മീ ടൂ: സ്​ത്രീകളെ വെപ്പാട്ടികളാക്കുന്നവരും ശിക്ഷിക്കപ്പെടണം, ഋത്വികിനെതിരെ കങ്കണ

ന്യൂഡൽഹി: ലൈംഗികാതിക്രമങ്ങൾ തുറന്നു പറയുന്ന മീ ടൂ കാമ്പയി​​െൻറ പശ്ചാത്തലത്തിൽ ചെറുപ്പക്കാരികളെ വെപ്പാട്ടികളായി കൊണ്ടു നടക്കുന്നവരും ശിക്ഷിക്കപ്പെടണമെന്ന്​നടി കങ്കണ റണാവത്ത്​. താൻ ഋത്വിക്​ റോഷനെ കുറിച്ചാണ്​ പറഞ്ഞതെന്നും കങ്കണ വ്യക്തമാക്കി. സീ ന്യൂസിനു നൽകിയ അഭിമുഖത്തിലാണ്​ കങ്കണ ഋത്വികി​െനതിരെ ആഞ്ഞടിച്ചത്​. വികാസ്​ ബാഹലിനെ കുറിച്ചുള്ള ചോദ്യങ്ങളോട്​ പ്രതികരിക്കുകയായിരുന്നു അവർ.

‘‘വികാസ്​ ബഹലുമായി ബന്ധപ്പെട്ട കാര്യങ്ങൾ സത്യമാണ്​. നമ്മുടെ ചലച്ചിത്ര മേഖലയിൽ സ്​ത്രീകളോട്​ മാന്യമായി പെരുമാറാത്ത ഒരുപാട്​ പേർ ഇപ്പോഴുമുണ്ട്​. അവർ സ്​ത്രീകളെ അപമാനിക്കുകയും ഉപദ്രവിക്കുകയും ചെയ്യും. ഭാര്യമാരെ ട്രോഫി പോലെ സൂക്ഷിക്കുകയും ചെറുപ്പക്കാരികളെ വെപ്പാട്ടികളാക്കുകയും ചെയ്യുന്നവരും ശിക്ഷിക്കപ്പെടണം. ഞാൻ ഋത്വിക്​റോഷനെ കുറിച്ചാണ്​ പറഞ്ഞത്​. ആരും അദ്ദേഹത്തോടൊപ്പം ജോലി ചെയ്യരുത്​.’’- കങ്കണ പറഞ്ഞു.

ബോളിവുഡ്​ സംവിധായകൻ വികാസ്​ ബഹൽ ലൈംഗിക ചൂഷണത്തിനു ശ്രമിച്ചതായി പ്രമുഖ നടി കങ്കണ റണാവത്ത് നേരത്തെ വെളിപ്പെടുത്തിയിരുന്നു. ക്വീന്‍ സിനിമയുടെ ചിത്രീകരണത്തിനിടെ തന്നെ കാണുമ്പോൾ വികാസ് ബഹൽ ആലിംഗനത്തിലൂടെ അഭിവാദ്യം ചെയ്യാറുണ്ടായിരുന്നെന്നും ഇതിനിടെ കഴുത്തിലും മുടിയിലും മുഖം അമര്‍ത്തുന്നത്​ പതിവായിരുന്നുവെന്നുമാണ്​ കങ്കണ വെളിപ്പെടുത്തിയത്​.