ചലച്ചിത്ര സംവിധായകന്‍ കുന്ദന്‍ ഷാ അന്തരിച്ചു

മുംബൈ: എണ്ണം പറഞ്ഞ സിനിമകളിലൂടെ ഇന്ത്യൻ സിനിമ ചരിത്രത്തിൽ ഇടംപിടിച്ച പ്രമുഖ സംവിധായകൻ കുന്ദൻ ഷാ (69) വിടവാങ്ങി. ഹൃദയാഘാതംമൂലം ശനിയാഴ്​ച രാവിലെ സ്വവസതിയിലായിരുന്നു അന്ത്യം.

പുണെ ഫിലിം ഇൻസ്​റ്റിറ്റ്യൂട്ടിൽനിന്ന്​ പഠിച്ചിറങ്ങിയ കുന്ദൻ ഷാ 1983ലെ ആദ്യ ചിത്രമായ ‘ജാനെ ഭി ദൊ യാരൊ’യിലൂടെയാണ്​ ഇന്ത്യൻ സിനിമയിൽ വേറിട്ട ശൈലിയുമായി ഇടംപിടിച്ചത്​. ഷാറൂഖ്​ ഖാ‍​െൻറ വളർച്ചയിൽ നാഴിക കല്ലായ ‘കഭി ഹാ കഭി നാ’ അടക്കം എട്ടു സിനിമകളും ‘പെർസായി കെഹ്​തെഹെ’ അടക്കം മൂന്ന്​ ടെലിവിഷൻ പരമ്പരകളുമാണ്​ അദ്ദേഹത്തി‍​െൻറ സംഭാവന.

ത‍ന്‍റെ അഞ്ചോളം സിനിമകളിലെയും വിധു വിനോദ്​ ചോപ്രയുടെ ‘ഖാമോഷി’ലെയും രചനയിൽ പങ്കാളിയുമായി.  ‘ജാനെ ഭി ദൊ യാരൊ’ക്ക്​ ലഭിച്ച ദേശീയ പുരസ്​കാരം രാജ്യത്ത്​ അസഹിഷ്​ണുത വർധിക്കുന്നതിലും പുണെ ഫിലിം ഇൻസ്​റ്റിറ്റ്യൂട്ട്​ ഡയറക്​ടറായി ഗജേന്ദ്ര ചൗഹാനെ നിയമിച്ചതിലും പ്രതിഷേധിച്ച്​ തിരിച്ചുനൽകി. ദാദ്രി സംഭവ പശ്ചാത്തലത്തിൽ 2015 ലായിരുന്നു ഇത്​. 2014ലെ ‘പി സെ പിഎം തക്​’ ആയിരുന്നു അവസാന സിനിമ. ദാദർ, ശിവജി പാർക്ക്​ ശ്​മശാനത്തിൽ സംസ്​കരിച്ചു.