‘ജാവേദ്​ അക്​തർ പറഞ്ഞു-നീ ജയിലിലാകും, ജീവനൊട​ുക്കേണ്ടി വരും’- ആരോപണവുമായി കങ്കണ

മുംബൈ: ബോളിവുഡിൽ നിലനിൽക്കുന്ന സ്വജനപക്ഷപാതവും പണത്തിൻെറയും സ്വാധീനത്തിൻെറയും അടിസ്​ഥാനത്തിലുള്ള വിവേചനവും തുറന്നുപറഞ്ഞ്​ വീണ്ടും നടി കങ്കണ റണാവത്​.

നടൻ ഹൃതിക് റോഷനെതിരെയുള്ള നിയമപോരാട്ടങ്ങൾക്കിടെ അപ്രതീക്ഷിത കേന്ദ്രങ്ങളിൽ നിന്നുവരെ തനിക്ക്​ മാനസിക പീഡനം നേരിടേണ്ടി വന്നുവെന്ന്​ അവർ വെളിപ്പെടുത്തുന്നു. രാകേഷ് റോഷനും കുടുംബവും വലിയ ആളുകളാണെന്നും അവരോട് മാപ്പ് പറഞ്ഞില്ലെങ്കില്‍ ജയിലിലാകുമെന്നും ആത്​മഹത്യ ചെയ്യേണ്ടി വരുമെന്നും തന്നോട് ഗാനരചയിതാവും തിരക്കഥാകൃത്തുമായ ജാവേദ് അക്​തർ പറഞ്ഞതായാണ്​ കങ്കണ തുറന്നടിച്ചത്​.

‘ജാവേദ് അക്തർ എന്നെ ഒരിക്കൽ വീട്ടിലേക്ക് വിളിപ്പിച്ചു. രാകേഷ് റോഷനും കുടുംബവും വളരെ വലിയ ആളുകളാണ്. നീ അവരോട് ക്ഷമ ചോദിക്കുന്നില്ലെങ്കിൽ, നിനക്ക് പോകാൻ മറ്റൊരിടവുമില്ല. അവർ നിന്നെ ജയിലിലേക്കയക്കും. പിന്നെ ഒരേ​യൊരു വഴി ആ നാശത്തി​േൻറതായിരിക്കും. നിനക്ക്​ ആത്മഹത്യ ചെയ്യേണ്ടിവരും-ഇതായിരുന്നു അദ്ദേഹത്തിൻെറ വാക്കുകൾ.

ഹൃത്വിക് റോഷനോട് ഞാൻ ക്ഷമ ചോദിക്കുന്നില്ലെങ്കിൽ എനിക്ക് ആത്മഹത്യ ചെയ്യേണ്ടിവരുമെന്ന് അദ്ദേഹം ചിന്തിച്ചത് എന്തുകൊണ്ടാണ്? വളരെ ഉച്ചത്തിലാണ്​ അദ്ദേഹമത്​ പറഞ്ഞത്​. ആ വീട്ടിൽ ഞാനപ്പോൾ വിറച്ചിരിക്കുകയായിരുന്നു’- ഒരു പോർട്ടലിന്​ നൽകിയ അഭിമുഖത്തിൽ കങ്കണ പറഞ്ഞു. 

നടൻ സുശാന്ത്​ സിങ്​ രജപുത്തിൻെറ മരണത്തെ പരാമർശിച്ച്​ സംസാരിക്കുകയായിരുന്നു അവർ. ‘ആരെങ്കിലും സുശാന്തിലേക്ക്​ ഇത്തരം മാനസിക ബുദ്ധിമുട്ടുകൾ അടിച്ചേൽപ്പിച്ചിരുന്നോയെന്ന്​ എനിക്കറിയില്ല. പക്ഷേ, അയാളും എ​േൻറതിന്​ സമാനമായ അവസ്​ഥയിലായിരുന്നു. സ്വജനപക്ഷപാതത്തിനും കഴിവിനും ഒന്നിച്ച് മുന്നോട്ട് പോവാനാവില്ലെന്ന് സുശാന്ത് പല അഭിമുഖങ്ങളിലും പറഞ്ഞിട്ടുണ്ട്. കാരണം അവർ പ്രതിഭകളെ പുറത്തുവരാൻ അനുവദിക്കില്ല. എനിക്ക് ആ അവസ്ഥ മനസ്സിലാവും, അതുകൊണ്ടാണ് ഞാൻ ചോദ്യങ്ങൾ ചോദിക്കുന്നത്. ഈ കളികളുടെ പുറകിൽ ആരാണെന്ന് എനിക്കറിയണം.’ -കങ്കണ ചൂണ്ടിക്കാട്ടി.

