ഉഡ്​താ പഞ്ചാബ്​ ഒാൺലൈനിൽ;നിർമാതാക്കൾ സൈബർ സെല്ലിന്​ പരാതി നൽകി

മു​ംബൈ:വെള്ളിയാഴ്​ച്ച റിലീസ്​ ചെയ്യാനിരിക്കുന്ന വിവാദ ചിത്രം ഉഡ്​താ പഞ്ചാബ്​ ഒാൺലൈനിലൂടെ ചോർന്നതുമായി ബന്ധപ്പെട്ട്​ നിർമാതാക്കൾ സൈബർ സെല്ലിന്​ പരാതി നൽകി. ബാന്ദ്രയിലെ സൈബർ ക്രൈം പൊലീസ്​ സ്​റ്റേഷനിലാണ്​ ഫാൻറം ഫിലിംസ്​ പകർപ്പവകാശം ലംഘിക്കപ്പെ​െട്ടന്നു കാണിച്ച്​ പരാതി നൽകിയത്​. ടൊറൻറ്​ പോലുള്ള വെബ്​സൈറ്റുകളിൽ ഇന്നലെ രാത്രി മുതൽ ചിത്രം ലഭ്യമാ​െയന്ന്​ മുംബൈ പൊലീസിന്​ നൽകിയ പരാതിയിൽ നിർമ്മാതാക്കൾ പറയുന്നു. 

അതേസമയം പകർപ്പവകാശ പരാതിയിൻ മേൽ സിനിമകൾ നീക്കം ചെയ്യുന്നതായി വെബ്​സൈറ്റുകൾ പിന്നീട്​ അറിയിച്ചു. ഒാൺലൈനിൽ കണ്ടെത്തിയ ചി​​​ത്രത്തിന്​ രണ്ട്​ മണിക്കൂർ 20 മിനുറ്റ്​ ദൈർഘ്യമുണ്ട്​. വിവാദ ഹിന്ദി സിനിമ ‘ഉഡ്താ പഞ്ചാബ്’ മയക്കുമരുന്നിനെ മഹത്വവത്കരിക്കുന്നില്ലെന്ന്​ചൂണ്ടിക്കാണിച്ച്​ ബോംബെ ഹൈകോടതി ചിത്രത്തിന്​ പ്രദർശനാനുമതി നൽകിയിരുന്നു. അനാവശ്യ വിവാദം സിനിമക്ക് പരസ്യമാവുകയാണെന്നും കോടതി ചൂണ്ടിക്കാട്ടി. പഞ്ചാബ് തെരഞ്ഞെടുപ്പ് അടുത്ത സാഹചര്യത്തില്‍ രാഷ്ട്രീയ താല്‍പര്യം മൂലമാണ് മോദി ഭക്തനായി അറിയപ്പെടുന്ന സെന്‍സര്‍ ബോര്‍ഡ് അധ്യക്ഷന്‍ പഹ്ലജ് നിഹ്ലാനി സിനിമയിലെ 94 സീനുകൾ മുറിച്​ മാറ്റിയത്​. അകാലിദള്‍ ബി.ജെ.പി സഖ്യമാണ് പഞ്ചാബ് ഭരിക്കുന്നത്. ആം ആദ്മി പാര്‍ട്ടിയില്‍നിന്ന് പണം വാങ്ങിയാണ് അനുരാഗ് കാശ്യപ് സിനിമ നിര്‍മിച്ചതെന്ന് പഹ്ലജ് നിഹലാനി ആരോപിച്ചത് വൻ വിവാദം സൃഷ്​ടിച്ചിരുന്നു.