സൽമാൻ ഖാൻ വിവാദം: മറ്റുള്ളവരു​ടെ കാര്യത്തിൽ ഇടപെടുന്നത്​ ഉചിതമല്ല- ഷാരൂഖ്​ ഖാൻ

ന്യൂഡൽഹി: സൽമാൻ ഖാ​ൻ വിവാദത്തിൽ പക്ഷം ചേരാതെ ഷാരൂഖ്​ ഖാൻ. ബോളിവുഡിലെ കങ്കനാ റനാവത്,​​ സോയാ അക്​തർ, സോനാ മഹാപത്ര​ എന്നിവർ സൽമാനെതിരെ രംഗത്ത്​ വന്നപ്പോൾ സഹോദരൻ അർബാസ്,​ സോനു സൂദ്​, സുഭാഷ്​ ഗായ്​ എന്നിവർ സൽമാനു വേണ്ടിയും പക്ഷം ചേർന്നപ്പോഴാണ്​ കിങ്​ ഖാൻ നിഷ്​പക്ഷത പാലിച്ചത്​.​ മറ്റുള്ളവരുടെ കാര്യത്തിൽ ഇടപെടുന്നത്​ ഉചിതമല്ലെന്ന്​​ ഷാരൂഖ്​ ഖാൻ അഭി​പ്രയപ്പെട്ടു. സുൽത്താൻ സിനിമയെക്കുറിച്ച സൽമാൻ ഖാ​​െൻറ പരാമർശം വിവാദമായ പശ്​ചാത്തലത്തിൽ മാധ്യമ പ്രവർത്തകരുടെ ചോദ്യത്തിന്​ മറുപടി പറയവെയാണ്​​ ഷാരൂഖ്​ ഖാൻ ത​െൻറ നിലപാട്​ വ്യക്​തമാക്കിയത്​.

കഴിഞ്ഞ വർഷങ്ങളിൽ അനുചിതമായ ഒ​േട്ടറെ പ്രസ്​താവനകൾ ത​െൻ ഭാഗത്ത്​ നിന്നുണ്ടായതായിട്ടുണ്ട്​. മറ്റുള്ളവർ നടത്തിയ പ്രസ്​താവനകളെപ്പറ്റി വിധി പറയാൻ ഞാൻ ആരുമല്ല. അതിൽ പക്ഷം പിടിക്കുകയോ പിടിക്കാതിരിക്കുകയോ ചെയ്യുന്നില്ലെന്നും ഷാരൂഖ്​ വ്യക്​തമാക്കി.​

പുതിയ ചിത്രമായ സുൽത്താന്‍റെ ചിത്രീകരണ വിശേഷങ്ങൾ ഒരു ഓൺലൈൻ പോർട്ടലിനോട് പങ്കുവെക്കുന്നതിനിടെ ഷൂട്ടിങ് ദിനങ്ങളിലെ അമിത ജോലിഭാരത്തെക്കുറിച്ച് 'ബലാൽസംഗം ചെയ്യപ്പെട്ട സ്ത്രീയെപ്പോലെ' എന്ന് സൽമാൻ ഖാൻ വിശേഷിപ്പിച്ചതാണ് വിവാദമായത്.

പരാമർശത്തിൽ സൽമാൻ മാപ്പു പറയണമെന്നാവശ്യ​പ്പെട്ട്​ ദേശീയ വനിതാ കമീഷൻ അധ്യക്ഷ ലളിത  രംഗത്ത്​ വന്നതോടെയാണ്​ താരം വെട്ടിലായത്​. ഷൂട്ടിങ് കഴിഞ്ഞ് ഒരടി പോലും നടക്കാൻ കഴിഞ്ഞിരുന്നില്ല, ഏറെ ബുദ്ധിമുട്ടിയിരുന്നു' എന്നാണ് താൻ അർഥമാക്കിയത് എന്നാണ് സൽമാന്‍റെ വിശദീകരണം. എന്നാൽ പരാമർശത്തിൽ മാപ്പു പറയാൻ സൽമാൻ തയ്യാറായിട്ടില്ല.

ഇൗ അഭിപ്രായ പ്രകടനത്തിന്​ ശേഷം സൽമാനുമൊത്ത്​ സൈക്കിളിൽ ഇരിക്കുന്ന ചിത്രം ഷാരൂഖ്​ ഖാൻ ട്വിറ്ററിലിട്ടത്​ കൗതുകമായി.