പത്മാവതി ഇനി പത്മാവത്; 26 രംഗങ്ങൾ ഒഴിവാക്കണം

ന്യൂഡല്‍ഹി: പേരിൽ ഉൾപ്പെടെ അഞ്ചു മാറ്റങ്ങൾ വരുത്തിയാൽ സഞ്ജയ് ലീല ഭന്‍സാലി ചിത്രം ‘പത്മാവതി’ക്ക്​ യു.എ സർട്ടിഫിക്കറ്റ്​ നല്‍കാമെന്ന് കേന്ദ്ര സെന്‍സര്‍ ബോര്‍ഡ് (സി.ബി.എഫ്​.സി). പത്മാവതി എന്ന പേര്​ ​‘പത്മാവത്’ എന്നാണ്​ മാറ്റേണ്ടത്​. ‘സതി’ ആചാരത്തെ മഹത്ത്വവത്​കരിക്കുന്ന ഭാഗങ്ങളിലും കഥാപാത്ര വിവരണമടങ്ങിയ ‘ഖൂമർ’ എന്ന ഗാനത്തിലും മാറ്റങ്ങൾ വരുത്തണം. ഇക്കാര്യങ്ങളെല്ലാം നിർമാതാക്കളും സംവിധായകനും അംഗീകരിച്ചിട്ടുണ്ടെന്ന്​ സി.ബി.എഫ്​.സി ചെയർമാൻ പ്രസൂൺ ജോഷി അറിയിച്ചു. 

എന്നാൽ, 26 രംഗങ്ങള്‍ വെട്ടിമാറ്റാൻ​ സെൻസർ ബോർഡ്​ നിബന്ധന വെച്ചെന്ന്​ വാർത്തയുണ്ട്​. കൂടാതെ, ചിത്രത്തിന് ചരിത്രവുമായി ബന്ധമില്ലെന്ന് രണ്ടുതവണ എഴുതിക്കാണിക്കണമെന്ന​​ും ​നിര്‍ദേശമു​ണ്ടത്രെ. നിര്‍ദേശിച്ച മാറ്റങ്ങള്‍ വരുത്തിയാലും സിനിമക്ക്​​ യു.എ സര്‍ട്ടിഫിക്കറ്റാണ്​ ലഭിക്കുക. എന്നാൽ, വെട്ടിമാറ്റലുകള്‍ നിര്‍ദേശിച്ചിട്ടില്ലെന്നും ചില പരിഷ്‌കാരങ്ങള്‍ വരുത്തണമെന്നാണ്​ നിര്‍ദേശിച്ചതെന്നും പ്രസൂൺ ജോഷി പറഞ്ഞു. 

28ന്​ ചേർന്ന പരിശോധന സമിതി യോഗത്തിലായിരുന്നു തീരുമാനം. 150 കോടി ചെലവിൽ നിർമിച്ച ത​​െൻറ ചിത്രം 16ാം നൂറ്റാണ്ടിൽ മാലിക്​ മുഹമ്മദ്​ ജയസി എഴുതിയ ‘പത്​മാവത്​’ എന്ന പ്രശസ്​ത കവിതയെ ആസ്​പദമാക്കിയുള്ളതാണെന്ന്​ സംവിധായകൻ ഭൻസാലി പാർലമ​െൻററി സമിതി മുമ്പാകെ വ്യക്​തമാക്കിയിരുന്നു. സിനിമയെ ചുറ്റിപ്പറ്റി ഉയർന്ന വിവാദങ്ങളുടെ പശ്ചാത്തലത്തിൽ സി.ബി.എഫ്​.സിയുടെ മുൻകൈയിൽ രൂപവത്​കരിച്ച പ്രത്യേക പാനലാണ്​ സിനിമ പരിശോധിച്ചത്​. ബോർഡ്​ ഉദ്യോഗസ്​ഥരെ കൂടാതെ ഉദയ്​പുരിലെ അരവിന്ദ്​ സിങ്​, ചന്ദ്രമണി സിങ്​, ജയ്​പുർ സർവകലാശാലയിലെ പ്രഫ. കെ.കെ. സിങ്​ എന്നിവരാണ്​ പാനലിൽ ഉണ്ടായിരുന്നത്​. നിർദേശിച്ച മാറ്റങ്ങൾ വരുത്തി സമർപ്പിക്കുന്ന മുറക്ക്​ സിനിമക്ക്​ പ്രദർശനാനുമതി നൽകും. 

അതേസമയം, ബോർഡി​​െൻറ തീരുമാനത്തിനെതിരെ രജപുത്​ കർണി സേനയും രജപുത്​ സഭയും രംഗത്തെത്തി. പാനലി​​െൻറ കണ്ടെത്തലിനുപകരം സിനിമ നിർമാതാക്കളുടെ താൽപര്യത്തിനാണ്​ ബോർഡ്​ പ്രാധാന്യം നൽകിയതെന്ന്​ രജപുത്​ സഭ പ്രസിഡൻറ്​ ഗിരിരാജ്​ സിങ്​ പറഞ്ഞു. പത്​മാവതിക്കെതിരായ സമരം തുടരുമെന്നും അദ്ദേഹം പറഞ്ഞു.

 ചരിത്രത്തെ തെറ്റായി ചിത്രീകരിച്ചെന്നാരോപിച്ച് സിനിമക്കെതിരെ രജപുത്ര^ഹിന്ദു സംഘടനകൾ രംഗത്തുവന്നിരുന്നു. സംവിധായക​​നും പ്രധാന വേഷം അവതരിപ്പിക്കുന്ന നടി ദീപിക പദുക്കോണിനും ബി.ജെ.പി നേതാക്കളിൽനിന്നടക്കം വധഭീഷണി ഉയർന്നിരുന്നു.