹിക പ്രവർത്തനങ്ങൾ ജനങ്ങളിലെത്തിക്കാൻ മാധ്യമവക്താവിനെ നിയമിക്കും. ഭാവന, രമ്യ നമ്പീശൻ, റിമ കല്ലിങ്കൽ, ഗീതു മോഹൻദാസ്​ എന്നിവരുടെ രാജിക്കത്ത്​ ഇ-മെയിൽ വഴി ലഭിച്ചിട്ടുണ്ട്​. നിരപരാധിത്വം തെളിയിക്കുന്നതുവരെ സംഘടനയിലേക്കില്ലെന്ന്​ ദിലീപ്​ വ്യക്തമാക്കിയ സാഹചര്യത്തിൽ തുടർനടപടികൾക്ക്​ പ്രസക്​തിയില്ല. അംഗങ്ങളുടെ പ്രശ്​നങ്ങൾ രേഖാമൂലം ശ്രദ്ധയിൽപെടുത്തിയാൽ ഉടൻ പരിഹരിക്കുന്ന വിധത്തിലായിരിക്കും പുതിയ കമ്മിറ്റിയുടെ പ്രവർത്തനം. ദിലീപ്​ കുറ്റാരോപിതൻ മാത്രമാണെന്നും കോടതി വിധി വന്നിട്ട്​ ശിക്ഷിക്കാമെന്നും ഇപ്പോൾ തിരിച്ചെടുക്കണമെന്നും ജനറൽ ബോഡിയിൽ ആവശ്യം ഉയർന്നപ്പോൾ ​െഎകകണ്​ഠ്യേന പാസാക്കുകയാണ്​ ഉണ്ടായതെന്നും സർക്കുലറിൽ വിശദീകരിക്കുന്നു.