ബച്ചൻ മുതൽ കനിക കപൂർവരെ; ​ കോവിഡ്​ പോസിറ്റീവായ ബോളിവുഡ്​ താരങ്ങൾ 

രാജ്യത്തി​​െൻറ വിനോദവ്യവസായ തലസ്​ഥാനമായ ബോളിവുഡ്​ കോവിഡ്​ ഭീതിയിൽ. ബച്ചൻ കുടുംബത്തിലുണ്ടായ കോവിഡ്​ ബാധ ബോളിവുഡിനെ അക്ഷരാർഥത്തിൽ ഞെട്ടിച്ചിരിക്കുകയാണ്​. ഇൻഡസ്​ട്രിയുടെ പ്രിയപ്പെട്ട കാരണവരാണ്​ ബിഗ്​.ബി. ബച്ച​​െൻറ ഭാര്യ ജയയും മകൻ അഭിഷേകും മരുമകൾ ഐശ്വര്യയും എല്ലാവർക്കും വേണ്ടപ്പെട്ടവർ തന്നെ.

പുതിയ തലമുറയിലെ ആരാധ്യ ഉൾപ്പടെ താരങ്ങളുടെ ഓമനയാണ്​. ഈ കുടുംബത്തിലേക്കാണ്​ കോവിഡ്​ എത്തിയിരിക്കുന്നത്​. ഇവരെകൂടാതെ ചെറുതും വലുതുമായ ബോളിവുഡ്​ താരങ്ങൾക്ക്​ കോവിഡ്​ ബാധിച്ചിരുന്നു​. ഗായിക കനിക കപൂറാണ്​ ബോളിവുഡിൽ നിന്ന്​ ആദ്യമായി കോവിഡ്​ ബാധിച്ച സെലിബ്രിറ്റി. ലണ്ടനിലായിരുന്ന അവർ തിരികെയെത്തിയശേഷം പരിശോധനക്ക്​ വിധേയയായിരുന്നില്ല. തുടർന്ന്​ ഇവർ ചില പൊതുപരിപാടികളിൽ പ​ങ്കെടുക്കുകയും ചെയ്​തു. രാഷ്​ട്രീയക്കാർ ഉൾപ്പടെ ഇവരുമായി ബന്ധപ്പെട്ട നിരവധി പ്രമുഖർ നിരീക്ഷണത്തിലായിരുന്നു.

നടൻ അനുപംഖേർ അമ്മക്കും സഹോദരനുമൊപ്പം

 

 

2020 ജൂൺ ഒന്നിനാണ്​ സംഗീത സംവിധായകൻ വാജിദ്​ ഖാൻ ഹൃദയസ്​തംഭനംമൂലം മരിച്ചത്​. മരണ സമയത്ത്​ ഇദ്ദേഹത്തിന്​ കോവിഡ്​ സ്​ഥിരീകരിച്ചിരുന്നില്ല. പക്ഷെ പിന്നീട്​ നടന്ന പരിശോധനയിൽ അദ്ദേഹത്തിന്​ കോവിഡ്​ ഉണ്ടെന്ന്​ കണ്ടെത്തിയിരുന്നു. നടൻ കിരൺകുമാറിന്​ മെയ്​ 24നാണ്​ കോവിഡ്​ കണ്ടെത്തിയത്​. കാര്യമായ ലക്ഷണങ്ങളുണ്ടായിരുന്നില്ലെങ്കിലും സംശയം കാരണം അദ്ദേഹം സ്വയം പരിശോധനക്ക്​ വിധേയനാവുകയായിരുന്നു.

നടൻ അനുപം ഖേറി​​െൻറ അമ്മക്കും സഹോദരനും കോവിഡ്​ കണ്ടെത്തിയിട്ടുണ്ട്​. ഇവർ മുംബൈ കോകിലബെൻ ആശുപത്രിയിൽ ചികിത്സയിലാണ്​. നടി സോയ മൊറാനിക്കും നിർമാതാവ്​ കരീം മോറാനിക്കും നേരത്തെ കോവിഡ്​ ബാധിച്ചിരുന്നു. ഇതുകൂടാതെ പലരുടേയും വീട്ടുജോലക്കാർക്ക്​ കോവിഡ്​ സ്​ഥിരീകരിച്ചിട്ടുണ്ട്​.

നടൻ ആമിർ ഖാൻ, നടി രേഖ, സംവിധായകൻ കരൺ ജോഹർ, നിർമാതാവ്​ ബോണി കപൂർ തുടങ്ങിയവരുടെ ജോലിക്കാർക്ക്​ കോവിഡ്​ പോസിറ്റീവ്​ ആയിരുന്നു. വാച്ച്​മാന്​ കോവിഡ്​ സ്​ഥിരീകരിച്ചതോടെ രേഖയുടെ വീട്​ സീൽചെയ്​തു.