മൈസൂരു മൃഗശാലയിൽ കടുവ അസുഖം ബാധിച്ച് ചത്തു

ബംഗളൂരു: മൈസൂരു മൃഗശാലയിലെ ചാമരാജേന്ദ്ര സുവോളജിക്കൽ ഗാർഡനിലെ തായമ്മ എന്ന കടുവ ബുധനാഴ്ച പുലർച്ച 3.45ന് ചത്തു. നാല് വയസ്സും 10 മാസവുമുണ്ടായിരുന്നു. ഹീമോപ്രോട്ടോസോവ എന്ന രോഗം അലട്ടിയ പെൺകടുവ ഭക്ഷണം കഴിക്കുന്നത് നിർത്തിയിരുന്നു. മൃഗശാലയിലെ വെറ്ററിനറി സംഘം എല്ലാ ചികിത്സയും ശ്രമങ്ങളും നടത്തിയിട്ടും ആരോഗ്യസ്ഥിതി മെച്ചപ്പെട്ടില്ല. 10 ദിവസമായി വെള്ളം പോലും കുടിക്കാൻ വിസമ്മതിച്ചു. ചികിത്സയോട് പ്രതികരിച്ചില്ലെന്ന് മൈസൂരു മൃഗശാല എക്സിക്യൂട്ടിവ് ഡയറക്ടർ പി. അനുഷ പറഞ്ഞു. 2021 മാർച്ച് 28ന് ബന്ദിപ്പൂർ കടുവ സംരക്ഷണ കേന്ദ്രത്തിൽനിന്നാണ് തായമ്മയെ മൃഗശാലയിലേക്ക് കൊണ്ടുവന്നത്.