ആദിത്യ ചോപ്രയുമായി സുശാന്തിനും പ്രശ്​നങ്ങൾ ഉണ്ടെന്ന്​ എനിക്കറിയാം. ‘സുൽത്താൻ’ ചെയ്യാൻ കഴിയില്ലെന്ന്​ ഞാൻ പറഞ്ഞപ്പോൾ ആദിത്യ ചോപ്ര എന്നെ വിളിച്ച് ഭീഷണിപ്പെടുത്തുകയും ഒരിക്കലും ഇനി സിനിമ ചെയ്യിക്കില്ലെന്ന് പ്രഖ്യാപിച്ചിട്ടുമുണ്ട്. അവരെന്നെ ഒറ്റപ്പെടുത്തിയതു മുതൽ നിരവധി തവണ എനിക്ക് ഏകാന്തത അനുഭവപ്പെട്ടു. എനിക്ക് എന്ത്​ സംഭവിക്കുമെന്ന് ഒരുപാട്​ ആലോചിച്ചിട്ടുണ്ട്​.

എന്തുകൊണ്ടാണ് പദവിയുള്ള ആളുകൾക്ക്​ ഒരിക്കലും മറ്റൊരാളുമായി പ്രവർത്തിക്കില്ലെന്ന് പറയാൻ കഴിയുന്നത്​? എന്ത് അധികാരമാണ് അവർക്കുള്ളത്? മറ്റൊരാളുടെ കൂടെ പ്രവർത്തിക്കണോ എന്നത് ഒരാളുടെ വ്യക്തിഗതമായ തെരഞ്ഞെടുപ്പാണ്. പക്ഷേ എങ്ങിനെയാണ്​ കൂട്ടം ചേർന്ന്​ ചിലർക്ക്​ അത്​ പ്രാവർത്തികമാക്കാനാകുന്നത്​? ചിലരുടെ ഇൗ പ്രബലത ചോദ്യം ചെയ്യപ്പെടേണ്ടതുണ്ട്. അവരുടെ കൈകളിൽ രക്തം പുരണ്ടിട്ടുണ്ട്. ഉത്തരം പറയാൻ അവർ ബാധ്യസ്​ഥരാണ്​. അവരെ തുറന്നുകാട്ടാൻ ഞാൻ ഏതു പരിധിവരെയും പോകും. അത്രക്ക്​ സഹിച്ചു’–കങ്കണ കൂട്ടിച്ചേർത്തു.

വൈകാരികവും സാമൂഹികവുമായ ആൾക്കൂട്ട കൊലപാതകമാണ്​ സുശാന്തിൻെറ കാര്യത്തിൽ സംഭവിച്ചതെന്ന്​ സമൂഹ മാധ്യമങ്ങളിൽ പോസ്​റ്റ്​ ചെയ്​ത മറ്റൊരു വിഡിയോയിൽ കങ്കണ ആരോപിച്ചു.

‘ഇഷ്​ടമില്ലാത്തവരെ മാനസികമായി തളർത്താൻ മൂവി മാഫിയക്ക്​ കൂലിയെഴുത്തുകാരായ മാധ്യമ പ്രവർത്തകരുണ്ട്​. അവർ ഇരയുടെ പേര്​ പരാമർശിക്കാതെ, എന്നാൽ ആളെ തിരിച്ചറിയുന്ന സൂചനകൾ നൽകി നുണകൾ പ്രസിദ്ധീകരിക്കും. എന്നെ കുറിച്ചാണെങ്കിൽ ചുരുണ്ട മുടിക്കാരി, മണാലിക്കാരി, ദേശീയ അവാർഡ്​ ജേതാവ്​ എന്നൊക്കെ എഴുതും. പേര്​ പറയില്ല. ലക്ഷ്യം കണ്ടുകഴിഞ്ഞാൽ ഇവർ അപ്രത്യക്ഷമാകുകയും ചെയ്യും’- കങ്കണ പറയുന്നു.