ഇർഫാൻ ഖാൻെറ ഓർമയിൽ തിരക്കഥ രചിച്ച്​ വിശാൽ ഭരദ്വാജ്​

മുംബൈ: അകാലത്തിൽ വിട്ടുപിരിഞ്ഞുപോയ കൂട്ടുകാരൻ ഇർഫാൻ ഖാൻെറ ഓർമയിൽ തിരക്കഥ രചിച്ച്​ പ്രശസ്​ത സംവിധായകൻ വിശാൽ ഭരദ്വാജ്​. ഡൽഹി ടൈംസുമായി പങ്കുവെച്ച ‘ഇർഫാൻ ആൻഡ്​ ഐ’ എന്ന്​ പേരിട്ട തിരക്കഥയിൽ ഇർഫാൻെറ മരണവാർത്തയുമായി ബന്ധപ്പെട്ട വിവിധ സന്ദർഭങ്ങളും വിവിധ സമയങ്ങളിലായി ഇർഫാനും എഴുത്തുകാരനും തമ്മിൽ പങ്കിട്ട മനോഹര മുഹൂർത്തങ്ങളും സംഭാഷണ ​ശകലങ്ങളുമാണ്​ ഉൾപെടുത്തിയിരിക്കുന്നത്​. 

ഇർഫാൻെറ മരണവാർത്ത ആദ്യം വിശ്വസിക്കാൻ തയാറായിരുന്നില്ലെന്ന്​ വിശാൽ വ്യക്​തമാക്കുന്നു. എന്നാൽ വിയോഗ വാർത്ത സ്​ഥിരീകരിച്ച നിമിഷം തൻെറ ഹൃദയത്തിൽ ഒരു ബോംബ്​ സ്​ഫാടനം നടന്നതായി അദ്ദേഹം വിവരിച്ചു. ഇരുവരുടെയും ആദ്യ കണ്ടുമുട്ടൽ തിരക്കഥയിൽ എഴുതിച്ചേർത്തിട്ടുണ്ട്​.

ആ രംഗം പതിയെ വില്യം ഷേക്​സ്​പിയറിൻെറ ഹാംലറ്റിനെ ആസ്​പദമാക്കി വിശാൽ ഒരുക്കിയ ‘ഹൈദർ’ എന്ന സിനിമയുടെ കശ്​മീരിലെ ചിത്രീകരണ കാഴ്​ചയിലേക്ക്​ ഊർന്നിറങ്ങുന്നു. ഹൈദറിൽ റൂഹ്​ദാർ എന്ന സുപ്രധാന വേഷമായിരുന്നു ഇർഫാൻ കൈകാര്യം ചെയ്​തത്​. വിശാലിൻെറ മഖ്​ബൂൽ, 7 ഖൂൻ മാഫ്​ എന്നീ ചിത്രങ്ങളിലും ഇർഫാൻ ശ്രദ്ധേയ വേഷങ്ങൾ ചെയ്​തിരുന്നു. 53കാരനായ ഇർഫാൻ അർബുദബാധയെത്തുടർന്ന്​ ഏപ്രിൽ 29നാണ്​ മരിച്ചത്​.